အဆင့် – ၁ ကိုင်းဆက်ခံဖို့ အပင်နန့် အကိုင်း လားဆက်ဖို့ အပင် နှစ်ပင်ကို ရွီးပါ။
ကိုင်းဆက်ခံဖို့ အပင်စွာ သန်သန်စွမ်းစွမ်းနန့် အမြစ် ကောင်းကောင်း တွယ်ဗြီးသား ဖြစ်ရပါဖို့။
အကိုင်း လားဆက်ဖို့ အပင်လည်း သန်စွမ်းဖို့တော့ လိုပါရေ။
ပင်စည်မှာ ရောဂါ ဖြစ်နိန်ရေ အပင် မဖြစ်ပါဇီကဲ့။
အချပ်လိုက် အကိုင်းဆက်နည်းအတွက် ကိုင်းဆက်ခံဖို့ အပင် အရွယ်အစားနန့် ကိုင်းလားဆက်ဖို့ အပင် အရွယ်အစား အတူတူ ဖြစ်ဖို့ လိုပါရေ။
မဟုတ်ကေ ဖြတ်လာရေ အတက်ပါရေ အခေါက်ကို ထည့်ဖို့နိန်ရာမှာ အံ့ဝင်ဂွင်ကျ ဖြစ်အောင် ပြန်လှီးဖြတ်ရပါဖို့။
- အချပ်လိုက် အကိုင်းဆက်နည်းက အလွယ်ကူဆုံး ကိုင်းဆက်နည်း ဖြစ်ပနာ အသီးပင်တိအတွက် ကကောင်း အသုံးတည့်ပါရေ။
အဆင့် – ၂ အကိုင်းဆက်ခံဖို့ အပင်က အချပ်ချေ တချပ်ကို ဖြတ်ထုတ်ပါ။
အကိုင်းဆက်ခံဖို့ အပင်က ပင်စည်ကို လုံးပတ် အရွယ်အစား ၅ ပုံ ၁ ပုံ ကနိန် ၄ ပုံ ၁ ပုံ ( 1/5 to 1/4 ) အနက်လောက်ထိ ခဲတံချွန်ဓါး (ဝါ) ဘလိတ်ဓါးနန့် စစောင်းချေ လှီးပါ။
ဓါးကို ပြန်ထုတ်ပနာ အထက်ဖက် ၁ လက်မ ၁ မတ် ကနိန် ၁ လက်မခွဲ ( 1 1⁄4 to 1 1⁄2 inches ) အကွာလောက်က တနားက လှီးထားရေ နိန်ရာ ရောက်အောင်ထိ စစောင်းချေ လှီးချပါ။
ယင်းနိန်ရာကို ရောက်စွာနန့် အပင်စချေ အချပ်လိုက် ထွက်လာပါလိမ့်မေ။ ယင်း အပင်စချေကို ဖယ်ပလိုက်ပါ။
အဆင့် – ၃ အကိုင်း လားဆက်ဖို့ အပင်က အတက်ကို အချပ်လိုက် ဖြတ်ထုတ်ပါ။
အကိုင်း လားဆက်ဖို့ အပင်က အကိုင်းသစ်ထွက်ဖို့ အတက်ချေကို တွိကေ၊ ယင်းအတက်ချေကို ဗဟိုထားပနာ အထက်မှာ လှီးထုတ်လိုက်တေ အပင်စချေအတိုင်း အချပ်လိုက် လှီးထုတ်ပါ။
အဆင့် ၂ မှာ လှီးထုတ်လိုက်တေ အပင်စချေနန့် အတတ်နိုင်ဆုံး တပုံစံတည်းနန့် အရွယ်အစား တူအောင် လှီးပါ။
အဆင့် – ၄ ဖြတ်ထုတ်လာရေ အတက်ပါရေ အချပ်ချေကို အဆင့် – ၂ က ဖြတ်ထားရေ အမြှောင်းထဲမှာ ထိုးထည့်ပါ။
အခေါက်တိ အချင်းချင်း လုံးဝ ကပ်နိန်ဖို့ လိုပါရေ။ မဟုတ်ကေ ကိုင်းဆက်စွာ မအောင်မြင်နိုင်ပါ။
အကိုင်းထွက်ဖို့ အတက်ချေစွာ အထက်ကို ထောင်နိန်ဖို့ လိုပါရေ။
အမှုန်အမွှားတိနန့် ပိုး မဝင်ပါဇီကဲ့။
အဆင့် – ၅ ထည့်ထားရေ အချပ်ချေကို အသေအချာ စည်းနှောင်ပါ။
ကိုယ် လုပ်တေ အပင် အရွယ်အစားကို လိုက်ပနာ ရာဘာပြားချေနန့် ဖြစ်ဖြစ်၊ ပလက်စတိပ် တိပ်နန့် ဖြစ်ဖြစ် ပတ်ပနာ တတင်းချေ ချိုင်ပါ။
အတက်ချေ နိန်ရာထက်မှာ လုံးဝ မချိုင်ပါကဲ့။
အဆင့် – ၆ တလလောက် ကြာရေခါ စည်းထားစွာကို ဖြီချပလိုက်ပါ။
ညညင်သသာ ဖြီပါ။
အတက်ချေကို လုံးဝ လားပနာ မတိုက်စီပါကဲ့။
အဆင့် – ၇ အတက်ချေကို သတိထား လေ့လာပါ။
အတက်ချေရာ စိမ်းပနာ ရှင်နိန်သိမ့်ပုံ ရှိကေ အကိုင်းဆက်နည်း အောင်မြင်ပါရေ။
ပိန်ကျပနာ ခြောက်လားဗျာလ် ဆိုကေတော့ခါ မအောင်မြင်ပါ။
အဆင့် – ၈ အနားက အတက်သစ်တိကို ချိုးပလိုက်ပါ။
အတက်ချေက အကိုင်းသစ်အတွက် အညွှန့်ချေ ကောင်းကောင်း ထွက်ဗျာလ်ဆိုကေ အညွှန့် အထက်ဖက် လက်မဝက် ( 1⁄2 လက်မ )က စစောင်းချေ ဓါးနန့် အခေါက်ကို ဖြတ်ပလိုက်ပါ။
အနား ပတ်လည်မှာ အညွှန့်သစ်တိ ထွက်နိန်ကေ ချိုးပလိုက်ပါ။
ရည်ရွယ်ချက်က ထွက်လာရေ အညွှန့်သစ်ကိုရာ ပို အားစည်လာအောင်၊ အပင်က ရီနန့် အဟာရကို ပိုပနာ ပံ့ပိုးအောင် လို့ပါ။
အေအဆင့်ကို မလုပ်ကေလည်း ရပါရေ။
ကိုင်း အေလောက်ဆိုကေ အေနိန့်အတွက် အသိပညာတခု ထပ်တိုးဗျာလ် ထင်ပါယင့်။
နောက် ကိုင်းဆက်နည်း ၃ မျိုးကို ထပ်ဆက်ပီးပါမေ။
ကျော်ဝင်းခိုင်
