ညဇာက အိန်ဒိုနီးရှားနိုင်ငံ လုံးဘော့(Lombok)ကျွန်းမှာ ပြင်းအား ၆.၂ ရှိရေ ငလျှင်တခု ထပ်လှုပ်ပြန်ပါရေ။ အေငလျှင်က လူရာချီသီလားရေ ပြင်းအား ၆.၉ ရှိရေ ငလျှင်လှုပ်လို့၊ တပတ်တောင် မပြည့်သိမ့်ရေ အချိန်မှာ ပြန်လှုပ်လာစွာပါ။
အိန်ဒိုနီးရှား မိုးလေဝါသဌာနက၊ ငလျှင်ဗဟိုချက်မစွာ လုံးဘော့ကျွန်း အနောက်မြောက်ဖက် ၆ ကီလိုမီတာ အကွာက၊ အနက် ၁၂ ကီလိုမီတာ မှာ ရှိရေလို့ ဆိုပါရေ။
ဗြီးခရေ တနင်္ဂနိန်နိက ပြင်းအား ၆.၉ ငလျှင်လှုပ်လို့၊ လူပေါင်း ၃၁၉ ယောက် သီလားရေလို့ အစိုးရက ကြေငြာထားပနာ၊ လူပေါင်း ၁ သိန်း ၅ သောင်း ၄ ထောင်ကိုလည်း နိန်ရာ ရွိပြောင်းထားရပါရေ။ အိမ်ပျက်လားရေ လူအများစုက လမ်းဘေးမှာ တဲထိုးပနာ နိန်ရတုန်းပါ။
အဂု လှုပ်တေ ငလျှင်စွာ၊ ပြင်းအား ၆.၉ ငလျှင်ကြီး လှုပ်ဗြီးရေ နောက်ပိုင်း၊ ဆက်တိုက်လှုပ်နိန်ရေ ငလျှင် အကြိမ်ပေါင်း ၃၅၅ ကြိမ်ထဲက၊ ပြင်းအား အများဆုံး ငလျှင်ပါ။
အိန်ဒိုနီးရှားနိုင်ငံထဲက အေကျွန်းတိစွာ မီးတောင်စက်ဝန်း(Ring of Fire)ထဲမှာ ပါနိန်ရေအတွက်၊ ငလျှင်ဒဏ်ကို စဉ်ဆက်မပြတ် ခံရနိုင်ပါရေ။