ထိုင်းနိုင်ငံမှာ ရီပြည့်ပနာ ထွက်လမ်းပိတ်လားရေ ဂူထဲက၊ ဘောလုံးသမားချေ ၁၂ ယောက်နန့် နည်းပြဆရာကို ကယ်ထုတ်ဖို့ လုပ်ငန်း စတင်ဗျာလ်လို့၊ ကယ်ဆယ်ရေးအဖွဲ့ ဂေါင်းဆောင်က ကြေငြာလိုက်ပါရေ။ ဂူထဲမှာ ပိတ်မိနိန်စွာ အဂုဆို နှစ်ပတ်ကျော်လားပါဗျာလ်။
“အေနိ ကျွန်တော်ရို့ အားလုံး အဆင်သင့် ဖြစ်နိန်ပါဗျာလ်။” လို့ ကယ်ဆယ်ရေးအဖွဲ့ ဂေါင်းဆောင်က ပြောပါရေ။ ကယ်ထုတ်ဖို့ လုပ်ငန်းက ၃ ရက်ကနိန် ၄ ရက်ထိ ကြာဖို့လို့ ဆိုပါရေ။ ပထမဆုံး ကယ်ထုတ်လာဖို့ အုပ်စုက၊ အေနိ ထိုင်းစံတော်ချိန် ညဉ့် ၉ နာရီမှာ ထွက်လာဖို့လို့ ဆိုပါရေ။ ယင်းကယ်ထုတ်ဖို့ အုပ်စုထဲမှာ နိုင်ငံခြားသားတိ အပါအဝင်၊ ရီငုပ်သမား ၂၃ ယောက် ပါဝင်ပါရေ။
ကယ်ထုတ်လာဖို့ ရီအောက် ဂူလမ်းက၊ တချို့နိန်ရာတိမှာ ၂ ပေလောက်ရာ အကျယ် ရှိပါရေ။ အစပိုင်းခါတော့၊ ၉ ရက်လောက် အစာငတ်နိန်ရေ အချေတိ၊ ရီကူးမှ ကူးနိုင်ပါဖို့လားလို့ သံသယဝင်ခကတ်ပါရေ။ အဂုတော့ ပိတ်မိနိန်ရေ နိန်ရာကို အစားအသောက်တိနန့် လီလည်း သွင်းပီးထားပါဗျာလ်။
ကယ်ဆယ်ရေးအဖွဲ့က အာကာသယာဥ် စပဲ့ချ်အိပ်ဆ်(SpaceX)နန့် တပ်ဆ်လာ(Tesla) ကားကုမ္ပဏီရို့ကို စတည်ထောင်ပနာ၊ စီအီးအို(CEO)လည်း ဖြစ်တေ အီလွန် မာ့ဆ်(Elon Musk)၊ စနီနိက တည်ဆောက်နိန်ရေ ရီငုပ်သင်္ဘောချေကိုတော့ခါ မစောင့်ဗျာလ်လို့ ဆိုပါရေ။ ယင်း ရီငုပ်သင်္ဘောချေ တည်ဆောက်မှုက ၈ နာရီရာ ကြာပနာ၊ အဂု ကယ်ထုတ်ရေး လုပ်ငန်း မစခင် ၂ နာရီ အလိုမှာ ဗြီးပါဖို့။ ယကေလည်း ယင်းရီငုပ်သင်္ဘောကို ယူလာဖို့ အချိန်က နောက်ထပ် ၁၇ နာရီ ကြာဖို့လို့ ဆိုပါရေ။
Got more great feedback from Thailand. Primary path is basically a tiny, kid-size submarine using the liquid oxygen transfer tube of Falcon rocket as hull. Light enough to be carried by 2 divers, small enough to get through narrow gaps. Extremely robust.
— Elon Musk (@elonmusk) July 7, 2018
