မြောက်ကိုးရီးယားကို ရန်စပနာ ဆွပီးနိန်လို့ စစ်ဖြစ်လာကေ ဂျပန်နန့် တောင်ကိုးရီးယားရာ ပထမဆုံး ဓဇာခံတိ ဖြစ်လားဖို့လို့ ရာရှားနိုင်ငံခြားရေး ဝန်ကြီး ဆာဂျီ လတ်ဗရို့ဗ်(Sergey Lavrov)က သတိပီးလိုက်ပါရေ။
“ပြုံယမ်းက အန္တရာယ်များရေ နြူးကလီးယားဒုံးကျည်တိနန့် စွန့်စားနိန်လို့ ရာရှားက ရှုတ်ချပြစ်တင်နိန်ရေအချိန်မှာ၊ မတတ်နိုင်မှန်း သိကေလည်း မိတ်ဆွေ အမေရီကန်တိက ရန်စပနာ ဆွပီးနိန်စွာကိုလည်း ရာရှားက ရှုတ်ချပြစ်တင်ရေ။” ဆိုပနာ လတ်ဗရို့ဗ်က ဘီလာရုနိုင်ငံ ရုပ်သံသတင်း အပ်စ်တီဗွီ (Belarusian broadcaster STV)နန့် အိန်တာဗျူးမှာ ဖွင့်ပြောလိုက်ပါရေ။ “ကံမကောင်းစွာက အမေရီကန်တိက ယင်းလမ်းကြောင်းထဲကို ဂျပန်နန့် တောင်ကိုးရီးယားကို ဆွဲသွင်းနိန်စွာပါ။ အမှန်တကယ်ရာ ကိုးရီးယားကျွန်းဆွယ်မှာ စစ်ဖြစ်လာဖို့ဆိုကေ ယင်းနိုင်ငံတိက ပထမဆုံး ဓဇာခံ ဖြစ်ခံရဖို့ နိုင်ငံတိပါ။”
အေအပတ် အစောပိုင်းက မြောက်ကိုးရီးယားနိုင်ငံက ကဗာ့တိုက်ကြီးတိကို ကျော်ပနာ ပစ်နိုင်ရေ ဒုံးကျည် ပစ်လွှတ်လိုက်စွာနန့် ပတ်သတ်ပနာ အမေရီကန်တိနန့် ဆက်ဆံရေး ကကောင်း တင်းမာနိန်ပနာ၊ အချိန်မရွေး စစ်ထ,ဖြစ်နိုင်ရေ အနိန်အထားမှာ ရှိနိန်ပါရေ။ တနိုင်ငံ,ငံက စပနာ မြောက်ကိုးရီးယားထဲကို ကျူးကျော်လိုက်စွာနန့် မြောက်ကိုးရီးယားက လက်တုံ့ပြန်ဖို့ အဆင်သင့် အနိန်အထားပါ။ ယင်းပိုင် မြောက်ကိုးရိးယားနိုင်ငံထဲကို စပနာ ကျူးကျော်နိုင်ရေ နိုင်ငံကလည်း အမေရီကန်ပြည်ထောင်စုရာ ရှိပါရေ။ အယင်ကလည်း အီရတ်နိုင်ငံကို ဓါတုလက်နက်တိကို အကြောင်းပြပနာ ကျူးကျော်ဖူးပါရေ။ လစ်ဗျားနန့် ဆီးရီးယားကိုလည်း အစိုးရတိ အကူအညီ မတောင်းခံရဘဲနန့် ကျူးကျော်စစ်တိ ဝင်နွဲနိန်တုန်းပါ။ အမေရီကန်တိကရာ စစ်ပွဲ စ,လိုက်ကေ တောင်ကိုးရီးယားနိုင်ငံနန့် ဂျပန်နိုင်ငံရို့ကလည်း နောက်က ကပ်ပနာ လိုက်လားနိုင်ပါရေ။ မြောက်ကိုးရီးယားက နြူးကလီးယားဒုံးကျည်နန့် လက်တုံ့ပြန်ကေ အမေရိကတိုက်ကို မရောက်ခင် အနားမှာ ရှိရေ တောင်ကိုးရီးယားနိုင်ငံနန့် ဂျပန်နိုင်ငံရို့က ပထမဆုံး ခံလားရနိုင်ပါရေ။ ဂျပန်နိုင်ငံစွာ ကဗာမှာ ဒုတိယအကြိမ်မြောက် နြူးကလီးယားဗုံးဒဏ်ကို ခံစားလားရနိုင်ပါရေ။ ယကေလည်း အေဂု ခံရဖို့ ဗုံးဒဏ်စွာ ဒုတိယကမ္ဘာစစ်က နြူးကလီးယားဗုံးထက် အနည်းဆုံး အဆ ၁ ထောင် ပိုပြင်းနိုင်ရေဆိုစွာပါ။
ကဗာ့ ပထမဆုံး နြူးကလီးယားစစ်ပွဲလည်း ဖြစ်ပါဖို့။ ဒုတိယကဗာစစ်က အမေရီကန်တိက ဂျပန်နိုင်ငံကို တဖက်သတ် နြူးကလီးယားဗုံး ကြဲချခစွာပါ။ အပြန်အလှန် ပစ်နိုင်ရေ နြူးကလီးယားစစ်ပွဲက လက်မတင်ချေမှာ ရှိနိန်ရေ အနိန်အထားပါ။ အမေရီကန်သမ္မတ ဒိုနဲလ် ထရုန့်,ကရာ စစ်သွီးတိကြွပနာ အမိန့်တချက် ပီးလိုက်စွာနန့် ကဗာ့မြင်ကွင်းတိ အားလုံး ပြောင်းလဲလားနိုင်ရေဆိုစွာ သတိထားကတ်ပါ၊ မိတ်ဆွေရို့။
ကိုးကား – https://www.rt.com/news/411765-lavrov-korea-japan-us/
