ကန်နေဒီယန်း လွတ်တော် နှစ်ရပ်လုံးက ဆီးခြောက်ပင်ကို စိတ်အပန်းဖြေခွင့်နန့် အိမ်မှာ စိုက်ပျိုးစွာ အပါအဝင်၊ စိုက်ပျိုးထုတ်လုပ်ပိုင်ခွင့်ကို တရားဝင် အတည်ပြုလိုက်ပါဗျာလ်။
ညဇာက ရွီးကောက်ခံ မဟုတ်တေ ဆီးနိတ်လွတ်တော်က ဆီးခြောက်ပင်အတ်ဥပဒေ (Cannabis Act) ကို ထောက်ခံမဲ ၅၂ မဲ၊ ကန့်ကွက်မဲ ၂၉ မဲနန့် အတည်ပြုလိုက်စွာပါ။ ဥပဒေ ဖြစ်လာဖို့အတွက်၊ သမားရိုးကျ နည်းအတိုင်း ဘုရင်မ သဘောတူညီချက် ယူရပါဖို့သိမ့်။
ကန်နေဒါနိုင်ငံစွာ အနောက်နိုင်ငံတိအထဲမှာ ပထမဆုံး ဆီးခြောက်ပင်ကို တရားဝင် အသုံးပြုခွင့်ပီးရေနိုင်ငံပါ။ ကဗာမှာ တနိုင်ငံတည်း ဆီးခြောက်ကို တရားဝင် အသုံးပြုခွင့်ပီးထားရေ နိုင်ငံက လွန်ခရေနှစ် ဂျူလိုင်လက စခရေ ဥရုဂွေးနိုင်ငံ (Uruguay) ပါ။
အမေရီကန်ပြည်ထောင်စုက ပြည်နယ် ၉ ခုမှာ ဆီးခြောက်ကို တရားဝင် သုံးစွဲခွင့်ပီးထားပနာ၊ ပြည်နယ် ၂၉ ခုမှာတော့ခါ ဆီးဝါးအဖြစ် အသုံးပြုခွင့် ပီးထားပါရေ။
ကန်နေဒါနိုင်ငံမှာ ၁၉၂၃ ခုနှစ်က စပနာ၊ ဆီးခြောက်သုံးစွဲစွာကို ရာဇဝတ်ပြစ်မှုလို့ သတ်မှတ်ခပါရေ။ ယကေလည်း ၂၀၀၀ ခုနှစ်လောက်ကပင် ဆီးဝါးအဖြစ် တရားဝင် အသုံးပြုခွင့် ပီးထားပါရေ။