အစ္စရေးနိုင်ငံစွာ၊ လထက်ကို စတုတ္ထမြောက် ယာဉ်လွတ်တင်နိုင်ရေ နိုင်ငံဖြစ်လာဖို့ ပြင်ဆင်နိန်ရေလို့၊ အစိုးရ မဟုတ်တေ ဆပဲ့ချ်အိုင်အဲလ်(SpaceIL)က ကြေငြာလိုက်ပါရေ။ အေနှစ် ဒီဇင်ဘာလမှာ လွတ်တင်စွာရာ အောင်မြင်ခကေ၊ နောက်နှစ် ဖေဖော်ဝါရီလမှာ အစ္စရေးနိုင်ငံအလံစွာ လထက်မှာ လွင့်ထူလာပါဖို့။
ညဇာက အစ္စရေးနိုင်ငံ၊ တဲလ် အေဗဲ့ဗ်မြို့(Tel Aviv)မှာ လုပ်တေ သတင်းစာ ရှင်းလင်းပွဲမှာ “လထက်မှာ အစ္စရေးနိုင်ငံအလံကို ကျွန်တော်ရို့ လွင့်ထူပါဖို့။” လို့ ဆပဲ့ချ်အိုင်အဲလ် စီအီးအို၊ အန်တီဘီ(Anteby, CEO of SpaceIL)က ပြောလားပါရေ။ အေဟင့်စွာ ပထမဆုံးအကြိမ်၊ အစိုးရ မဟုတ်တေ အဖွဲ့အစည်းက လွတ်တင်ဖို့စွာပါ။
အေ ဆမာ့ အာကာသယာဉ်(smart spacecraft)ကို အစ္စရေး အိန်ဂျိန်နီယာတိက တည်ဆောက်ပနာ၊ ဒီဇင်ဘာလမှာ လွတ်တင်နိုင်အောင်၊ အမေရီကန်ပြည်ထောင်စု၊ ဖလော်ရီဒါပြည်နယ်၊ ကိပ် ကာနာဗီရဲလ်(Cape Canaveral)ကို နိုဝင်ဘာလမှာ ပို့လားပါဖို့။
We have a launch and landing dates! December 2018- Launch, February 13 2019- First Israeli spacecraft lands on the moon! SpaceIL’s moon mission is officially underway #SpaceIL pic.twitter.com/f5V2E0Ue2d
— SpaceIL (@TeamSpaceIL) July 10, 2018
“ကျွန်တော်ရို့ အာကာသယာဉ်က၊ လထက်မှာ ရပ်တေ၊ အငယ်ဆုံး ယာဉ်ပါ။ အချင်း ၂ မီတာ၊ အမြင့် ၁ မီတာခွဲ၊ အလီးချိန် ၆၀၀ ကီလိုဂရမ် လီးပနာ၊ လထက်မှာ ရပ်တေအချိန်မှာ အလီးချိန် ၁၈၀ ကီလိုဂရမ်ရာ ရှိပါဖို့။” လို့ အန်တီဘီက ပြောပါရေ။
Meet our spacecraft: small, smart and with a lot of Israeli #chutzpa. To the moon in December 2018! #SpaceIL pic.twitter.com/8bwTuc8wZE
— SpaceIL (@TeamSpaceIL) July 10, 2018
အမေရီကန်ဒေါ်လာ ၉၅ သန်း ကုန်ကျရေ၊ အေ ဆပဲ့ချ်အိုင်အဲလ် စီမံကိန်းကို ဘီလီယံနာ သဌေးကြီး မောရဲ့စ် ခန်(Morris Kahn)က ဖေသာ အများဆုံး လှူဒါန်းထားပါရေ။ အောင်မြင်လားကေတော့ခါ၊ လကဗာကို ယာဉ်လွတ်တင်ရေ ရာရှား၊ အမေရီကန်ပြည်ထောင်စုနန့် တရုတ် နိုင်ငံတိ ဗြီးကေ စတုတ္တမြောက်နိုင်ငံနန့် ပထမဆုံး ပုဂ္ဂလိက အဖွဲ့အစည်း ဖြစ်လာပါဖို့။
