လ ခရီးစဉ် လက်မှတ်တိ ၂၀၁၉ ခုနှစ်မှာ စ,ရောင်းဖို့

© Simone Brandt / Global Look Press
© Simone Brandt / Global Look Press

အာမေဇုန်(Amazon)ကို တီထောင်ရေ ဂျပ်ဖ် ဘီးဇိုးစ်(Jeff Bezos)စွာ လကဗာ ခရီးစဉ်လက်မှတ်တိကို ၂၀၁၉ ခုနှစ် အစောပိုင်းကပင် စ,ပနာ ရောင်းလားလိမ့်မေလို့ သူပိုင်ရေ ဘလူး အော်ရဂျိန်(Blue Origin)က အတည်ပြု ပြောကြားလားပါရေ။

ပထမဆုံး လကဗာ ခရီးသယ်တိကို သယ်ယူလားဖို့၊ နယူး ချီးပါ့ဒ်(New Shepard) အာကာသယာဉ်စွာ၊ ၂၀၁၉ ခုနှစ်မှာ စပနာ ပျံသန်းလားဖို့လို့၊ ဘလူး အော်ရးဂျိန် အကြီးတန်း ဒုဥက္ကဌ၊ ဘော့ဘ် မိုင်ယာဆင်(Rob Meyerson)က ပြောပါရေ။ လက်မှတ် ၁ စောင်ကို ဘလောက်ကျဖို့ဆိုကရေ အသေးစိတ်ကိုတော့ခါ၊ မကြေငြာသိမ့်ပါ။

ဘလူး အော်ရဂျိန်ကို ၂၀၀၀ ခုနှစ်မှာ စတင်တည်ထောင်ပနာ၊ ကုန်ကျစရိတ်တိကို အာမေဇုန်ကို တီထောင်ရေ၊ ဂျပ်ဖ် ဘီးဇိုးစ်က ကျခံပါရေ။ အာကာသခရီးစဉ် ကုမ္ပဏီတိမှာ တဲလ်ဆာ(Telsa) ကားကုမ္ပဏီကို တည်ထောင်ရေ၊ အီလွင် မာ့ချ်(Elon Musk) ပိုင်ရေ၊ ဆပဲ့ချ် အိက်ချ် (SpaceX) ကုမ္ပဏီနန့် ပြိုင်ဖက်ပါ။

ဆပဲ့ချ် အိက်ချ်ကတော့ အာကာသယာဉ်မှူးတိနန့် ကုန်တိုက်တာတိကို နိုင်ငံတကာ အာကာသစခန်း(International Space Station (ISS))ကို ပို့နိန်ပါဗျာလ်။ ဘလူး အော်ရဂျိန် နယူး ချီးပါ့ဒ်ကတော့ခါ ဒုံးပျံစင်ထက်မှာရာ ရှိနိန်ပါသိမ့်ရေ။

နယူး ချီးပါ့ဒ် အာကာသယာဉ်က ခရီးသယ်တိကို ၆၀ ကီလိုမီတာ(60km = 37 miles) အမြင့်ကို ပို့နိုင်ရေလို့ ဆိုပါရေ။ ယင်းအမြင့်ကို ရောက်လားကေ၊ ခရီးသယ်တိစွာ ကဗာ့ဆွဲအားမဲ့ ကိုယ်အလီးချိန်ကို မိနစ်အင်တန်ကြာ ခံစားရနိုင်ပါရေ။

နောက်ထပ် အာကာသခရီးစဉ် ပြိုင်ဖက်ကုမ္ပဏီတခုက၊ ရဲ့ချ်ချဒ် ဘရန်ဆင်(Richard Branson) ပိုင်ရေ၊ ဘိုင်ဂျိန် ဂါလတ်တဲ့(Virgin Galactic)ကုမ္ပဏီပါ။ ဘိုင်ဂျိန် ဂါလတ်တဲ့ အာကာသခရီးစဉ်အတွက် လက်မှတ် အစောင် ၆၅၀ ကို ရောင်းထားဗျာလ်လို့ ဆိုပါရေ။ ယင်းခရီးစဉ်လည်း ၂၀၂၁ ခုနှစ်လောက်မှရာ စတင်ဖို့လို့ ယူဆရပါရေ။

 

Leave a Reply

Please Login to comment
  Subscribe  
Notify of