ထရုန့်ပ် တဖက် – တကဗာလုံးက တဖက် (ဝါ) G7 အစည်းအဝေးက ကျော်ကြားနိန်ရေ ဓါတ်ပုံ ၁ ပုံ

bundeskanzlerin : Instagram
bundeskanzlerin : Instagram

ဗြီးခရေ ရက်ပိုင်းက၊ ကန်နေဒါနိုင်ငံမှာ စက်မှုဖွံ့ဖြိုးဗြီး ၇ နိုင်ငံ (G7) ထိပ်သီးဂေါင်းဆောင်တိ အစည်းအဝေး ကျင်းပနိန်ချိန်၊ ဂျာမန်အစိုးရ သတင်းထောက် ဂျက်ဆကို ဒန်ဇဲလ် (Jesco Denzel) ရိုက်ထားရေ အထက်က ဓါတ်ပုံက လူတိကြားမှာ ဟိုးလေးတကျော် ဖြစ်နိန်ပနာ၊ အမျိုးမျိုး ဝေဖန်သံမျိုးတိ ထွက်နိန်ပါရေ။

ပုံထဲမှာ အမေရီကန်ပြည်ထောင်စု သမ္မတ ဒိုနဲလ်ဒ် ထရုန့်ပ် (Donald Trump) လက်ပိုက်ထိုင်နိန်စွာကို၊ ဂျာမဏီနိုင်ငံ အဓိပတိက စပွဲထက်မှာ လက်ထောက်ပနာ ငုံ့ကြည့်နိန်ခါ၊ တခြား ကဗာ့ဂေါင်းဆောင်တိက ဝိုင်းထားကတ်တေ ပုံပါ။

တချို့က တကဗာလုံး ဂေါင်ဆောင်တိက တဖက်၊ အမေရီကန်သမ္မတက တဖက် ဖြစ်နိန်ရေ ပုံမျိုးလို့ ဝေဖန်ကတ်ပါရေ။ အောက်မှာ ထရုန့်ပ် ကို လူဆိုးကြီးလို့ ကျန်နိုင်ငံ့ဂေါင်းဆောင် ၆ ယောက်က တညီတညွတ်တည်း သဘောတူနိန်ကတ်တေလို့၊ ကာတွန်းဆရာတယောက်က သရော်ထားရေ ပုံပါ။

တချို့က အမေရီကန်ပြည်ထောင်စု သမ္မတဟောင်း အိုဘားမား ပုံစံနန့် ကွာခြားပုံကို ထောက်ပြကတ်ပါရေ။

တချို့ကလည်း ၁၇၇၆ ခုနှစ်မှာ၊ အမေရီကန်ပြည်ထောင်စု လွတ်လပ်ရေး ကြေငြာစာတမ်းကို ကင်ဂရက်စ် ဥက္ကဌ ဂျွင် ဟန်းကော့ခ် (John Hancock) လက်မှတ်ထိုးခါ ထိုင်နိန်ပုံနန့် နှိုင်းကတ်ပါရေ။

ဇာဖြစ်ဖြစ် လူ တယောက် ပြုမူနိန်ထိုင်ပုံက၊ တခါတလီမှာ ဘလောက်ထိ တာလားလေဆိုစွာ သတိပြုမိကတ်ဖို့ ထင်ပါရေ။