ပြင်သစ်မှာ တမျက်နှာလုံး ပိတ်ထားစွာကို တရားမဝင်လို့ ကြေငြာထားကေလည်း၊ အယင်လက ပြင်သစ်တောင်ပိုင်း မြို့တော် တူလူးစ်(Toulouse)မှာ ကလိမ့်မေတယောက် ဂေါင်းမြီးခြုံပနာ လားနိန်ရေအတွက် ရဲက မျက်နှာဖွင့်ပြဖို့ အကြိမ်ကြိမ် ပြောကေလည်း မလိုက်နာဘဲ၊ ပတ်ဝန်းကျင်ကိုရာ အော်ဟစ်ပနာ အကူအညီ တောင်းခံခပါရေ။
ယင်းကလိမ့်မေကို ရဲကားထဲမှာ ဖမ်းပနာ ထည့်လိုက်တေအတွက်၊ လူ ၃၀ လောက်က ရဲကားကို ဝိုင်းလာခကတ်ပါရေ။ ရဲတိက မျက်ရည်ယိုဗုံး သုံးပနာထိ လူစု ခွဲခရပါရေ။ ၂ ရက် ဆက်တိုက် ဆူပူကတ်ပနာ၊ ကား ၁ ဒါဇင်လောက် မီးတိုက်ခံခရပါရေ။
အဂု တူလူးစ် ရာဇဝတ်မှု တရားရုံးက ယင်း ၃၇ နှစ်အရွယ် ကလိမ့်မေကို ထောင် ၆ လ ချမှတ်လိုက်ပနာ၊ ဒဏ်ကြေး ယူရို ၁၀၀ နန့် ရဲဝန်ထမ်း နှစ်ယောက်မှာ ပျက်စီးလားစွာတိအတွက် ယူရို ၁၀၀၀ လျှော်ခိုင်းပါရေ။
ဖမ်းဗြီးရေ နောက်ပိုင်းမှာ ယင်းကလိမ့်မေက ဂေါင်းမြီးခြုံထားလို့ ဖမ်းရေလို့ မပြောဘဲ၊ ရဲတိက သူ့ကို နှိက်ပနာ စော်ကားလို့ဆိုပနာ လီသံကို ပြောင်းပလိုက်ပါရေ။ အဂုတော့ခါ ပြင်သစ် မူဆလင်တိ ကြားမှာ ရဲတိက အေအချေမိကို နှိက်လည်း နှိက်သိမ့်ရေ၊ ထောင်လည်း ချသိမ့်ရေ၊ အားလုံး အေဟင့်ကို ရှုတ်ချကတ် ဆိုပနာ ကကောင်း မကျေမနပ် ဖြစ်နိန်ကတ်ပါရေ။