ကဗာ့ တန်ဖိုးအကြီးဆုံး ခြစ်ပတိုကာရမ်စီ ဘဲ့တ်ကွိုင်း ၁ ခတ် တန်ဖိုးစွာ နောက် ၁၃ လအတွင်းမှာ ဒေါ်လာ ၄ သောင်းကို အသာချေ ရောက်လာနိုင်ရေလို့ ဖော့တ်ထရပ်စ် ဟတ်ဂျ် ဖင်းဒ်(Fortress hedge fund) မန်နိန်ဂျာဟောင်း မိုင်ကဲလ် နိုဗိုဂြစ်(Michael Novogratz)က ခန့်မှန်းလိုက်ပါရေ။
“ဘဲ့တ်ကွိုင်း တန်ဖိုးစွာ ၂၀၁၈ အကုန်မှာ ဒေါ်လာ ၄ သောင်းကို အသာချေ ရောက်လာနိုင်ရေ။” လို့ စီအန်ဘီစီ(CNBC) သတင်းဌာနနန့် တွိဆုံစွာမှာ နိုဗိုဂြစ်က ပြောလိုက်စွာပါ။
ဗြီးခရေ တနင်္လာ နိန့်ကပင် တောင်ကိုးရီးယားနိုင်ငံက ကဗာ့အကြီးဆုံး ခြစ်ပတိုကာရမ်စီ အရောင်းအဝယ်ဌာန ဘဲ့တ်ဟင့်ဘ်(Bithumb) မှာ ဘဲ့တ်ကွိုင်း ၁ ခတ် တန်ဖိုးစွာ ဒေါ်လာ ၁ သောင်းကျော်ကို တက်လားခပါဗျာလ်။
ကဗာ့ ဗဟိုဘဏ်တိက ဘဲ့တ်ကွိုင်းကို တန်ဖိုးတခု အနိန်နန့် လက်မခံကတ်သိမ့်ကေလည်း အဂုအခါ ဘဲ့တ်ကွိုင်း စုစုပေါင်း တန်ဖိုးစွာ စီးတီးဂြိုပ်(Citigroup) တန်ဖိုးနန့် ကာတာ(Qatar)နိုင်ငံ စီးပွားရေး ပမာဏကို ကျော်လွန်လားပါဗျာလ်။
ဘဲ့တ်ကွိုင်း နောက်မှာ လိုက်နိန်ရေ ခြစ်ပတိုကာရမ်စီ အီသီရီယင်(Ethereum) တခတ် တန်ဖိုးစွာလည်း ဒေါ်လာ ၄၉၃.၄၀ ကို ရောက်လာပါဗျာလ်။ အေ တနှစ်တည်းမှာ ၆ ထောင် ရာခိုင်နှုန်းထိ မြင့်တက်လာစွာပါ။
နိုဗိုဂြစ်က “အီသီရီယင် တန်ဖိုးစွာလည်း ၂၀၁၈ ခုနှစ်အကုန်မှာ အဂုတန်ဖိုးထက် ၃ ဆ မြင့်တက်လာဖို့။” လို့ ပြောပါရေ။
ကိုင်း စိန်ရွှေငွေထက် ပို ရင်းနှီးမြှပ်နှံဖို့ ကောင်းရေ ခြစ်ပတိုကာရမ်စီ သဘောတရားကို အကဲခတ်မိကတ်ဗျာလ် ထင်ပါယင့်။ ကိုယ်တိုင်လည်း ဘဲ့တ်ကွိုင်း တစိချေ ဝယ်ဖို့ ပြင်ဆင်နိန်ပါကြောင်း ….
