အေနိ၊ တရုတ်နိုင်ငံ ဂျီကွန်း ဂြိုလ်တု ပစ်စင်(Jiuquan Satellite Launch Center)က လွတ်တင်လိုက်တေ၊ ပထမဆုံး ပုဂ္ဂလိကပိုင် တည်ဆောက်တေ ဒုံးပျံစွာ၊ အာကာသ ပတ်လမ်းကြောင်းထဲကို မရောက်ခင်၊ တတိယအဆင့်မှာ ပျက်ကျလားပါရေ။
ဘေဂျင်းမြို့တော်(Beijing) အခြေစိုက်၊ လန်းဆပဲ့ချ်(LandSpace)ဆိုရေ ကုမ္ပဏီစွာ၊ ပထမဆုံး အဆင့် ၃ ဆင့် ပစ်တင်ရရေ ဒုံးပျံကို တည်ဆောက်တေ အာကာသကုမ္ပဏီပါ။ ဇုချူး-၁(Zhuque-1 (ZQ-1))လို့ နာမေပီးထားရေ ယင်းဒုံးပျံစွာ၊ ပထမအဆင့်နန့် ဒုတိယအဆင့်ကို အအောင်မြမြင် ဖြတ်လားစွာကို တွိရပါရေ။ နောက်ဆုံး တတိယအဆင့်ကို ရောက်ခါမှ တခုခု ချွတ်ယွင်းပနာ ပျက်ကျလားပါရေ။
“အေပစ်တင်မှုရာ အောင်မြင်ခကေ၊ ဇတ်ကျူ-၁(ZQ-1)စွာ တရုတ်နိုင်ငံက ပထမဆုံး ပုဂ္ဂလိကပိုင်၊ အာကာသထဲကို ဂြိုလ်တုတိ ပို့တင်ပီးနိုင်ရေ၊ ဒုံးပျံ ဖြစ်လာဖို့။” လို့ လန်းဆပဲ့ချ် က အမှူဆောင်အရာရှိချုပ် ဇန်း ချန်ဝူး(Zhang Changwu)က ပြောပါရေ။ အဂုပိုင် လွှတ်တင်ဖို့အတွက်၊ ၉ လကြာ ပြင်ဆင်ခရရေလို့ ဆိုပါရေ။
China’s first private-sector commercial launch vehicle, Zhuque-1, developed by Beijing-based private space company LandSpace, failed to send a satellite into orbit after being launched from Jiuquan Satellite Launch Center in NW China’s Gansu on Sat. No other details are available pic.twitter.com/DOKozEnfX3
— Global Times (@globaltimesnews) 27 October 2018
၁၉ မီတာ(၆၂ ပေ) အရှည် ရှိရေ၊ ယင်းဒုံးပျံကို အာကာသထဲကို လွှတ်တင်လိုက်စွာကို ဗွီဒီယိုထဲမှာ တွိရပါရေ။ ယင်းဒုံးပျံမှာ တရုတ်အသံလွှင့်ဌာန စီစီတီဗွီ(CCTV)ပိုင်၊ ဂြိုလ်တု တလုံး တပ်ဆင်ထားပနာ၊ အလီးချိန် ၂၇ တန် လီးပနာ၊ ပစ်တင်အား ၄၅ တန် ရှိရေလို့ ဆိုပါရေ။ တည်ဆောက်မှု ကုန်ကျစရိတ်က၊ အမေရီကန်ဒေါ်လာ ၁၄ သန်း ရှိခရေလို့ ဆိုပါရေ။
အဂု လွှတ်တင်မှု မအောင်မြင်ခကေလည်း၊ မကြာခင် ထပ်လွှတ်တင်လားဖို့လို့ ဆိုပါရေ။ အဂု တရုတ်နိုင်ငံမှာ အာကသဆိုင်ရာ ကုမ္ပဏီပေါင်း ၆၀ ကျော်ရှိပနာ၊ သူ့ထက်ငါ အယင် အာကာသဒုံးပျံတိ ပစ်တင်ဖို့ ကြိုးစားနိန်ကတ်ပါရေ။
အေအပတ်စွာ တရုတ်အာကာသကုမ္ပဏီတိအတွက် အဆိုးရွားဆုံး အပတ်တော့ မဟုတ်ပါ။ ဗြီးခရေ ကြာသပဒီးနိက၊ ရှန်ဟဲ မန်ဝီး နည်းပညာကုမ္ပဏီ(Shanghai ManWei Technology)က ကဗာ့ ပထမဆုံး မျိုးရိုးဗီဇသိုလှောင်ကန်(first space gene bank) တခုကို အာကသထဲကို လွှတ်တင်နိုင်ခပါရေ။ ယင်းသိုလှောင်ကန်ထဲမှာ၊ တရုတ်နိုင်ငံသား ၈ ယောက်ဘားက မျိုးရိုးဗီဇတိကို ထည့်ထားပနာ၊ အာကာသထဲမှာ နှစ်ထောင်ချီ ကြာအောင်ထိ၊ ထိန်းသိမ်းထားဖို့လို့ ဆိုပါရေ။