ကဗာ့ဖလား ဂျာမဏီ နိုင်ဖို့များ – ဂျာမန်ဘဏ် သုံးသပ်တေ လူတိ ဆို

© Maxim Shemetov : Reuters
© Maxim Shemetov : Reuters

၂၀၁၈ ခုနှစ် ဖီဖာ ကဗာ့ဖလား ဘောလုံးပြိုင်ပွဲ ကျင်းပဖို့ ၁ ပတ်အလိုမှာ၊ ဂျာမန် ကင်းမာ့ဇ်ဘဏ်ခ် (Commerzbank) က၊ သူရို့ အမျိုးသားအသင်း ဗိုလ်ဆွဲပနာ၊ သရဖူယူလာလိမ့်မေလို့ ဟောကိန်းထုတ်လိုက်စွာပါ။

ဂျာမဏီက ဒုတိယ အကြီးဆုံး ငွေချီးဘဏ်မှာ ရှိရေ စီးပွားရေးပညာရှင်တိက တွက်ချက်ပြစွာပါ။ ဂျာမဏီနိုင်ငံအသင်း နိုင်ဖို့က ၁၈% ရှိရေ ဆိုပါရေ။ ဘရာဇီးနိုင်ငံအသင်းက နိုင်နိုင်ခြေ ၁၃% အောက်မှာ ရှိနိန်ပနာ၊ စပိန်၊ အာဂျင်တီးနား၊ ပြင်သစ် ရို့က နောက်မှာ တန်းစီနိန်ကတ်ပါရေ။ အင်္ဂလန်နိုင်ငံအသင်း နိုင်နိုင်ခြေက ၆.၂% ရာ ရှိရေ ဆိုပါရေ။

ကင်းမာ့ဇ်က ပညာရှင်တိစွာ ဘောလုံးနောက်ခံ သမိုင်း၊ သွင်းထားရေ ဂိုးအရေအတွက်၊ အယင် ကဗာ့ဖလားက အခြေအနေ၊ အတွိအကြုံ၊ ကဗာ့အဆင့်၊ ကဗာ့မှတ်တမ်း၊ အစရှိစွာတိကို အခြေခံဗျာလ်၊ ဘောလုံးပွဲ ၁ ပွဲကို နမူနာပုံစံပေါင်း ၁ သောင်းနန့် တွက်ချက်ထားရေလို့ ဆိုပါရေ။

အေဟောကိန်းရာ မှန်ဖို့ဆိုကေ ဂျာမဏီနိုင်ငံ ၅ ကြိမ်မြောက် ကဗာ့ဖလားပိုင်ရှင် ဖြစ်လာနိုင်ပါရေ။ ဘရာဇီးနိုင်ငံနန့် အဆင့် တူလားပါဖို့။

အယင်လက ဆွစ်ဇာလန်နိုင်ငံ ဘဏ် ယူဘီအပ်စ် (UBS) ကလည်း ဂျာမဏီနိုင်ငံအသင်း နိုင်ဖို့လို့ ဟောကိန်းထုတ်ထားပါရေ။ အိန့်ဆ်ဘရက် တက္ကသိုလ် (University of Innsbruck) ကတော့ နောက်ဆုံးပွဲမှာ ဂျာမဏီ – ဘရာဇီး တွိဖို့လို့ ဟောကိန်းထုတ်ထားပနာ၊ ဘရာဇီးက နိုင်နိုင်ခြေ ၁၆.၆% နန့် ဂျာမဏီ နိုင်နိုင်ခြေ ၁၅.၈% ရှိရေလို့ ဆိုပါရေ။

Leave a Reply

Please Login to comment
  Subscribe  
Notify of