ရာရှားကင်းထောက်လေယာဉ် ပစ်ချခံရဗြီးရေ နောက်မှာ၊ ဆီးရီးယားနိုင်ငံကို ရာရှားနိုင်ငံက S-300 လေကြောင်းကာကွယ်ရေးစနစ် ပို့ရေအတွက်၊ အမေရီကန်ပြည်ထောင်စုကလည်း အစ္စရေးနိုင်ငံကို နောက်ဆုံးပေါ် F-35s တိုက်လေယာဉ်တိ ပိုပို့ဖို့လို့ ဆိုပါရေ။ လေယာဉ် ဇာနစင်း ပို့ဖို့ဆိုစွာကိုတော့ မဖော်ပြသိမ့်ပါ။
အစ္စရေးနိုင်ငံအတွက် အမြဲတမ်း မိတ်ဆွေဖြစ်တေ၊ အမေရီကန်ပြည်ထောင်စုက ဆီးရီးယားနိုင်ငံအတွက် ရာရှားနိုင်ငံက S-300s လေကြောင်းကာကွယ်ရေးစနစ် ရောင်းချစွာကို ကကောင်း ဝေဖန်ရှုတ်ချခပါရေ။ ဆီးရီးယားနိုင်ငံက ရာရှားထုတ် S-300s လေကြောင်းကာကွယ်ရေးစနစ် ဝယ်ထားစွာ၊ နှစ်အင်တန် ကြာလားခပါဗျာလ်။ ၂၀၁၃ ခုနှစ်မှာ အစ္စရေးနိုင်ငံက ရာရှားနိုင်ငံကို တောင်းဆိုရေအတွက်၊ မတင်ပို့ဘဲ ရပ်ထားခစွာပါ။ ဗြီးခရေ လက၊ အစ္စရေး တိုက်လေယာဉ် ၄ စင်းက ဆီးရီးယားနိုင်ငံထဲက ပစ်မှတ်တိကို ဝင်တိုက်စွာမှာ၊ အစ္စရေး F-16 တိုက်လေယာဉ် တစင်းက၊ ကင်းထောက်လို့ ဆင်းလာရေ ရာရှား ကင်းထောက်လေယာဉ် Il-20 နောက်က ခိုပနာ၊ ဝင်တိုက်ရေခါ၊ ဆီးရီးယား လေကြောင်းကာကွယ်ရေး S-200 စနစ်က ပစ်လိုက်လို့ ရရှားကင်းထောက်လေယာဉ် ပျက်ကျပနာ၊ စစ်အမှုထမ်း ၁၅ ယောက် သီဆုံးလားရပါရေ။ ယင်းအဖြစ်အပျက်အတွက် ရာရှားက စိတ်ပြောင်းလားပနာ၊ အဂုမှ ဆီးရီးယားနိုင်ငံကို S-300 ကို တင်ပို့စွာပါ။
အစ္စရေးနိုင်ငံကတော့၊ ဆီးရီးယားနိုင်ငံထဲက အီရန်စစ်တပ်ပစ်မှတ်တိကို ဆက်ပစ်လားဖို့သိမ့်လို့ ဆိုပါရေ။ အစ္စရေးစွမ်းအင်ဝန်ကြီး ယူဗဲလ် ဆတိန်းနဲ့ဇ်(Yuval Steinitz)က S-300 လေကြောင်းကာကွယ်ရေးစနစ်စွာ အစ္စရေးအတွက် ကကောင်း အခက်တွိဇီနိုင်ပနာ၊ ဖြေရှင်းနိုင်အောင် နည်းလမ်းရှာဖို့ လိုရေလို့ ပြောဖူးပါရေ။ အစ္စရေး လုံခြုံရေး ကျွမ်းကျင်ပညာရှင် ဇာချီ ဟန်နတ်ဘီ(Tzachi Hanegbi)ကတော့ အမေရီကန်ပြည်ထောင်စုက နောက်ဆုံးထုတ် F-35s တိုက်လေယာဉ်တိကို S-300s လေကြောင်းကာကွယ်ရေးစနစ်က ရေဒါတိ မဖမ်းနိုင်လို့ တင်ပြဖူးပါရေ။ ယကေလည်း F-35s တိုက်လေယာဉ်တိမှာ အောင်ဆီဂျင် ပီးစက်အပါအဝင် ပြဿနာတိက တပုံတပင်နန့် အကောင်းဆုံး အနိန်အထားကို မရောက်သိမ့်ပါ။
