ဒီဇင်ဘာ ၆၊ ၂၀၁၇ ခုနှစ် – ဥရောပနိုင်ငံတိ အပါအဝင် တကဗာလုံးက ဝိုင်းကန့်ကွက်နိန်ကတ်တေကြားက၊ ရွီးကောက်ပွဲ ဝင်ပြိုင်ရေခါ ကတိပီးခရေအတိုင်း အမေရီကန်သမ္မတ ဒိုနဲလ် ထရုန့်ပ်,က၊ ဂျေရုဆလင်မြို့တော်ကို အစ္စရေးနိုင်ငံမြို့တော်အဖြစ် တရားဝင် ကြေငြာလိုက်ပါရေ။ မကြာခင် အမေရီကန်သံရုံးကို ဂျေရုဆလင်မြို့တော်ကို ရွိလားဖို့လို့လည်း ပြောပါရေ။
အစ္စရေးဝန်ကြီးချုပ် နတ္တန်ယာဟု,က “အေနိန့်စွာ သမိုင်းဝင် နိန့်တနိန့်ပါ။ ဂျေရုဆလင်မြို့တော်စွာ အစ္စရေးမြို့တော် ဖြစ်နိန်စွာ နှစ်ပေါင်း ၇၀ နီးပါး ရှိပါဗျာလ်။ ဂျေရုဆလင် မြို့တော်စွာ ကျွန်တော်ရို့ မျှော်လင့်ချက်တိ၊ ကျွန်တော်ရို့ အိမ်မက်တိ၊ ဆုံမှတ်ဖြစ်ပနာ အေနိန့်ကို ရောက်ဖို့ ဆုတောင်းလာကတ်စွာ နှစ်ပေါင်း ၃ ထောင် ရှိပါဗျာလ်။ ဂျေရုဆလင်မြို့တော်စွာ ဂျူးလူမျိုးတိ မြို့တော် ဖြစ်ခစွာ လွန်ခရေ နှစ်ပေါင်း ၃ ထောင်ကပင်ပါ။” လို့ ပြောလိုက်ပါရေ။
ပါလစ္စတိုင်း အစ္စလာမ်မဲ့စ် အုပ်စု ဟားမာ့စ် ခေါင်းဆောင် အဲ့စ်မဲလ် ဟာနီယာ,ကတော့ခါ အမေရီကန်က ဂျေရုဆလင်ကို အစ္စရေးမြို့တော်အဖြစ် ဆုံးဖြတ်လိုက်စွာရေ “ပါလစ္စတိုင်းတိကို စစ်ကြေငြာလိုက်စွာနန့် တူရေ။ အားလုံး ဆူပူထကြွကတ်။” လို့ ဂါဇာမြို့တော်မှာ အေနိန့် ကြေငြာလိုက်ပါရေ။
ဂျေရုဆလင်မြို့တော်ကို တူးဖော်ကတ်စွာမှာ လွန်ခရေ နှစ်ပေါင်း ၃ ထောင်လောက်က ဂျူးမြို့တော်ဟောင်းကို တွိရပါရေ။ ယကေလည်း ကဗာ့ကုလသမဂ္ဂ ယူအန်(United Nations (UN)) ယူနစ္စကို((UNESCO) United Nations Educational, Scientific and Cultural Organization)) အပါအဝင် ဥရောပနိုင်ငံအချို့က သက်သီအထောက်အထားနန့် တွိကေလည်း ဂျူးမြို့တော်အဖြစ် အသိအမှတ် မပြုကတ်ပါ။ ဂျူးတိ အဆိုအရ ဘီစီ ၁၀ ရာစုလောက်ကပင် ဂျေရုဆလင်မြို့ ရှိနိန်ဗျာလ်လို့ ဆိုပါရေ။ အေဒီ ၇၀ မှာ ဂျေရုဆလင်မြို့က ဒုတိယဘုရားကျောင်းတော် (Second Temple in Jerusalem)ကို ရောမလူမျိုးတိ ဖျက်ဆီးပလိုက်ပနာ ဂျူးလူမျိုးတိကို ဂျေရုဆလင်မြို့တော်က မောင်းထုတ်ပလိုက်ကတ်ပါရေ။ ဂျူးလူမျိုးတိစွာ ယင်းအချိန်ကပင် နိုင်ငံမဲ့ ဖြစ်လားကတ်ပါရေ။ နောက်နှစ်ပေါင်း ၁၈၀၀ ကြာရေခါ ပါလစ္စတိုင်းလူမျိုးတိက သူရို့နိုင်ငံကို ပြန်ပီးလို့ တောင်းလာကတ်ပါရေ။ သမိုင်းမှာ ပါလစ္စတိုင်းလူမျိုးဆိုစွာ မရှိခဘဲ၊ ပတ်ဝန်းကျင်နိုင်ငံတိက လက်ရှိ ဂါဇာဒေသကို အလျှိုလျှိုရောက်လာကတ်တေ နိုင်ငံသားအမျိုးမျိုးက ပါလစ္စတိုင်းလူမျိုးဆိုပနာ ဖြစ်လာစွာပါ။ ဒုတိယကဗာစစ်အတွင်း ဥရောပနိုင်ငံတိမှာ ဂျူးလူမျိုးတိ သိန်းသန်းချီ အသတ်ခံရခါမှ ဂျူးလူမျိုးတိ ဂျေရုဆလင်မြို့ဟောင်း နိန်ရာကို ပြန်စုလာကတ်ပနာ ၁၉၄၈ ခုနှစ် မေလ ၁၄ ရက်နိန့်ခါမှ အစ္စရေးနိုင်ငံလို့ ပြန်ကြေငြာနိုင်ခစွာပါ။
သမိုင်းဟောင်းကို ဖက်တွယ်ရေ လူတိနန့် သမိုင်းသစ်ကို လုယူချင်ရေ လူတိ ရှိဆက်ဇာဖြစ်လာဖို့လဲ,ဆိုပနာ ကဗာ့ဇာတ်ခုံကိုလည်း မပြတ် စောင့်ကြည့်လေ့လာသင့်ပါရေ။
