တရုတ်နိုင်ငံ စီးပွားရေးက အများပြည်သူ သုံးနိုင်ဖြုန်းနိုင်ရေဖက်ကို ဉီးတည်လာဗျာလ်ဖြစ်လို့၊ ရေရှည်မှာ လေယာဉ်ပျံ စီးရေ လူဉီးရေ များလာဖို့ဗျာလ်လို့၊ နိုင်ငံတကာ လေကြောင်း သယ်ယူပို့ဆောင်ရေးအဖွဲ့(International Air Transport Association (IATA))က ဖော်ပြထားပါရေ။
လာဖို့ နှစ် ၂၀ အတွက်၊ လေယာဉ်ပျံ စီးဖို့ ခရီးသယ် ခန့်မှန်းချက်အရ၊ နှစ် ၂၀ အတွင်းမှာ တရုတ် လေယာဉ်ပျံစီး ခရီးသယ်စွာ၊ ကဗာမှာ အများဆုံး ဖြစ်လာဖို့ ဖြစ်ပနာ၊ လက်ရှိထက် ခရီးသယ်အသစ် တဝက်က ထပ်ပိုလာဖို့လို့ ဆိုပါရေ။
IATA predicts air passengers will DOUBLE in 20 years to 8.2B; #protectionism could reduce #aviation‘s benefits to world economies.✈️📈 https://t.co/W8df4X9hiN pic.twitter.com/n1wkU7iXht
— IATA (@IATA) October 24, 2018
အေးရှား-ပစိဖဲ့စ်(Asia-Pacific) လေကြောင်း စျီးကွက်ကို၊ ဒေသ စီးပွားရေး တိုးတက်လာစွာ၊ မိသားစုတိ ဝင်ငွေ ပိုကောင်းလာစွာ၊ လူဉီးရေ တိုးတက်လာစွာနန့် လူနိန်မှု အသွင်သဏ္ဍန်ပြောင်းလဲလာစွာတိက ပေါင်းစပ်ထားရေလို့ ဆိုပါရေ။
“တရုတ်နိုင်ငံက၊ အမေရီကန်ပြည်ထောင်စု လက်ရှိ ယူထားရေ၊ ကဗာ့ လေကြောင်းလိုင်း အသုံးအများဆုံး စျီးကွက်ကို၊ ၂၀၂၀ ခုနှစ်၊ နှစ်လယ်မှာ ရယူလားပါလိမ့်မေ။” လို့ အိုင်အေတီအေ က ပြောပါရေ။
၂၀၂၄ ခုနှစ် ရောက်လာလို့ ရှိကေ၊ ယူကေ(UK)ကို ကျော်ပနာ၊ အိန္ဒိယနိုင်ငံက ကဗာမှာ လေကြောင်းလိုင်း တတိယအသုံးအများဆုံးနိုင်ငံ ဖြစ်လာပါလိမ့်မေ။ ထူးခြားစွာက အိန်ဒိုနီးရှားနိုင်ငံ(Indonesia)ပါ။ ၂၀၁၇ ခုနှစ်မှာ၊ ကဗာ့ နံပါတ် ၁၀ ရှိနိန်စွာကနိန်၊ ၂၀၃၀ ခုနှစ် အရောက်မှာ၊ နံပါတ် ၄ နိန်ရာကို ရောက်လာဖို့လို့ ဆိုပါရေ။ ၂၀၃၀ ခုနှစ် အရောက်မှာ၊ ထိုင်းနိုင်ငံလည်း ကဗာ့နံပါတ် ၁၀ စရင်းထဲမှာ ဝင်လာဖို့လို့ ဆိုပါရေ။ နံပါတ် ၁၀ စရင်းထဲက၊ ထွက်ကျလားဖို့ နိုင်ငံက အီတလီနိုင်ငံပါ။
၂၀၃၇ ခုနှစ် ရောက်ကေ၊ ကဗာ့ လေယာဉ်စီး ခရီသယ် ပမာဏစွာ နှစ်ဆ တိုးလာပနာ၊ သန်း ၈၂၀၀ (၈.၂ ဘီလီယံ)ထိ ရှိလာဖို့လို့ အိုင်အေအီးအေ က ခန့်မှန်းထားပါရေ။
“လေကြောင်းသယ်ယူပို့ဆောင်ရေးက တဇတဇ ကြီးထွားလာနိန်ပနာ၊ ကဗာကြီးအတွက် ကကောင်း အကျိုး ဖြစ်ဇီပါရေ။ လာဖို့ နှစ် ၂၀ မှာ၊ လေကြောင်းခရီးသယ် ၂ ဆ တိုးလာဖို့ ဖြစ်တေအတွက်၊ ကဗာတဝှမ်းမှာ အလုပ်အကိုင်ပေါင်း သန်း ၁၀၀ ကို ထပ်ဖန်တီးပီးလာပါဖို့။” လို့ အိုင်အေအီးအေ ညွှန်ကြားရေးမှူးချုပ်နန့် စီအီးအို အလက်စန္ဒြီ ဒီ ဂျူနီးယားစ်(Alexandre de Juniac)က ပြောပြပါရေ။
ယကေလည်း နိုင်ငံ အစိုးရတိက သူရို့ အကျိုးစီးပွားကာကွယ်ရေ၊ လုပ်ဆောင်ချက်တိ လုပ်လာကေတော့၊ အဂု ခန့်မှန်းချက်တိ ပြောင်းလဲလားနိုင်ရေလို့ ဆိုပါရေ။