ရာရှား ကင်းထောက်လေယာဉ် Il-20 ပစ်ချခံလိုက်ရဗြီးရေ နောက်မှာ၊ အေပိုင် အဖြစ်မျိုး ထပ်မဖြစ်ရအောင် ဆိုပနာ၊ ရရှားက အယင်ကပင် ရောင်းဖို့ သဘောတူထားရေ၊ S-300 လေကြောင်းကာကွယ်ရေးစနစ်ကို၊ အဂု ဆီးရီးယားနိုင်ငံကို ပို့ထားဗျာလ် ဖြစ်ပါရေ။ ယင်း S-300 လေကြောင်းကာကွယ်ရေးစနစ်ထဲမှာ၊ ပစ်စင်တိ၊ ဖြတ်တောက်ရေး ဒုံးကျဉ်တိနန့် ရေဒါအပါအဝင် ပစ္စည်းအမျိုးအစားပေါင်း ၉၄ မျိုး ပါရေလို့ ဆိုပါရေ။
အလီးချိန် တန် ၁၂၀ ထိ သယ်ဆောင်နိုင်ရေ၊ ကဗာ့အကြီးဆုံး စစ်သုံး ကုန်တင်လေယာဉ်၊ အန်တိုနော့ဗ် အန် ၁၂၄ (Antonov An-124 Ruslan (the Condor)) နန့် သယ်ဆောင်လာရေ S-300 လေကြောင်းကာကွယ်ရေးစနစ် ကရိယာတိကို ဆီးရီးယားနိုင်ငံ လေဆိပ်တခုမှာ ညဉ့်ဖက် ကုန်ချနိန်စွာကို တွိရပါရေ။
အဂု ရောက်လာရေ S-300 လေကြောင်းကာကွယ်ရေးစနစ်ကို၊ လာဖို့ အောင်တိုဘာလ ၂၀ ရက်နိမှာ ရာရှားလေကြောင်းကာကွယ်ရေးစနစ်နန့် ချိတ်ဆက်ဖို့ လုပ်ထားပနာ၊ ကိုင်တွယ်ထိန်းချုပ်နည်းတိကို ဆီးရီးယားစစ်တပ်ကို ၃ လအတွင်း လေ့ကျင့်ပီးလားဖို့လို့ ဆိုပါရေ။
အေ S-300 လေကြောင်းကာကွယ်ရေးစနစ်ကို ဆီးရီးယားနိုင်ငံ အစိုးရကို ချက်ချင်း ရောင်းချဖို့၊ အစ္စရေးနိုင်ငံက အကြီးအကျယ် ကန့်ကွက်နိန်ရေ ကြားထဲက၊ ရာရှားသမ္မတ ပူတိန် က အမိန့်ပီးလိုက်စွာပါ။
ဗြီးခရေ ဆက်တင်ဘာလ ၁၇ ရက်နိ၊ အစ္စရေးလေတပ်က ဆီးရီးယားနိုင်ငံကို ဝင်တိုက်စွာမှာ၊ ကင်းထောက်လို့ ဆင်းလာနိန်ရေ Il-20 ရာရှား ကင်းထောက်လေယာဉ်ကို၊ ဆီးရီးယား လေကြောင်းကာကွယ်ရေးစနစ်က မှားပစ်လိုက်တေအတွက်၊ လေယာဉ်ထက်မှာ ပါလာရေ၊ ရာရှားစစ်အမှုထမ်းပေါင်း ၁၅ ယောက် သီလားရပါရေ။ အစ္စရေး တိုက်လေယာဉ် တစင်းက ကင်းထောက်လေယာဉ် နောက်က ခိုပနာ ဝင်တိုက်ခရေလို့ ရာရှားစစ်တပ်က ရေဒါမှတ်တမ်းတိမှာ ဖော်ပြထားပါရေ။ ရာရှားစစ်တပ်က အစ္စရေးနိုင်ငံက အေပိုင် မထီမဲ့မြင်နန့်၊ ပညာရှင်ဆန်ဆန် မပြုမူခလို့ အေပိုင် ဖြစ်ရစွာလို့ စွပ်စွဲခပါရေ။ အစ္စရေးနိုင်ငံကတော့ ဆီးရီးယားနိုင်ငံနန့် အီရန်နိုင်ငံကိုရာ အပြစ်ဖို့ခပါရေ။
