၂၀၁၇ ခုနှစ် နိုဗန်ဘာ ၁၉ ရက် – ကဲလ်လီဖိုးနီးယား အခြေစိုက် ရင်းနှီးမြှပ်နှံမှု ရံပုံငွေ ဟိုက်ယာအော်ဒါဗွီစီ (HigherOrderVC) နန့် တကဗာလုံးမှာ ရှိနိန်ကတ်တေ သတင်းသမားတိ စုပေါင်းပနာ အခြေခံအကြောင်းအရာတိကို စုံစမ်းစစ်ဆေးဗြီးမှ ရွီးရေ သတင်းမှန်တိ ပြန်ပေါ်လာဖို့အတွက် ခြစ်ပတိုကာရမ်စီ (cryptocurrency) လို့ ခေါ်ရေ ဒီဂျစ်တဲလ် ဖေသာတမျိုးကို ထုတ်ဝီဖို့ ပြင်ဆင်နိန်ကတ်ပါရေ။
ဖေသာနာမေကို ပြတ်စ်ကွိုင်း (PressCoin) လို့ နာမေပီးထားပါရေ။ ရည်ရွယ်ချက်က သတင်းမှားတိကို တိုက်ဖိုက်ဖို့နန့် သတင်းမီဒီယာကြီးတိကို အမှီအခိုကင်းရေ သတင်းသမားတိ ပေါ်ထွန်းလာဖို့အတွက် ဖြစ်ပါရေ။ မီဒီယာကုမ္ပဏီကြီးတိက အကျိုးအမြတ်များဖို့ တခုတည်းအတွက် လူကြိုက်များဖို့ သတင်းတိကိုရာ တမင်တကာ ဖန်တီးပနာ သတင်းမှားတိကို ထုတ်လွင့်လာကတ်တေအတွက် တကဗာလုံးမှာ လုပ်စားသတင်းသမားတိနန့် ပြည့်နှက်လာပနာ သတင်းမီဒီယာတိကို ယုံကြည်မှုလည်း အနိမ့်ဆုံးအဆင့်ကို ရောက်လားပါဗျာလ်။
ဘဲ့တ်ကွိုင်းပိုင် ခြစ်ပတိုကာရမ်စီတိကို အစိုးရအပါအဝင် တယောက်လည်း ထိန်းချုပ်လို့ မရရေအတွက် အဂုအချိန်မှာ ကကောင်း ခေတ်စားလာပါရေ။ လွန်ခရေ ၉ နှစ်က တခုတန်ဖိုးလည်း မရှိခရေ ဘဲ့တ်ကွိုင်း ၁ ခတ် တန်ဖိုးစွာ အေနိန့် ပေါက်စျီးက ဒေါ်လာ ၈၁၀၀ ကျော်နိန်ပါရေ။
လာဖို့ နိုဗန်ဘာ ၂၂ ရက်နိန့်က စပနာ အစပြု ဖေ့သာ တန်ဖိုး (initial coin offering (ICO)) အဖြစ် ပြတ်စ်ကွိုင်း ၁ ခတ်ကို အမေရီကန် ၁ ဒေါ်လာနန့် ရောင်းလားဖို့ဆိုပါရေ။ ပြတ်စ်ကွိုင်းကို အင်္ဂလန် နိုင်ငံမှာ မှတ်ပုံတင်ထားပါရေ။ အစပြု ဖေ့သာ တန်ဖိုး ရောင်းဗြီးလားကေ အများပိုင် ကုမ္ပဏီ အဖြစ် ပြောင်းလားဖို့လို့ဆိုပါရေ။ နောက်ပိုင်းမှာ ဖေသာ အခတ်ပေါင်း သန်း ၁၀၀ ထိ ရောင်းလားဖို့ စီမံထားရေလို့ ပြောပါရေ။
