တရားဝင် ကိုယ်ဝန်ဖျက်ချခွင့် ပီး၊ မပီး ဆိုစွာကို၊ အိုင်ယာလန်နိုင်ငံသားတိ နက်ဖြန်ခါ မဲပီး ဆုံးဖြတ်ကတ်ဖို့ ဖြစ်ပါရေ။ အစဉ်အဆက် ကတ်သိုလဲ့စ် ဘာသာကို အလေးထားရေ၊ ရှိရိုးစွဲ အိုင်ယာလန်နိုင်ငံသားတိ၊ စည်းလျှော့ကမ်းလျှော့ နိန်ချင်ရေ လဲ့ဘ်ရယ်သမားတိ ဖက်ကို ယိမ်းပါလားဖို့လား ကြည့်ကတ်ပါမေ။
၁၉၈၃ ခုနှစ်မှာ အမေရိကနန့် ဥရောပမှာ ကိုယ်ဝန် တရားဝင် ဖျက်ချခွင့်ပီးဖို့၊ ဘဝရသကို အလီးပီး လှုပ်ရှားရေ လူတိ အားသန်လာရေခါ၊ ယင်းပိုင် ဖြစ်လတ်မေကြောက်လို့ တနိုင်ငံလုံး ဆန္ဒခံယူပွဲလုပ်ဗျာလ်၊ အိုင်ယာလန်နိုင်ငံသား ၆၆% မဲအနိုင်နန့် တရားဝင် ကိုယ်ဝန်ဖျက်ချခွင့်ကို ပိတ်ပင်ဖို့ တိုင်းပြည်အခြေခံဖွဲ့စည်းအုပ်ချုပ်ပုံမှာ ပြဌာန်းခကတ်ပါရေ။ အဂု ယင်း ၈ ကြိမ်မြောက် အိုင်ယာလန်နိုင်ငံ အခြေခံဖွဲ့စည်းအုပ်ချုပ်ပုံကို ပြန်ပြင်ဖို့ လူထုဆန္ဒမဲ ပီးကတ်ဖို့စွာပါ။
ဥရောပသမဂ္ဂထဲက မော်လ်တာ (Malta) နိုင်ငံအပါအဝင်၊ တရားဝင် ကိုယ်ဝန်ဖျက်ချခွင့် မပီးရေ နိုင်ငံက တကဗာလုံးမှာ ၆ နိုင်ငံရာ ကျန်ပါဗျာလ်။
၂၀၁၅ ခုနှစ်မှာတော့ခါ အိုင်ယာလန်နိုင်ငံစွာ ပေါ်ပြူလာမဲ အနိုင်နန့် ကဗာ့ပထမဆုံး လိင်တူ လက်ထပ်ခွင့်ပြုရေ နိုင်ငံ ဖြစ်လာခပါရေ။
