အမေရီကန်ပြည်ထောင်စုက သံနန့် အလူမီနီယံ တင်သွင်းစွာတိမှာ အခွန်တိုးကောက်လိုက်တေအတွက်နန့်၊ အိန္ဒိယနိုင်ငံက တန်ပြန်အနိန်နန့်၊ အမေရီကန်ပြည်ထောင်စုက တင်သွင်းကုန် အမျိုးအစား ၃၀ ကို ၅၀% အထိ အခွန် တိုးကောက်လိုက်ပါရေ။
အမေရီကန်ပြည်ထောင်စုက တင်သွင်းကုန်ဖြစ်တေ ၈၀၀ စီစီ (800cc) နန့် အထက်၊ မော်တော်ဆိုင်ကယ်နန့် ဆိုင်ကယ်ပစ္စည်းတိမှာ အခွန် ၅၀%၊ ပန်းသီးတိမှာ အခွန် ၂၅%၊ အခွန်မာ အစိတိမှာ အခွန် ၂၀% ကောက်လားဖို့လို့ ကဗာ့ကုန်သွယ်ရေးအဖွဲ့ (World Trade Organization) ကို အိန္ဒိယနိုင်ငံက ပို့ရေ စာမှာ ဖော်ပြထားပါရေ။
စုစုပေါင်း အမေရီကန်ဒေါ်လာ သန်း ၂၄၀ ဖိုး၊ ပိုပနာ အခွန်ကောက်လားဖို့လို့ ဆိုပါရေ။ အေပမာဏစွာ အမေရီကန်ပြည်ထောင်စုက သံနန့် အလူမီနီယံကို အခွန်တိုးကောက်လိုက်လို့၊ အိန္ဒိယနိုင်ငံ နစ်နာလားရေ ပမာဏနန့် အတူတူလောက် လားကျပါရေ။
ဗြီးခရေ အပတ်က ကန်နေဒါနိုင်ငံမှာ တွိဆုံကတ်တေ စက်မှုအင်အားကြီး ၇ နိုင်ငံ၊ ဂျီ ၇ (G7) တွိဆုံပွဲမှာ “ကျွန်တော် အိန္ဒိယကို နမူနာ ပြပါမေ။ တချို့ အမေရီကန်ပြည်ထောင်စုထုတ် ပစ္စည်းတိကို အိန္ဒိယမှာ အခွန် ၁၀၀% ထိ ကောက်ပါရေ။ ကျွန်တော်ရို့က အိန္ဒိယသွင်းကုန်တိမှာ တပြားလည်း အခွန် မကောက်ပါ။ ကျွန်တော်ရို့ အေပိုင် ဆက်မလုပ်နိုင်ပါဗျာလ်။ ကျွန်တော်ရို့စွာ လူတိုင်း လုစွာခံနိန်ရရေ စုဗူးနန့် တူနိန်ပါရေ။” လို့ အမေရီကန်ပြည်ထောင်စုသမ္မတ ဒိုနဲဒ် ထရုန့်ပ် က နိုင်ငံခြားတိုင်းပြည်တိနန့် ကုန်သွယ်မှာရေး မမျှမတ ဆက်ဆံခံရရေလို့ ပြောလားပါရေ။