၂၀၁၇ ခုနှစ် နိုဗန်ဘာ ၁၁ ရက် – ကာတလန်မြို့တော် ဘာစီလိုနာမြို့မှာ ကာတလန်ပေါင်း ၇ သိန်းခွဲလောက်က စပိန် အစိုးရကို ပုန်ကန်မှု၊ ပုန်ကန်အောင် နှိုးဆော်မှု၊ အများပြည်သူ ရံပုံငွေ အလွှဲသုံးစားမှုတိနန့် နာမေတပ်ပနာ အဖမ်းခံထားရရေ ဒေသခေါင်းဆောင်တိအတွက် လမ်းထွက် ဆန္ဒပြကတ်ပါရေ။
ဆန္ဒပြပွဲကို ဦးဆောင်ရေ အဖွဲ့အစည်း ၂ ခုက အယင်လက ခေါင်းဆောင်တိ အဖမ်းခံထားရရေ ကာတလန် အမျိုးသား အစည်းအရုံး(Catalan National Assembly (ANC)) နန့် အုန်းမဏိယမ်း ယဉ်ကျေးမှု(Omnium Cultural) ပါ။
ကာတလန် အလံတိ၊ “နိုင်ငံရေး အကျဉ်းသားတိအတွက် လွတ်လပ်မှု” ဆိုရေ စာတမ်းတိနန့် အဖမ်းခံထားရရေ ခေါင်းဆောင်တိ ဓါတ်ပုံတိကို ကိုင်ဆောင်ထားကတ်ပါရေ။ ယင်း အဖမ်းခံထားရရေ ခေါင်းဆောင်တိ ကိုယ်စားပြု အဝါရောင်ဖဲပွင့်တိကိုလည်း တပ်ထားကတ်ပါရေ။
အောင်တိုဘာ ၂၇ ရက်နိန့်မှာ ကာတလန် လွတ်တော်က တဖက်သတ် လွတ်လပ်ရေး ကြေငြာလိုက်တေအတွက် စပိန်အစိုးရက ပုဒ်မ ၁၅၅ ထုတ်ဗျာလ် ကာတလန် လွတ်တော်ကို ဖျက်သိမ်းလိုက်ပနာ စပိန်အစိုးရက တိုက်ရိုက် အုပ်ချုပ်နိန်ပါရေ။ လာဖို့ ဒီဇင်ဘာ ၂၁ ရက်နိန့်မှာ ရွီးကောက်ပွဲ ပြန်လုပ်ပီးဖို့လို့ စပိန်အစိုးရက အာမခံထားပါရေ။ ကာတလန် အစိုးရအဖွဲ့ဝင်တိနန့် လွတ်တော်ကိုယ်စလှယ်တချို့ကို စပိန်အစိုးရက ဖမ်းဆီးလိုက်ပါရေ။ ကာတလန်ခေါင်းဆောင် ပုဂျ်ဒီမင့်တ်(Puigdemont) နန့် ဝန်ကြီးဟောင်း ၄ ယောက်ကတော့ခါ စပိန်နိုင်ငံကနိန် ဘဲလ်ဂျီယန်နိုင်ငံကို တိမ်းရှောင်လားကတ်ပါရေ။ စပိန်နိုင်ငံက ဥရောပ ဖမ်းဝရမ်း ထုတ်တေအတွက် ယင်း ၅ ယောက်စွာ ဘဲလ်ဂျီယန် ရဲစခန်းတခုမှာ ကိုယ့်စွာကို အဖမ်းလားခံကတ်ကေလည်း ယင်းနိန့်ကပင် အာမခံနန့် ပြန်လွတ်လိုက်ပါရေ။
ႀကိဳတင္ပ်င္ဆင္ထားရဖို႕
သခၤန္းစာယူစရာတိခ်ည္းယာ