ကိုင်းခွဲ အကိုင်းဆက်နည်းကို အင်္ဂလိပ်ပိုင် Cleft Grafting လို့ ခေါ်ပါရေ။
ကိုင်းခွဲ အကိုင်းဆက်နည်း တဆင့်ချင်းစီကို လေ့လာကြည့်ကတ်ပါမေ။
အဆင့် – ၁ ကိုင်းဆက်ခံဖို့ အပင်နန့် လားဆက်ဖို့ အပင်ကို ရွီးပါ
ကိုင်းဆက်ခံဖို့ အပင်နန့် လားဆက်ဖို့ အပင် နှစ်ပင်လုံးစွာ သန်သန်စွမ်းစွမ်း ဖြစ်ရပါဖို့။
ရောဂါ ဖြစ်နိန်ရေ အပင်မျိုး မဖြစ်ပါဇီကဲ့။
လားဆက်ဖို့ အပင်စွာ အကိုင်းတက် အသစ်တိ ထွက်နိန်ဗြီးသား မဖြစ်ရပါ။
လားဆက်ဖို့ အပင်က အကိုင်းသစ် ထွက်ဖို့ ဘု အတက်ချေ ၄ – ၅ တက်ပါရေ၊ ၁ ပေ အရှည် အကိုင်း ၂ ကိုင်း လိုပါရေ။
လားဆက်ဖို့ အပင်နန့် အဆက်ခံဖို့ အပင်ကို တပြိုင်တည်း မဖြတ်ပါကဲ့။
- အဆက်ခံဖို့ အပင်မှာ ဖြောင့်တန်းနိန်ပနာ မတ်မတ် ထောင်နိန်ရေ အချင်း ၁ လက်မ – ၂ လက်မ အရွယ်အစားရှိရေ အကိုင်းတိ ရှိဖို့ လိုပါရေ။
- ကိုင်းခွဲ အကိုင်းဆက်နည်းကို အခေါက်တိ အလွယ်တကူ ကွာတတ်တေ နွီရာသီမှာ လုပ်ကတ်စွာ များပါရေ။
- အသီး သီးနိန်ရေ အပင် တပင်က အသီး အမျိုးအစားကို ပြောင်းလဲဖို့အတွက် ကိုင်းခွဲ အကိုင်းဆက်နည်းကို လုပ်တတ်ကတ်ပါရေ။
အဆင့် – ၂ ကိုင်းဆက်ခံဖို့ အပင်ကို ဖြတ်ပါ
ကိုင်းဆက်ခံအပင် အကိုင်းတိထဲက မိုးကို ထောင်ပနာ ထွက်နိန်ရေ အကိုင်း တကိုင်းကို ( ဖြတ်ဖို့ နိန်ရာက အောက်ဖက်ကို အနည်းဆုံး ၆ လက်မ အခက်အလက် မရှိဇီဘဲ ) လွှ ထထက်နန့် အခေါက်နန့် အနှစ်သားကို မပွန်း မပဲ့လားအောင် ဂရုတစိုက် ဖြတ်ပါ။
ဖြတ်လိုက်တေ အကိုင်း အောက်ဖက်မှာ အပင် အသက်ဆက်ရှင်နိန်ဖို့ အနည်းဆုံး အကိုင်း တကိုင်းလောက် ချန်ထားခပါ။
အဆင့် – ၃ ဖြတ်လိုက်တေ အကိုင်း အလယ်တည့်တည့်ကို ၆ လက်မ အရှည်ထိ ဓါးနန့် နှစ်ခြမ်း ခွဲပါ
အဆင့် – ၄ ကိုင်းလားဆက်ဖို့ အပင်က အကိုင်းသစ်ထွက်ဖို့ ဘု အတက်ချေ ၄ – ၅ တက်လောက် ပါရေ အကိုင်း ၂ ကိုင်းကို ဖြတ်ပါ
အကိုင်းဖျားတိကို ကိုင်းလားဆက်ဖို့ အကိုင်း အရှည် ၁၀ လက်မ လောက်ဇီ ချန်ပခပနာ ထပ်ဖြတ်ပါ။
အောက်ဖက် ၆ လက်မ ဘေးနှစ်ဖက်ကို အောက်ခြီ အဆုံးထိ ချချွန်ချေ အပြားလိုက် ဖြတ်ပါ။
အဆင့် – ၅ ကိုင်းဆက်ခံဖို့ ခွဲထားရေ အကိုင်းထဲမှာ ကိုင်းလားဆက်ဖို့ အကိုင်းတိကို ထည့်ပါ
ခွဲထားရေ အကိုင်း ကြားထဲမှာ ဝက်အူလှည့် ဖြစ်ဖြစ်၊ သပ် အငယ်ချေ တခု ဖြစ်ဖြစ် ထည့်ပနာ ဘေးနှစ်ဖက်ကို ဖြဲလိုက်ပါ။
ကိုင်းလားဆက်ဖို့ အကိုင်းတိကို အာနိန်ရေ အခေါက်တိ နခမ်းသားတိနန့် တိုက်နိန်အောင်ထိ ဂရုတစိုက် ရိုက်ထည့်ပါ။
ကိုင်းလားဆက်ဖို့ အကိုင်းတိက အခေါက်တိ အကိုင်းခွဲ အပြင်ကို လုံးဝ မထွက်ဇီပါကဲ့။
အဆင့် – ၆ ဖြတ်ထားရေ နိန်ရာတိ အားလုံးကို ဂရုတစိုက် ပိတ်ပါ
ဖြတ်ထားလို့ အသားစတိ ပေါ်နိန်ရေ နိန်ရာတိုင်းကို ကိုင်းဆက်ဖယောင်း ( သာမန် ဖယောင်းကို ပပျော့ချေ လုပ်ထားကေ ရပါရေ ) (ဝါ) ကတ္တရာ ပပါးချေ လောင်းဗျာလ် နပူလောင်ပနာ မခြောက်လားအောင် နန့် ဘတ္တရီးယားပိုးတိ မဝင်အောင် ဂရုတစိုက် ပိတ်ပါ။
နောက်နိန့်မှာ တခါ အပေါက်တိ မပိတ်ဘဲ မကျန်ခဆိုစွာ သေချာအောင် ထပ်လားကြည့်ပါ။
အဆင့် – ၇ ကိုင်းဆက်ကို ဂရုတစိုက်ဇီ လားကြည့်ပီးပါ
ကိုင်းဆက်အောက် ကိုင်းဆက်ခံ အပင်မှာ အတက်သစ်တိ ထပ်ထွက်လာကေ ဖြတ်ပလိုက်ပါ။
ကိုင်းဆက်သစ်မှာ အတက်သစ်တိ ထွက်လာကေ အကောင်းဆုံး ၁ တက်ကို ချန်ပနာ ကျန်စွာတိကို ဖြတ်ပလိုက်ပါ။
၂ ရာသီလောက် ကြာကေတော့ခါ အကောင်းဆုံး တကိုင်းရာ ချန်ထားပနာ ကျန်ရေ အကိုင်းတိကို ခွတ်ပလိုက်ပါ။
အေလောက်ဆိုကေတော့ခါ အခေါက် အကိုင်းဆက်နည်းကို အသေအချာ နားလည်ဗျာလ် ထင်ပါယင့်။
မရှင်းစွာ ရှိကေ လှမ်းမိန်းနိုင်ပါရေ။
ကျော်ဝင်းခိုင်
