“ဘုရားသခင်နန့် တွဲပနာ၊ ဓါတ်ပုံ ၁ ပုံ ရိုက်ယူခ၊ ငါ အဂု သမ္မတ ရာထူးက ထွက်ပီးမေ။” ဒူတာတီ ပြော

© Romeo Ranoco / Reuters
© Romeo Ranoco / Reuters

ခရစ်ယန်တယောက်ယောက်ကရာ၊ ဘုရားသခင် အမှန်တကယ် ရှိရေဆိုစွာကို သက်သေပြနိုင်ကေ၊ သမ္မတရာထူးက အဂု ချက်ချင်း ဆင်းပီးဖို့လို့၊ ဖိလစ်ပိန်းသမ္မတ ဒူတာတီ က ပြောလိုက်ပါရေ။ အယင်တလောက၊ ဘုရားသခင်ကို အလကားကောင်လို့ ပြောလိုက်လို့၊ ဘာသာရေးအသိုင်းအဝိုင်းတိက မာန်ပါလို့ မဆုံးကတ်သိမ့်ခင်၊ နောက်ထပ် ပြောလိုက်စွာပါ။

ဗြီးခရေ သောက်ကြာနိက စကားလွတ် ပြောတတ်တေ ဖိလစ်ပိန်းသမ္မတ ဒူတာတီက၊ “တယောက်ယောက်က နိဗ္ဗာန်ကို ကိုယ်တိုင် ရောက်ဖူးရေ၊ ဘုရားသခင်နန့် စကားပြောဖူးရေ၊ ဘုရားသခင်ကို မျက်စိနန့် တပ်အပ်မြင်ဖူးရေ” လို့ ပြောနိုင်ကေ အေနိညဉ့် သမ္မတရာထူးက ဆင်းပီးဖို့လို့ သမ္မတမိန့်ခွန်းပြောပွဲတခုမှာ ထပ်ပြောလားပါရေ။

“”မြို့တော်ဝန်၊ ဘုရားကျောင်းက အရူးတိက ကျွန်တော့်ကို နိဗ္ဗာန်ကို လားပနာ၊ ဘုရားသခင်နန့် စကားပြောခိုင်းပါရေ။ ဘုရားသခင် အမှန်တကယ် ရှိပါရေ။ ကျွန်တော်ရို့ အတူတူ ဓါတ်ပုံ တွဲရိုက်ခကတ်ပနာ၊ ဆတ်လ်ဖီ ၁ ပုံတောင် ရိုက်ယူလာပါသိမ့်ရေ။”  လို့ ပြောနိုင်ရေ သက်သီတယောက်ရာ ငါ့ကို ပြပါ။” လို့ ဖိလစ်ပိန်းတောင်ပိုင်းမြို့တော် ဓါဘောင်(Davao)က သိပ္ပံနန့် နည်းပညာ ဖွင့်ပွဲအခမ်းအနားတခုမှာ ဒူတာတီ က ပြောလားစွာပါ။

ကတ်သိုလစ်ဘုရားကျောင်းတိက၊ လူတိကို အလှူဒါနပြုကတ်ဖို့ နှိုးဆော်နိန်စွာကို၊ “လူတိကို အမှန်တကယ်ရာ ကူညီနိန်စွာရာ မှန်ကေ၊ ယင်းလူတိ ဘဝနန့် ရင်းပနာ ရှာထားရရေ ဖေသာတိကို၊ ဇာအတွက် တောင်းနိန်ရလေ?” လို့ ဒူတာတီ က မိန်းဖူးပါရေ။

ဗြီးခရေ ဂျုန်လကလည်း ဘုရားသခင်ကို အရူးလို့ ပြောလိုက်လို့၊ ဘာသာရေးအဖွဲ့အစည်းတိက တောင်းပန်ခိုင်းစွာကို၊ “နှစ်တသန်းကြာကေတောင် လုပ်ဖို့မဟုတ်။” လို့ အသက် ၇၃ နှစ် ရှိရေ ဒူတာတီက ပြောလိုက်ပါသိမ့်ရေ။ အေအတိုင်း ဆက်လားနိန်ကေ၊ ဒူတာတီ သမ္မတသက်တမ်း ၆ နှစ်တောင် ပြည့်ဖို့မဟုတ်လို့၊ ဝေဖန်ရေ လူတိက သုံးသပ်ကတ်ပါရေ။