၂၀၁၇-၂၀၁၈ ပညာသင်နှစ် တက္ကသိုလ်ဝင်တန်း စာမေးပွဲမှာ၊ ရခိုင်ပြည်နယ်က ၆ ဘာသာဂုဏ်ထူးရှင် ၁၇ ဦးထွက်ပေါ်ခစွာမှာ၊ စစ်တွေခရိုင်က ၁၃ ဦး ပါဝင်ရေလို့ ရခိုင်ပြည်နယ် ပညာရေးမှူးရုံး စာရင်းဇယားအရ သိရပါရေ။
ခရိုင်အလိုက် ဂုဏ်ထူးရကျောင်းသားတိမှာ စစ်တွေခရိုင်က ၆ ဘာသာ ၁၃ ဦး၊ ၅ ဘာသာ ၂၀ ဦး၊ ၄ ဘာသာ ၂၃ ဦး၊ ၃ ဘာသာ ၃၃ ဦး၊ ၂ ဘာသာ ၆၆ ဦးနန့် ၁ ဘာသာ ၂၂၃ ဦးဖြစ်ပါရေ။
သံတွဲခရိုင်က ဂုဏ်ထူးရ ကျောင်းသားတိမှာ ၆ ဘာသာ ၃ ဦး၊ ၅ ဘာသာ ၂၀ ဦး၊ ၄ ဘာသာ ၁၁ ဦး၊ ၃ ဘာသာ ၃၁ ဦး၊ ၂ ဘာသာ ၅၂ ဦးနန့် ၁ ဘာသာ ၃၀၆ ဦးဖြစ်ပါရေ။
ကျောက်ဖြူခရိုင်က ဂုဏ်ထူးရကျောင်းသားတိမှာ ၆ ဘာသာ ၁ ဦး၊ ၅ ဘာသာ ၇ ဦး၊ ၄ ဘာသာ ၁၀ ဦး၊ ၃ ဘာသာ ၁၇ ဦး၊ ၂ ဘာသာ ၅၄ ဦးနန့် ၁ ဘာသာ ၂၁၁ ဦးဖြစ်ပါရေ။
မြောက်ဦးခရိုင်က ဂုဏ်ထူးရကျောင်းသားတိမှာ ၅ ဘာသာ ၃ ဦး၊ ၄ ဘာသာ ၃ ဦး၊ ၃ ဘာသာ ၁၈ ဦး၊ ၂ ဘာသာ ၃၇ ဦးနန့် ၁ ဘာသာ ၂၀၈ ဦးဖြစ်ပါရေ။
မောင်တောခရိုင်က ဂုဏ်ထူးရကျောင်းသားတိမှာ ၅ ဘာသာ ၄ ဦး၊ ၄ ဘာသာ ၅ ဦး၊ ၃ ဘာသာ ၅ ဦး၊ ၂ ဘာသာ ၆ ဦးနန့် ၁ ဘာသာ ၃၄ ဦးဖြစ်ပါရေ။
ရခိုင်တစ်ပြည်နယ်လုံး အတိုင်းအတာနန့် ဂုဏ်ထူးရကျောင်းသားတိမှာ ၆ ဘာသာ ၁၇ ဦး၊ ၅ ဘာသာ ၅၄ ဦး၊ ၄ ဘာသာ ၅၂ ဦး၊ ၃ ဘာသာ ၁၀၄ ဦး၊ ၂ ဘာသာ ၂၁၅ ဦးနန့် ၁ ဘာသာ ၉၈၂ ဦးဖြစ်ပနာ၊ စုစုပေါင်း ဂုဏ်ထူးရှင် ၁၄၂၄ ဦးဖြစ်တေလို့ သိရှိရပါရေ။
စစ်တွေမြို့က ၆ ဘာသာ ဂုဏ်ထူးရှင် မခိုင်ဝေဝေကျာ်က “သမီးချေက ၆ ဘာသာဂုဏ်ထူးနဲ့ အောင်မြင်ပါရေ။ သမီးချေ အေနိ ကကောင်း ဝမ်းသာပါရေ။ တနှစ်လုံး ကြိုးစားခရစွာတိလည်း အားလုံးအောင်မြင်ပနာ ၆ ဘာသာလည်း ပါရေဆိုခါကကောင်း ဝမ်းသာပါရေ။ တက္ကသိုလ်နှစ်ခုတော့ မှန်းထားပါရေ။ နိုင်ငံခြားဘာသာ တက္ကသိုလ်က အင်္ဂလိပ်စာ မေဂျာလည်း ယူချင်ပါရေ။ အပြီးကေ ဆီးတက္ကသိုလ်လည်း တက်ချင်ပါရေ။ ယင်းချင့်တိကို မိဘတိနန့် တိုင်ပင်ပြီးခါမှ အသေအချာ ဆုံးဖြတ်ရပါဖို့” လို့ ပြောပါရေ။
အေနှစ်မှာ စစ်တွေမြို့ ပန်းပျိုးလက် ကိုယ်ပိုင်အထက်တန်းကျောင်းကလည်း ၆ ဘာသာ ဂုဏ်ထူးရှင် တယောက် ထွက်ရှိခရေလို့ သိရပါရေ။
ကိုးကား – စံမောင်သန်း၊ စစ်တွေ၊ နိရဉ္စရာ သတင်းဌာန၊ ဇွန် ၆