နိုင်ငံတဝှမ်း မူးယစ်ဆေးဝါးနန့် ရာဇဝတ်မှုတိ တိုက်ဖျက်ရေးအတွက် ကျေးရွာဥက္ကဌ အယောက်ပေါင်း ၄ သောင်း ၂ ထောင်ကို သေနတ်တိ အလကားပီးလားဖို့လို့ ဖီလစ်ပိန်းစ်နိုင်ငံ ပြည်ထဲရေးဝန်ကြီးက ကြေငြာလိုက်ပါရေ။
ကျေးရွာဥက္ကဌတိကို ဖီလစ်ပိန်းစ်မှာ ဘရမ်ဂေ ဂေါင်းဆောင်တိ (barangay captains) လို့ ခေါ်ပနာ၊ သူရို့ကို လက်ကိုင်သေနတ်တိုတိ အစိုးရက အလကား ထုတ်ပီးလားဖို့လို့၊ ညဇာက ပြောလားပါရေ။ သူရို့ ကြိုက်တေ သေနတ်ကို ဝယ်ကိုင်ချင်ကေလည်း ထောက်ခံမှု ပီးလားဖို့လို့ ဆိုပါရေ။
“သူရို့ တာဝန်က မူးယစ်ဆေးဝါးနန့် ရာဇဝတ်မှုတိကို တိုက်ရဖို့စွာပါ။ ရာဇဝတ်သားတိနန့် ဆက်နိန်လို့ကတော့ခါ၊ အပစ်ခံရဖို့စွာက သူရို့ ကိုယ်တိုင် ဖြစ်လားပါဖို့။” လို့ ပြည်ထဲရေးဝန်ကြီးဌာန အတွင်းဝန် မာတိန် ဒီနို (Martin Dino) က ရိုက်တာစ် (Reuters) သတင်းဌာနကို ပြောလားပါရေ။
အတိုက်အခံတိကတော့ခါ အစိုးရက အေပိုင် ဆုံးဖြတ်လိုက်စွာကို ဆန့်ကျင်ကတ်ပါရေ။
“အားလုံးကို သတ်ရဖို့လို့ စိတ်ထဲကို ဝင်လားကေတော့ခါ၊ အေနိုင်ငံတခုလုံး သတ်ကွင်းပြင်ကြီး ဖြစ်လီပါဖို့ဗျာလ်။” လို့ အတိုက်အခံ ဥပဒေပြုအမတ် ဂေရီ အလတ်ဂျာနို (Gary Alejano) က ပြောလားပါရေ။