“အမိယေ … ကြက်ဥ ကျော်စွာများ အလကား အပင်ပန်းခံပနာ ရွီးနိန်ရေ။” လို့ ထင်ပါလိမ့်မေ။ ဟုတ်ပါရေ။ ကြက်ဥကို စနစ်တကျ မကျော်တတ်တေ လူတိ အများကြီး ရှိလို့ပါ။ ကိုယ့်စွာကို တတ်တေလို့ ထင်စွာတောင် စနစ်ကျယင့်လား တခေါက်လောက် ဖတ်ကြည့်ပါ။
၁) အိုးမကပ်တေ ကျော်ဗျကို မီးမပြင်း တပြင်း အပူပီးထားရေ မခွင်ထက်မှာ တင်ပနာ၊ ထောပတ် ၁ ဇွန်း (ဝါ) ဆီ ၁ ဇွန်းကို ထည့်ပါ။
အိုး ပူလာခါ ဆီပူကို အိုးဖင် ပတ်ပတ်လည်မှာ ပျံ့လားအောင် အိုးကို ကိုင်ပနာ စောင်းပီးပါ။
၂) ကြက်ဥတိကို ခွဲပနာ တလုံးချင်းစီကို ဟင်းဇားချေတိနန့် ခွဲပနာ ထည့်ထားပါ။
၃) ကြက်ဥတိကို ဆီအိုးထဲမှာ တဥချင်းစီ ဘေးချင်းကပ်ပနာ ထည့်ပါ။ တဥနန့် တဥ မထပ်ပါဇီကဲ့။
၄) ၁ မိနစ်လောက် ကြာကေ ကြက်ဥ အကာနားချေတိ ဖြူလာစွာကို တွိပါလိမ့်မေ။ အိုးကို အိုးဖုံးနန့် ဖုံးပနာ မီး အရှိန်ကို လျှော့ချလိုက်ပါ။
အိုးကို ဖုံးလိုက်တေ သဘောတရားက အထဲမှာ ရငွေ့တိ ထွက်လာပနာ ယင်းရငွေ့ အပူနန့် ကြက်ဥ အထက်ဖက်ကို ကျက်လားအောင် လို့ပါ။
၅) ၄ မိနစ်လောက် စောင့်ဗြီးကေတော့ခါ အိုးလည်း မကပ်၊ တူးလည်း မတူးရေ ကြက်ဥကျော်ကို ရပါလိမ့်မေ။ ကျော်စွာ ကြာလီ၊ ကြက်ဥ အနှစ်က မာလာလီပါ။ ကြက်ဥ အနှစ်ကို မမာတမာ လိုချင်ကေတော့ခါ ၅ မိနစ်လောက် ကြာအောင်ထားပါ။ အင်တန် မာချင်ကေတော့ခါ ၆ မိနစ် ကြာအောင်ထားပါ။
ဆား တစိချေနန့် ငရုတ်ကောင်းမှုန့် တစိချေ ဖြူးပနာ စားနိုင်ပါဗျာလ်။
၆) နှစ်ဖက်လုံး အကျက် စားချင်ကေတော့ခါ အထက်က အဆင့် ၅ ဗြီးခါ ကြက်ဥကို ဇွန်းနန့် လှန်ပနာ အခြားတဖက်ကို ၁ မိနစ်လောက် ထပ် အပူပီးလိုက်ပါ။
အထက်မှာ ပြောခရေပိုင် ဆား တစိချေနန့် ငရုတ်ကောင်းမှုန့် တစိချေ ဖြူးပနာ စားနိုင်ပါဗျာလ်။
ကြက်ဥကျော်က ကျော်ဗြီးစွာနန့် ချက်ချင်း စားမှရာ ကောင်းပါရေ။
အားလုံး စမ်းကြည့်ပနာ အောက်မှာ အကြံဉာဏ် ပီးနိုင်ပါရေ။
