ဇာအကြောင်းအရာကို တိတိကျကျ ဆွေးနွေးဖို့ဆိုစွာ မဖော်ပြဘဲ၊ အိန္ဒိယဝန်ကြီးချုပ် မိုဒီ စွာ ရာရှားသမ္မတ ပူတိန် ကို တွိဖို့ ရာရှားနိုင်ငံ ဆိုချီမြို့ကို ရောက်လာပါရေ။ တရက်ကြာ အလည်အပတ် ခရီးစဉ်စွာ အလဟသတော့ မဟုတ်လောက်ပါ။ အမေရီကန် စီးပွားရေး ပိတ်ဆို့စွာနန့် တရုတ်နန့် ပတ်သတ်တေ ဘုံအမြင်ကို ဖလှယ်ဖို့လာရေလို့ အများက ယူဆကတ်ပါရေ။
အိန္ဒိယနိုင်ငံ လွတ်လပ်ရေး ရဗြီးရေလောက်ကပင်၊ ရာရှားက လက်နက်အဝယ်ဆုံးနိုင်ငံစွာ အိန္ဒိယနိုင်ငံပါ။ အဂုလည်း ၁၂ ဘီလီယံဖိုး လက်နက်ဝယ်ယူဖို့ သဘောတူထားကတ်ပါရေ။
ဗြီးခရေ စနိန်နိန့်က “ရာရှားက လက်နက်ကြီးတိ ဝယ်ဖို့စွာကို အလေးအနက် ပြန်သုံးသပ်ဖို့” အမေရီကန်ပြည်ထောင်စုက အိန္ဒိယနိုင်ငံကို သတိပီးလိုက်ပါရေ။ “ငါရို့နိုင်ငံ ကာကွယ်ရေး လိုအပ်ချက်အတွက်၊ ဇာနိုင်ငံကလည်း ဆုံးဖြတ်ဖို့ ခွင့်မပြု။ ရာရှားစွာ ငါရို့အတွက် ယုံကြည်စိတ်ချရရေ အဖော်ကောင်း။” လို့ အိန္ဒိယအထက်တန်း အရာရှိတယောက်က ပြန်ပြောလိုက်ပါရေ။
ဒေသထဲက ပြိုင်ဖက် တရုတ်နိုင်ငံအကြောင်းကိုလည်း ဆွေးနွေးကတ်ဖို့ ထင်ပါရေ။ တရုတ်နိုင်ငံက လုပ်နိန်ရေ “တလမ်းတကြော စီမံကိန်း” (One Belt One Road Project) အတွက် အိန္ဒိယနန့် တရုတ်ရို့စွာ နယ်မြေပိုင်ဆိုင်မှု တချို့အပိုင်းတိမှာ တင်းမာနိန်ကတ်ပါရေ။