ညဇာက စပိန်နိုင်ငံ ဘာစီလိုနာမြို့မှာ ကာတာလန် လူမျိုး ၁ သန်းကျော်စွာ၊ စပိန်နိုင်ငံက ကာတာလိုနီးယားဒေသကို လွတ်လပ်ရေး ခွဲပီးဖို့နန့်၊ အဖမ်းခံထားရရေ ဂေါင်းဆောင်တိကို ပြန်လွတ်ပီးဖို့အတွက် ဆန္ဒထွက်ပြကတ်ပါရေ။
“လွတ်လပ်ရေး” “အချုပ်အခြာမဲ့ လုံးဝ လွတ်လပ်ရေး” ဆိုရေ စာတမ်းတိကိုလည်း ကိုင်ထားကတ်ပါရေ။
ဆပ်တန်ဘာလ ၁၁ ရက်နိစွာ လာ ဒီယာဒါ(La Diada)လို့ခေါ်ရေ ၁၇၁၄ ခုနှစ်မှာ ကျူးကျော်လာရေ စပိန်ဘုရင် ဖေးလဲ့ပ် ၅ (King Philip V) စစ်တပ်ကို စစ်ရှုံးပနာ ဘာစီလိုနာမြို့တော် ကျဆုံးလားရရေနိပါ။
အချုပ်အခြာအာဏာ ကျဆုံးလားရေအချိန်၊ ညဇာ ၅ နာရီ ၁၄ မိနစ်မှာ ဆန္ဒပြရေ လူတိ အားလုံး ငြိမ်သက်လားကတ်ပါရေ။ ဗြီးစွာနန့် “လွတ်လပ်ရေး”၊ “အချုပ်အခြာမဲ့ လုံးဝ လွတ်လပ်ရေး” ဆိုပနာ အသံကုန် ကြွေးကြော်ကတ်ပါရေ။
ဒေသခံ ရဲတိက ဆန္ဒပြရေ လူ ၁ သန်းလောက် ရှိဖို့လို့ ဆိုပါရေ။
လာ ဒီယာဒါ စွာ ကာတာလန်တိအတွက် သင်္ကေတတခု ဖြစ်လာပနာ၊ ၂၀၁၂ ခုနှစ်ကပင် နှစ်စဉ်မပျက် လွတ်လပ်ရေးအတွက် ဆန္ဒပြတောင်းဆိုလာကတ်ပါရေ။
၂၀၁၇ ခုနှစ် အောင်တိုဘာလ ၁ ရက်နိမှာ ကာတာလန် ၉၂% ကျော်က စပိန်နိုင်ငံထဲက သီးခြား လွတ်လပ်တေ နိုင်ငံအဖြစ် ခွဲထွက်လားဖို့လို့ မဲပီးခကတ်ပါရေ။ ယကေလည်း ယင်းဆန္ဒခံယူပွဲကို စပိန်အစိုးရက တရားမဝင်လို့ ကြေငြာခပနာ၊ ဂေါင်းဆောင်အများကြီးကို ဖမ်းဆီးခပါရေ။ တချို့ ဂေါင်းဆောင်တိ နိုင်ငံရပ်ခြားကို ထွက်ဗြီးလားရပါရေ။
ကာတာလန်ဂေါင်းဆောင်သစ် ကိန်း တော်ရာ(Quim Torra)ကတော့ “လူထု လှုပ်ရှားမှု”က အစပြုစွာရာ ရှိသိမ့်ရေလို့ ဗြီးခရေ အင်္ဂါနိက ပြောလားပါရေ။ အယင်နှစ်က လူထုဆန္ဒခံယူထားစွာကို အသိအမှတ်ပြုလာအောင် လှုပ်ရှားမှုတိ ဆက်တိုက်လာဖို့သိမ့်လို့ ဆိုလားပါရေ။