ညဇာက ပြင်သစ်နိုင်ငံတောင်ပိုင်းမှာ မိုးအကြီးအကျယ် ရွာချလိုက်တေအတွက်၊ လူပေါင်း ၁၆၀၀ ကျော်ကို အရေးပေါ် ကယ်ထုတ်လိုက်ရရေလို့ ဆိုပါရေ။ အများစုက တောထဲမှာ ရွက်ဖျင်တဲတိနန့် ခရီးထွက်နိန်ကတ်တေ လူတိဖြစ်ပနာ၊ ယင်းအထဲမှာ အသက် ၇၀ ကျော် လူတယောက် ပျောက်နိန်သိမ့်ရေလို့လည်း ဆိုပါရေ။
အဆိုးရွားဆုံး နိန်ရာတိက ဂါးဒ်(Gard)၊ အာဒီးချီ(Ardèche) နန့် ဒရိုးမီး(Drôme) ဒေသတိ ဖြစ်တေလို့ ဆိုပါရေ။ မီးသတ်နန့် ရဲ ၄၀၀ ကျော်ကို ဟဲလီကော့ပတာ ၄ စီးနန့်အတူ၊ အရေးပေါ် ကယ်ဆယ်ရေးအတွက် ချထားရေလို့ ဆိုပါရေ။
