ညဇာက အီရန်နိုင်ငံမှာ မှိုရိုင်း စားကတ်လို့ လူ ၇၀၀ ကျော် အဆိပ်သင့်ပနာ၊ ၉ ယောက်သီဗျာလ် အများကြီး အသည်းအသန် အနိန်အထားမှာ ရှိနိန်သိမ့်ရေလို့ ဆိုပါရေ။
နောက်ဆုံး အရေးပေါ်စရင်းအရ လူ ၇၂၁ ယောက် မှိုတောက်ပနာ၊ ၁၉၀ ကို ဆေးရုံ တင်ထားရပါရေ။ ၉ ယောက် သီပနာ၊ ၅၂၃ ယောက်ကတော့ အချိန်မီ အဆိပ်ဖြေနိုင်ခရေလို့ အီရန်နိုင်ငံ အိုင်အပ်စ်အန်အေ (ISNA) သတင်းမှာ ဖော်ပြထားပါရေ။
ပြည်နယ် ၈ ခုမှာ အနည်းဆုံး လူ ၅၀ လောက် အသည်းအသန် အနိန်အထားမှာ ရှိနိန်သိမ့်ပနာ၊ တချို့က အသည်း အစားထိုး ကုသမှရာ အသက်ရှင်ဖို့လို့ ဆိုပါရေ။
နွေဦးမိုးမှာ သဘာဝအလျှောက် ပေါက်တတ်တေ တောင်မှိုရိုင်းတိကို မစားကတ်ဖို့၊ လမ်းဘေးမှာ ရောင်းရေ မှိုတိကို မဝယ်ကတ်ဖို့ အီရန်ကျန်းမာရေးဝန်ကြီးဌာနက ညွှန်ကြားထားပါရေ။ မှိုစားလို့ ဂေါင်းမှုး၊ အော့အန်၊ ဝမ်းလား၊ ဝမ်းနာ ကေ အရည်များများ သောက်ပနာ၊ ကျန်းမာရေးဌာနကို ချက်ချင်း အရောက်လာကတ်ဖို့လည်း ညွှန်ကြားထားပါရေ။
