အေအပတ်မှာ အွင်လိုင်း စျီးရောင်းကုမ္ပဏီ အာမေဇုန်(Amazon)စွာ ကဗာ့ ဒုတိယမြောက် ဒေါ်လာ ထရီလီယံ (သန်း ၁ သန်း) တန်ဖိုးရှိရေ ကုမ္ပဏီကြီး ဖြစ်လာပါရေ။ ကဗာ့ ပထမဆုံး ဒေါ်လာ ထရီလီယံ တန်ရေ ကုမ္ပဏီက အပ်ပါးလ်(Apple)ပါ။
အာမေဇုန်ကုမ္ပဏီ ဒေါ်လာ ထရီလီယံ တန်ဖိုးရှိလာလို့၊ အကျိုးအမြတ် အရှိဆုံး လူက၊ အာမေဇုန်ကို စပနာ တည်ထောင်ရေ လူလည်းဖြစ်တေ၊ ကုမ္ပဏီ စီအီးအိုလည်း ဖြစ်တေ ဂျပ်ဖ် ဘီးဇိုးစ်(Jeff Bezos) ပါ။ ဘီးဇိုးစ် ၂၀၁၈ ခုနှစ် ဝင်ငွေက အမေရီကန်ဒေါ်လာ ၆၇ ဘီလီယံ(သန်း ၁ ထောင်) ပါ။ ကဗာမှာ အချမ်းသာဆုံး လူသား ဖြစ်ပနာ၊ စုစုပေါင်း ချမ်းသာမှုက အမေရီကန်ဒေါ်လာ ၁၆၇ ဘီလီယံ ရှိပါရေ။
ဘီးဇိုးစ် ၁ နှစ်ဝင်ငွေ အမေရီကန်ဒေါ်လာ ၆၇ ဘီလီယံကို၊ ၁ နှစ်မှာ အလုပ် လုပ်ရက် ၂၅၀ နန့် စားလိုက်ကေ၊ ၁ ရက် ဝင်ငွေစွာ အမေရီကန်ဒေါ်လာ ၂၆၈ သန်း ရှိနိန်ပါရေ။ ၁ ရက်မှာ ရှိရေ ၂၄ နာရီနန့်၊ ၁ ရက် ဝင်ငွေကို ထပ်စားလိုက်ကေ၊ ၁ နာရီ ဝင်ငွေက အမေရီကန်ဒေါ်လာ ၁၁,၁၆၆,၆၆၆ (၁၁ သန်း ၁ သိန်း ၆ သောင်း ၆ ထောင် ၆ ရာ ၆ ဆယ့် ၆) ရှိနိန်ပါရေ။ ယင်း ၂၄ နာရီလုံး ဘီးဇိုးစ် အလုပ် လုပ်နိန်စွာ မဟုတ်ပါသိမ့်။
ယကေလည်း ဘီးဇိုးစ် ၁ နာရီ ဝင်ငွေစွာ၊ သူ့ဘားမှာ အလုပ် လုပ်နိန်ရေ အောက်ခြေ အလုပ်သမားတိ ၁ နာရီ ဝင်ငွေနန့် အဆပေါင်း သန်းချီပနာ ကွာခြားနိန်ပါရေ။ အာမေဇုန် ဂိုဒေါင်တိမှာ လုပ်နိန်ရေ အလုပ်သမားတိ ပျမ်းမျှ ဝင်ငွေက ၁ နာရီကို အမေရီကန်ဒေါ်လာ ၁၅ ရာ ရှိပါရေ။ ဂိုဒေါင်မှာ ထုပ်ပိုးရေ အလုပ်သမား ၁ ယောက် ဝင်ငွေက၊ ၁ နာရီကို အမေရီကန်ဒေါ်လာ ၁၂ ပါ။
ဘီးဇိုးစ် အိပ်နိန်ကေတောင်၊ ၁ စက္ကန့် ဝင်ငွေက အမေရီကန်ဒေါ်လာ ၃,၁၀၁ ရှိနိန်ပါရေ။ ဘီးဇိုးစ် ၈ စက္ကန့် ဝင်ငွေက သူ့ အောက်ခြေအလုပ်သမား ၁ ယောက် ၁ နှစ် ဝင်ငွေနန့် လားပနာ ညီမျှပါရေ။
