အက်ကောဒေါနိုင်ငံ(Ecuador)က အမိနို့တိုက်ရေး အဆိုတင်သွင်းနိန်စွာကို မရပ်တန့်ကေ၊ ပီးထားရေ အကူအညီတိ အားလုံးကို ရပ်တန့်ပလိုက်ဖို့လို့၊ အမေရီကန်ပြည်ထောင်စုက ခြိမ်းခြောက်တေလို့၊ နယူးယော့ခ်တိုင်းစ်(New York Times) သတင်းစာမှာ ဖော်ပြထားပါရေ။
နယူးယော့ခ်တိုင်းစ် သတင်းစာ အဆိုအရ၊ လာဖို့ ကဗာ့ကျန်းမာရေးအဖွဲ့(World Health Organization)က ဂျီနီဗာမြို့မှာ လုပ်ဖို့၊ ကဗာ့ကျန်းမာရေးဆွေးနွေးပွဲ(World Health Assembly)မှာ၊ အက်ကောဒေါနိုင်ငံက အမိနို့တိုက်ရေး အဆိုပြုစာတခုကို တင်သွင်းလားဖို့ ရှိရေလို့ ဆိုပါရေ။ ယကေလည်း အဂုအခါ အမေရီကန်ပြည်ထောင်စုက၊ ယင်းအဆိုပြုချက်ကိုရာ တင်သွင်းကေ၊ အမေရီကန်ပြည်ထောင်စုနန့် ကုန်သွယ်ရေးကို ထိခိုက်လားဖို့အပြင်၊ စစ်ရေးအကူအညီပီးနိန်စွာတိကိုလည်း ရပ်ဆိုင်းပလိုက်ဖို့လို့ ခြိမ်းခြောက်လာရေအတွက်၊ အဆိုတင်သွင်းဖို့ကိစ္စ အခက်အခဲ ဖြစ်နိန်ရေလို့ ဆိုပါရေ။
“အေ အဆိုတင်သွင်းလွှာအတွက်၊ ကဗာ့ကျန်းမာရေးဆွေးနွေးပွဲ အကြို၊ အစည်းအဝေးတိ အကြိမ်ကြိမ် လုပ်ဗြီးပါဗျာလ်။ လူအားလုံးလည်း ပျော်ကတ်ပါရေ။ အမေရီကန်ပြည်ထောင်စုက၊ အေပိုင် ခြိမ်းခြောက်လာစွာကို၊ ခြီဖျားလက်ဖျား အီးလားအောင်ထိ၊ အားလုံးသူ တုန်လှုပ်မိပါရေ။”လို့ အချေနို့ လှုပ်ရှားမှု ပေါ်လဆီ ညွှန်ကြားရေးမှုး ပတ်တီ ရင်းဒဲလ်(Patti Rundall)က ပြောလားပါရေ။
အမေရီကန်ပြည်ထောင်စု သမ္မတ ဒိုနယ် ထရုန့်ပ် ကတော့ခါ၊ အေဟင့်စွာ နယူးယော့ခ်တိုင်းစ်က လုပ်ကြံသတင်းလို့ရာ ဆိုပါရေ။ အမေရီကန်ပြည်ထောင်စုက အမိနို့တိုက်ဖို့စွာကို ထောက်ခံပါရေ။ ယကေလည်း အမိတိ နို့မုန့်ဘူး မတိုက်ရအောင် လုပ်စွာကိုတော့ လက်မခံပါ။ အဟာရ မပြည့်ပနာ၊ ဆင်းရဲရေ လူတိ၊ နို့မုန့်ဘူးတိုက်ဖို့ လိုရေလို့ ပြောထားပါရေ။
The failing NY Times Fake News story today about breast feeding must be called out. The U.S. strongly supports breast feeding but we don’t believe women should be denied access to formula. Many women need this option because of malnutrition and poverty.
— Donald J. Trump (@realDonaldTrump) July 9, 2018
ယကေလည်း ဆီနိတ်တာ (Senator Jeff Merkley)က “လူ့ကျင့်ဝတ်မရှိ၊ ရှက်ဖို့ကောင်းလိုက်တေဘင်။ အမေရီကန်ပြည်ထောင်စုက စီးပွားရေးလုပ်ငန်းကြီးတိ အကျိုးအတွက်ရာ၊ အလုပ်လုပ်နိန်စွာ။ အမိနို့တိုက်ရေးကို ကာကွယ်ဖို့၊ မြှင့်တင်ဖို့၊ ထောက်ခံကတ်ဖို့၊ အစိုးရတိကို အက်ကောဒေါက စည်းလုံးနိန်စွာကို၊ အမေရီကန်ပြည်ထောင်စုက စီးပွားရေး ပိတ်ဆို့ဖို့လို့ ခြိမ်းခြောက်နိန်ရေ။” လို့ ပြောထားပါရေ။
Unethical and shameful: The US —selling out to corporate interests— threatened Ecuador w sanctions for encouraging governments to “protect, promote, and support breastfeeding.” https://t.co/kOjMxQczNp
— Senator Jeff Merkley (@SenJeffMerkley) July 9, 2018
အယင်နှစ်က ကလိန်း လတ်ဘဲလ် ပြိုဂျတ်(Clean Label Project) လေ့လာမှု တခုမှာ၊ အမေရီကန်ပြည်ထောင်စုကထုတ်တေ အချေအစားအစာ ၃ ပုံ၊ ၂ ပုံမှာ အာဆန်နဲ့(arsenic)အဆိပ် ပါနိန်စွာ တွိရရေလို့ ထုတ်ပြန်ထားပါရေ။ အသေးစိတ်ကို အေမှာ လားကြည့်ပါ။ https://www.cleanlabelproject.org/infant-formula-baby-food/