၅ နှစ်အတွင်း တရုတ်ပြည် လေကြောင်းစျီးကွက်စွာ အမေရီကန်ပြည်ထောင်စုကို ကျော်လွန်

တရုတ်ပြည်စျီးကွက်
တရုတ်ပြည်စျီးကွက်

နိုင်ငံတကာ လေကြောင်း ပို့ဆောင်ရေးအဖွဲ့ International Air Transport Association (IATA) ခန့်မှန်းချက်အရ လေကြောင်းခရီး ဗဟိုချက်မစွာ အမေရိကန်ပြည်ထောင်စုနန့် ဥရောပတိုက်ကနိန် အာရှတိုက်ကို ရွိလားဖို့လို့ ပြောပါရေ။

၂၀၂၂ ခုနှစ်မှာ ကဗာ့ အကြီးဆုံး လေကြောင်းစျီးကွက်စွာ တရုတ်ပြည်ဖြစ်လာဖို့လို့ ဆိုပါရေ။ အယင် ခန့်မှန်းထားစွာထက် ၂ နှစ်စောပနာ အမေရီကန်ပြည်ထောင်စုကို ကျော်လွန်လားဖို့လို့ ပြောပါရေ။ လေယာဉ်ထုတ်တေ ဘိုးဝိန်း Boeing ကုမ္ပဏီကတော့ခါ တရုတ်ပြည်မှာ ဒေါ်လာ ၁ ထရီလီယံ(သန်း ၁ သန်း) ဖိုး လေယာဉ် အစီးပေါင်း ၇၂၀၀ ထပ်လိုလာဖို့လို့ ဆိုပါရေ။

နောက် နှစ် ၂၀ မှာ လေကြောင်းခရီးစဉ် အားလုံးက တဝက်လောက်စွာ အာရှ – ပစိဖိတ်ထဲမှာ ရှိလာဖို့လို့ IATA က ခန့်မှန်းထားပါရေ။ ၂၀၁၇ ခုနှစ်မှာ လေကြောင်း ခရီးသယ် သန်း ၄၀၀၀ ရှိစွာကနိန်၊ ၂၀၃၆ ခုနှစ် အရောက်မှာ လေကြောင်း ခရီးသယ် သန်း ၇၈၀၀ ထိ ရှိလာဖို့လို့ ဆိုပါရေ။

ဘန်ကောက်၊ မနီလာ နန့် ဂျကာတာ လေဆိပ်ရို့ကတော့ခါ အကြီးစား ထပ်ချဲ့ဖို့ ပြင်ဆင်နိန်ကတ်ဗျာလ်လို့ ဆိုပါရေ။ ဥရောပတိုက်စွာ လေကြောင်းစျီးကွက် လွှမ်းမိုးထားစွာက ကျဆင်းလားပနာ ၂၀၃၆ ခုနှစ် အရောက်မှာ ထိုင်းနိုင်ငံနန့် တူရကီနိုင်ငံရို့က နံပါတ် ၁၀ ထဲကို ရောက်လာဖို့လို့ ဆိုပါရေ။ ပြင်သစ်နိုင်ငံနန့် အီတလီနိုင်ငံရို့ကတော့ခါ နံပါတ် ၁၀ ထဲက ပြုတ်လားဖို့လို့ ဆိုပါရေ။

 

ကျော်ဝင်းခိုင်

ကိုးကား – https://www.rt.com/business/407928-china-passengers-united-states/