တန်ဖိုးအကြီးဆုံး ခြစ်ပတိုကာရမ်စီ ဘဲ့တ်ကွိုင်း တန်ဖိုးစွာ ၄ ရက်မြှောက် တန်ဖိုး ကျဆင်းနိန်ပနာ၊ လွန်ခရေ ဒီဇင်ဘာလ ၁၇ ရက်နိန့်က ဘဲ့တ်ကွိုင်း ၁ ခတ်တန်ဖိုး ဒေါ်လာ ၂ သောင်း ရှိခစွာကနိန် အဂုအခါ ၃၀% အထိ ကျဆင်းလားပါရေ။
ညဇာက ဘဲ့ကွိုင်း ၁ ခတ်ကို ဒေါ်လာ ၁၄,၄၀၀ နန့် အရောင်းအဝယ် ဖြစ်ကတ်ပါရေ။ အဗြီးကေ ခြစ်ပတိုကာရမ်စီ စျီးကွက်မှာ ဘဲ့ကွိုင်း လွှမ်းမိုးမှုစွာလည်း ၃၄% ကို ရောက်လားပါရေ။ လွန်ခရေ နှစ် အေအချိန်မျိုးမှာ ခြစ်ပတိုကရမ်စီ စျီးကွက်အတွင်း ဘဲ့တ်ကွိုင်း လွှမ်းမိုးမှုစွာ ၈၅% ထိ ရှိခပါရေ။
ကွိုင်းမာ့ခ်ကတ်ကပ်(Coinmarketcap) အဆိုအရ၊ ဘဲ့တ်ကွင်း စုစုပေါင်း တန်ဖိုးစွာ ၂၀၁၈ ခုနှစ် ဂျန်နဝါရီ ၇ ရက်နိန့်မှာ ဒေါ်လာ ၂၉၄ ဘီလီယံ ရှိခစွာက ညဇာက ဒေါ်လာ ၂၄၂ ဘီလီယံကို ကျဆင်းလားရေလို့ ဆိုပါရေ။
အေပိုင် ဖြစ်ရစွာက ဘဲ့တ်ကွိုင်း ရင်းနှီးမြှပ်နှံကတ်တေ လူတိစွာ တရုတ်နန့် တောင်ကိုးရီးယား အစိုးရတိက ဘဲ့တ်ကွိုင်းကို ဖြိုခွဲဖို့ ကြိုးစားလာနိန်စွာကို ကြောက်လာနိန်ကတ်လို့လို့ ဆိုပါရေ။ အေ ၂ နိုင်ငံစွာ ဘဲ့တ်ကွိုင်း အစုရှယ်ယာ အများစုကို ပိုင်ဆိုင်ထားကတ်တေ နိုင်ငံတိပါ။ ယင်းလုပ်ရပ်တိကြောင့် ဘဲ့တ်ကွိုင်းတန်ဖိုးကို အများကြီး ထိခိုက်နိုင်ပါရေ။
ဖိုင်နန်ရှဲလ် တိုင်းစ်(Financial Times) အဆိုအရ တရုတ်အစိုးရစွာ ဘဲ့တ်ကွိုင်း ထုတ်လုပ်တေ ကင်ပျူတာတိ လျှပ်စစ်ဓါတ်အား အလွန်အကျွံ သုံးစွဲလာစွာ၊ ငွေကြေး အန္တရာယ် ရှိလာစွာ နန့် ဖေသာတိ အပြင်ကို စီးဆင်းလားစွာကို ကြောက်လာရေလို့ ဆိုပါရေ။
