စပိန်ဝန်ကြီးချုပ် လာဘ်စားမှု အရှုပ်အရှင်းတိနန့် လွတ်တော်မှာ အယုံအကြည်မဲ့ မဲနန့် ဖြုတ်ချခံရ

Spain's former Prime Minister Mariano Rajoy © Sergio Perez : Reuters
Spain's former Prime Minister Mariano Rajoy © Sergio Perez : Reuters

စပိန်နိုင်ငံက ပြည်သူ့ပါတီထဲမှာ၊ လာဘ်စားမှု အရှုပ်အရှင်းတိ ပေါ်ထွက်လာရေအတွက်၊ ပါတီဂေါင်းဆောင် စပိန်နိုင်ငံ ဝန်ကြီးချုပ် မာရီယာနို ရာဂျွိုင်း (Mariano Rajoy) ကို အယုံအကြည် မရှိဗျာလ်ဆိုပနာ၊ လွတ်တော်ထဲမှာ မဲပီးကတ်တေအတွက်၊ စပိန်ဝန်ကြီးချုပ် နိန်ရာက ပြုတ်ကျလားပါရေ။ ဆိုရှယ်လစ်ပါတီဂေါင်းဆောင် ပီဒြို ဆန်ချပ်ဇ် (Pedro Sanchez) က စပိန်ဝန်ကြီးချုပ် ဖြစ်လာပါရေ။

ဗြီးခရေ ကြာသပနိန့်မှာ၊ ပြည်သူ့ပါတီကို အယုံအကြည်မရှိလို့ စပနာ ပြောလာစွာက ဆိုရှယ်လစ် အလုပ်သမားတိ ပါတီ (Socialist Workers’ Party (PSOE)) ပါ။ ကာတာလန်ပါတီတိနန့် လက်ယာပါတီ ပိုဒီမို့စ် (Podemos) ကလည်း ထောက်ခံလာပါရေ။ အလယ်လမ်းပါတီ စီဒါဒါနိုစ် (Ciudadanos) က မဲပီးဖို့ မတက်ရောက်ပါ။

ညဇာက စပိန်လွတ်တော်ထဲမှာ ပြည်သူ့ပါတီဂေါင်းဆောင်ကို ဆက်ပနာ ယုံကြည်မှု ရှိ၊ မရှိ လွတ်တော်ထဲမှာ မဲခွဲဆုံးဖြတ်ကတ်စွာမှာ၊ မဲ ၁၈၀ က ယုံကြည်မှု မရှိ၊ ၁၆၉ မဲက ဆက်ပနာ ယုံကြည်ရေလို့ ပီးပနာ၊ ၁ မဲက မတက်ရောက်ပါ။ ယုံကြည်မှု မရှိရေ မဲက များလားရေအတွက် ပြည်သူ့ပါတီဂေါင်းဆောင် ရာဂျွိုင်း ဝန်ကြီးချုပ်နိန်ရာက ပြုတ်ကျလားပါရေ။

မဲခွဲ မဆုံးဖြတ်ခင်ထိ၊ ရာဂျွိုင်း က ဝန်ကြီးချုပ်နိန်ရာက ဆင်းပီးဖို့ ငြင်းဆန်ခပါရေ။ အယင်တပတ်က ပြည်သူ့ပါတီ အရာရှိ အင်ဒန်များများ ဖေသာအလွှဲသုံးစား လုပ်မှု၊ လိမ်လည်မှုတိနန့် ထောင်ချခံရပါရေ။ ၁၉၉၉ ခုနှစ်ကနိန် ၂၀၀၆ ခုနှစ် အာဏာရနိန်ခရေ အချိန်အတွင်း၊ ကင်းထရတ်တိ ရအောင် ပါတီက ဖိအားပီးစွာတိ ရှိခရေအတွက်၊ ပြည်သူ့ပါတီကို ယူရို ၂ သိန်း ၄ သောင်း ဒဏ်ရိုက်ခံရပါရေ။ ပါတီဝင်တိကို လာဘ်ထိုးစွာတိ ပေါ်လာရေအတွက် ပါတီဝင် ၂၉ ယောက်နန့် စီးပွားရေးသမားတယောက် ထောင်ချခံရပါရေ။ ပါတီဘဏ္ဍာရေးမှူးက ထောင် ၃၃ နှစ် အချခံရပါရေ။ ထွက်ပေါ်လာရေ လျှို့ဝှက် အပီးအယူ စာရွက်စာတမ်းတိမှာ ရာဂျွိုင်း နာမေတိ ပါနိန်ကေလည်း၊ သူ ဖေသာ လက်ခံစွာ လုံးဝ မရှိလို့ ရာဂျွိုင်းက ငြင်းဆိုပါရေ။ ယကေလည်း ပါတီကို လူတိ ယုံကြည်မှု နည်းလာပါရေ။ ၂၀၁၁ ခုနှစ်က ရွီးကောက်ပွဲမှာ တဖတ်သတ် အနိုင်ရခရေ ပါတီစွာ၊ ၂၀၁၅ ခုနှစ်မှာ မဲ ၃ ပုံ ၁ ပုံ ယော့လားပါရေ။

ပြည်သူ့ပါတီကို လူမုန်းများလာစွာက၊ ၂၀၁၇ ခုနှစ် ကာတလန် လွတ်လပ်ရေးကိစ္စကို ကြကြမ်းတတမ်း ကိုင်တွယ်ခစွာတိလည်း ပါရေလို့ ဆိုပါရေ။