တန်းဆန့်တ် က ဖေ့ဆ်ဘုတ်ခ် ကို ကျော်ပနာ ကဗာ့အကြီးဆုံး လူမှုကွန်ယက် ဖြစ်လာ

0
183
Mascots of Tencent are displayed at a registration counter © Tyrone Siu / Reuters

တရုတ်နိုင်ငံက နည်းပညာကုမ္ပဏီကြီး တန်းဆန့်တ်(Tencent)စွာ ကဗာကျော် လူမှုကွန်ယက် ဖေ့ဆ်ဘုတ်ခ်(Facebook)ကို ကျော်တက်ပနာ ကဗာ့ ပဥ္စမမြောက် အကြီးဆုံးကုမ္ပဏီ ဖြစ်လာရုံမက အာရှတိုက်က ပထမဆုံး ဒေါ်လာ ထရီလီယံ တဝက် ကျော်လာရေ ကုမ္ပဏီကြီးလည်း ဖြစ်လာပါရေ။

ဟောင်ကောင်မှာ နာမေတင်ထားရေ အိန်တာနတ်ကုမ္ပဏီကြီးက ဝီချတ်(WeChat)နန့် အွင်လှိုင်းဂိမ်းတိ ထုတ်လုပ်ပနာ အေနှစ်အတွင်းမှာ အစုရှယ်ယာတန်ဖိုးစွာ ၁၂၀ ရာခိုင်နှုန်းထိ ထိုးတက်လာပါရေ။ အေနှစ်မှာ ထင်ထားစွာထက် အသတင် အမြတ် ပိုလာပနာ အယင်နှစ်ကထက် ၆၉ ရာခိုင်နှုန်း ပိုတက်လာပါရေ။

တန်းဆန့်တ် လက်ရှိ စျီးကွက်တန်ဖိုးက အမေရီကန်ဒေါ်လာ ၅၂၃ ဘီလီယံ ရှိလာပနာ လက်ရှိ စျီးကွက်တန်ဖိုး အမေရီကန်ဒေါ်လာ ၅၂၂ ဘီလီယံ တန်ဖိုးရှိရေ ဖေ့ဆ်ဘုတ်ခ် ကို ကျော်တက်လားပါဗျာလ်။ ကဗာမှာ တန်းဆန့်တ် ကုမ္ပဏီကြီးထက် ပိုကြီးစွာဆိုလို့ အပ်ပဲလ်(Apple)၊ အာလ်ဖာဘတ်(Alphabet)၊ မိုင်ခြိုဆော့ဖ်(Microsoft) နန့် အာမေဇုန်(Amazon) ကုမ္ပဏီကြီး ၄ ခုရာ ကျန်ပါဗျာလ်။ တရုတ်နိုင်ငံက ပြိုင်ဖက် အွင်လှိုင်းစျီးရောင်းကုမ္ပဏီကြီး အာလီဘာဘာ(Alibaba – လက်ရှိစျီးကွက်တန်ဖိုး ဒေါ်လာ ၄၇၄.၁၅ ဘီလီယံ)နန့် ဝတ်ဘ်ကုမ္ပဏီကြီး ဘိုင်ဒူ(Baidu – လက်ရှိစျီးကွက်တန်ဖိုး ဒေါ်လာ ၈၂.၉၇ ဘီလီယံ)ရို့ထက်လည်း ပိုကြီးလားပါဗျာလ်။

တန်းဆန့်တ် အဓိက ဝင်ငွေစွာ ဝီချတ်(WeChat) မတ်ဆေ့စ်ပို့စနစ်က ရပနာ၊ တရုတ်နိုင်ငံထဲမှာ ဝီချတ် သုံးရေ လူဦးရေပေါင်း သန်း ၁ ထောင်နီးပါးလောက် ရှိပါရေ။

၁၉ နှစ် သက်တမ်းရှိရေ တန်းဆန့်တ် ကုမ္ပဏီမှာ ကဗာကျော် တေးခြင်း ဝန်ဆောင်မှုပီးရေ ဆပေါ့တီဖိုင်း(Spotify)နန့် တန်းတူ တန်းဆန့်တ် မြူးဇဲ့စ်(Tencent Music)နန့် ကဗာကျော် ဗီဒီယို ဝန်ဆောင်မှုပီးရေ ယူကျု(YouTube)နန့် တန်းတူ တန်းဆန့်တ် ဗီဒီယို(Tencent Video)ဆိုစွာလည်း ရှိပါရေ။

တန်းဆန့်တ်စွာ နိုင်ငံရပ်ခြားကို ချဲ့ထွင်လာပနာ အဂုအချိန်မှာ မလေးရှားနိုင်ငံမှာကို ဝီချတ်(WeChat) သုံးရေ လူဦးရေပေါင်း သန်း ၂၀ ရှိလာဗျာလ်လို့ဆိုပါရေ။

ကိုးကား – https://www.rt.com/business/410484-tencent-beats-alibaba-facebook/