စင်္ကာပူနိုင်ငံမှာ မြောက်ကိုးရီးယားဂေါင်းဆောင် ကင် ဂျွင်အင်း နန့် တွိဆုံဗြီးရေ နောက်မှာ၊ အမေရီကန်ပြည်ထောင်စုသမ္မတ ဒိုနဲဒ် ထရုန့်ပ် က တောင်ကိုးရီးယားနိုင်ငံနန့် ပူးတွဲ စစ်ရေးလေ့ကျင့်နိန်စွာတိကို ရပ်ဆိုင်းလိုက်ဖို့ဗျာလ်လို့ ကြေငြာလိုက်ပါရေ။
ယင်းစစ်ရေးလေ့ကျင့်ပွဲတိကို စစ်ကဇာတ်ပွဲတိ (war games) လို့ ထရုန့်ပ် က သုံးလားရေပိုင်၊ ယင်းလေ့ကျင့်ရေးမှာ ပါဝင်ရေ ဗုံးကြဲလေယာဉ်တိ ဂူအမ် (Guam) ကျွန်းက လာရရေအတွက်၊ အမေရီကန်ပြည်ထောင်စုအတွက် စရိတ်စက ကကောင်း ကြီးရေလို့ ဆိုပါရေ။ တောင်ကိုးရီးယားနိုင်ငံက အမေရီကန်စစ်အခြေစစ်စခန်းမှာ လုပ်တေ ယင်းစစ်ရေးလေ့ကျင့်မှုစွာ တဖက်ကိုလည်း ဒေါသဖြစ်စီပနာ၊ တုံ့ပြန်မှုတိ ရှိဇီရေလို့ ဆိုပါရေ။ “နောက်ပိုင်း အမေရီကန်ပြည်ထောင်စုကို ပြန်ရုတ်သိမ်းလားဖို့ အခြေအနေ ရှိပါရေ။ အဂု လောလောဆယ်တော့ ညီမျှအောင် လုပ်ရဖို့စွာ မဟုတ်သိမ့်ပါ။ ယကေလည်း စစ်ကဇာတ်ပွဲတိ အားလုံးကိုတော့ခါ ရပ်လိုက်ပါဖို့ဗျာလ်။” လို့ ထရုန့်ပ် က ပြောလားပါရေ။
၅ နာရီကြာ တွိဆုံမှု အဗြီးမှာ၊ သူ့တိုင်းသူပြည်သားတိအတွက် ရဲရဲရင့်ရင့် ရှိကို တိုးလှမ်းလာရေ ကင် ကို ထရုန့်ပ် က ကကောင်း ကျေးဇူးတင်လားပါရေ။
တောင်ကိုးရီးယားနိုင်ငံ အမေရီကန်စစ်အခြေစိုက်စခန်း (USFK) ကတော့ခါ၊ လောလောဆယ် ပူးတွဲ စစ်ဆင်ရေးတိနန့် ပတ်သတ်လို့၊ ပင်တဂွန် စစ်ဌာနချုပ် (Pentagon) က တခု ညွှန်ကြားချက်လည်း မရသိမ့်လို့၊ စစ်အခြေစိုက်စခန်း ပြောခွင့်ရပုဂ္ဂိုလ် ဗိုလ်မှူးကြီး ဂျက်နီဖာ လိုဗတ် (Lt. Col. Jennifer Lovett) က အတည်ပြုလားပါရေ။
