မြောက်ကိုးရီးယားက အေနိန့် ပစ်တေ ဒုံးကျည်မှာ စံချိန်သစ်တိ ရှိနိန်

0
235

တိုက်ကြီး တတိုက်ကနိန် အခြား တတိုက်ကိုထိ လှမ်းပစ်နိုင်ရေ အိုင်စီဘီအမ်း(ICBM-Intercontinental Ballistic Missile) ဒုံးကျည်သစ်တမျိုးကို အေနိန့် မိုးသောက် စစောပိုင်းမှာ မြောက်ကိုးရီးယားနိုင်ငံက ဂျပန်ပင်လယ်ထဲကို လှမ်းပစ်လိုက်ပါရေ။

ယင်းဒုံးကျည် ပစ်လွှတ်စွာမှာ ပထမ ထူးခြားစွာတခုက အသစ် တီထွင်ထားရေ ဒုံးကျည်ပစ်ကားတစီးထက်က ပစ်လွှတ်လိုက်စွာပါ။

နောက် ထူးခြားစွာတခုက ယင်းဒုံးကျည်စွာ ကဗာ့လီထု အပြင်ဖက်ကို ဖောက်ထွက်လားပနာ ပြန်ကျလာလို့ ကဗာ့လီထုထဲကို ပြန်ရောက်လာရေခါ ဒုံးကျည်ထိပ်ဖူးက ဗုံးထည့်ရေအခန်းစွာ ကဗာ့လီထု ဖိအားဒဏ်ကို ခံနိုင်ရည်ရှိစွာပါ။

ကိုယ်တိုင် လားကြည့်ခီရေ မြောက်ကိုးရီးယားဂေါင်းဆောင် ကင်ဂျွင်အင်း ကတော့ခါ “အမြင့်ဆုံးအရည်အသွေးနန့် စံချိန်သစ်တင်လိုက်စွာ” လို့ ချီးမြှောက်လိုက်ပါရေ။

အဂု ပစ်လွှတ်လိုက်တေ ဒုံးကျည်စွာ တတည့်ထောင်ဗျာလ် အမြင့် ၄၄၇၅ ကီလိုမီတာ(၂၇၈၀ မိုင်)ထိ တက်လားပနာ ပစ်လွှတ်တေ နိန်ရာက အလျှားလိုက် ၉၅၀ ကီလိုမီတာ(၆၉၀ မိုင်) အကွာအဝေး ရှိရေ ဂျပန်ပင်လယ်ထဲကို ပြန်ကျလားပါရေ။ ရောက်လားရေ အမြင့်စွာ အဂု အာကာသမှာ ရှိနိန်ရေ နိုင်ငံတကာ အာကာသစခန်း(International Space Station-ISS) အမြင့်ထက် ၁၀ ဆ အမြင့်ကိုထိ တက်လားစွာပါ။ လီထက်မှာ စုစုပေါင်း ကြာရေအချိန်က ၅၃ မိနစ်ပါ။

အေ ဒုံးကျည်ကို ဟွာဆင်း ၁၅(Hwasong 15)လို့ နာမေပီးထားပနာ အမေရီကန်ပြည်ထောင်စုက ဇာနိန်ရာကို မဆို လှမ်းပစ်နိုင်ရေဆိုပနာ မြောက်ကိုးရီးယားနိုင်ငံက ကြွေးကြော်လားပါရေ။

Leave a Reply

Please Login to comment
  Subscribe  
Notify of