ဂျီ ၇ ကို ကဗာမှာ စက်မှုဖွံ့ဖြိုးဗြီး ထိပ်တန်း ၇ နိုင်ငံနန့် ဖွဲ့စည်းထားပနာ၊ နှစ်စဉ်နှစ်တိုင်း တွိဆုံကတ်ပနာ၊ ကဗာ့စီးပွားရေး ပေါ်လဆီတိကို ဆွေးနွေးကတ်ပါရေ။
“ပွင့်ပွင့်လင်းလင်း ပြောရဖို့ဆိုကေ၊ မစ္စတာ ဂျင်ခ်ခါ ပြောစွာ မှန်ပါရေ။ ကျွန်တော်ရို့ ဥရောပက စီးပွားရေး လွှမ်းမိုးမှု ကျဆင်းနိန်စွာ၊ သိသိသာသာ ဖြစ်နိန်ပါဗျာလ်။ အာကာထက်မှာ စာ ရွီးထားရေပိုင်ပါ။ တရုတ်နန့် အိန္ဒိယ နှစ်နိုင်ငံမှာ လူဦးရေ သန်း ၂၅၀၀ ကျော် ရှိပါရေ။ ယင်းအထဲက အရည်အချင်း ရှိရေ လူတိနန့်၊ နည်းပညာတိက ဥရောပတိုက်နန့် တန်းတူ ဖြစ်နိန်ပါဗျာလ်။ မစ္စတာ ဂျင်ခ်ခါ က ဥရောပတိုက် စည်းလုံးဖို့ လိုနိန်ဗျာလ်လို့ ပြောချင်ပုံ ရပါရေ။ သူ ပြောစွာ မှန်ပါရေ။ လာဖို့ နှစ် ၃၀ မှာ၊ ဂျာမဏီနိုင်ငံက လွှဲကေ၊ အီတလီ၊ ပြင်သစ် အစရှိရေ နိုင်ငံတိ၊ ဂျီ ၇ ထဲက ပျောက်လားပနာ၊ တရုတ်၊ အိန္ဒိယ နိုင်ငံရို့နန့် အစားထိုးလားပါလိမ့်မေ။”
“ပြဿနာက မစ္စတာ ဂျင်ခ်ခါ နန့် သူ့ရှိက ဥရောပ ကော်မရှန်တိက၊ တကဗာတည်းဆိုရေ သူရို့ ဂလိုဘဲလ်လဲ့ဆ် နိုင်ငံရေးဝါဒတိနန့်၊ ဗြီးခရေ ဆယ်စုနှစ်တိထဲမှာ၊ ဥရောပ စက်မှုဖွံ့ဖြိုးမှုကို ကျဆင်းလားအောင် ပြပြင်းထထန် လုပ်ခကတ်စွာပါ။ အဂု ကျွန်တော်ရို့ စက်မှုလုပ်ငန်းတိ အားလုံးက တရုတ်နိုင်ငံမှာ ထုတ်လုပ်နိန်ကတ်ပါဗျာလ်။ တဆင့်ခံ ကင်ထရပ်တာတိကလည်း တရုတ်နန့် အရှိတောင်အာရှမှာရာ ရှိနိန်ပါဗျာလ်။ ကျွန်တော်ရို့ ဥရောပတိုက်ကို စက်မှုဖွံ့ဖြိုးအောင် ပြန်လုပ်ဖို့ လိုနိန်ပါဗျာလ်။”
“အေချင့်လည်း သူ ပြောလားစွာပါ။ ကော်မရှန်နာတိ အပြောနန့် အလုပ် ညီဖို့ လိုနိန်ပါဗျာလ်။ ဥရောပကို စက်မှု ပြန်ဖွံ့ဖြိုးအောင် လုပ်ဖို့ဆိုကေ၊ ဥပမာ၊ အမေရီကန်ပြည်ထောင်စုကို ဒိုနဲဒ် ထရုန့်ပ် လုပ်နိန်ရေပိုင် လုပ်ရပါဖို့။ သူ့ လုပ်ရပ်တိက ဒေါသ ဖြစ်လောက်အောင်၊ တုံးတိုက်တိုက် ကျားကိုက်ကိုက် ဖြစ်နိန်ကေလည်း၊ အမှန်တကယ် ကြည့်ကေ၊ သူ့လုပ်ရပ်တိက မှန်ပါရေ။”
“သူ့ ပြောစကား နောက်ဆုံးမှာ၊ လူဉီးရေအရ ကျွန်တော်ရို့ နောက်ရောက်လားဗျာလ်ဆိုစွာလည်း မှန်ပါရေ။ ကျွန်တော်ရို့မှာ အချေတိ အရေအတွက် နည်းလားပါဗျာလ်။ ဥရောပမှာ လူငယ်ဇုံတွဲတိ၊ နှစ်ယောက်လုံး အလုပ် လုပ်ဖို့ လိုပါရေ။ သူရို့ အင်အားနန့် ထုတ်လုပ်နိုင်စွာက၊ ၅၅% လောက်ကို အခန်းခနန့် အခွန်အခတိအတွက် ပီးဖို့လိုပါရေ။ အေချင့်ကိုလည်း ပြောင်းဖို့လိုပါရေ။”
“ဥရောပက လက်ခံထားရေ အယူအဆတိ အများကြီး မှားနိန်ပနာ၊ ပြောင်းလဲဖို့ လိုနိန်ပါရေ။ အီတလီက လက်ဝဲ၊ လက်ယာ အစိုးရတိ၊ လူငယ်တိ သားသမီးတိ အများကြီးယူဆောင်၊ ဆွဲဆောင်မှုတိ မြူဆွယ်နိုင်မှရာ၊ လူဉီးရေကို တိုးတက်လာဇီနိုင်ပါဖို့။ လာဖို့ ၂၀၁၉ ခုနှစ် မေလ ဥရောပသမဂ္ဂ ရွီးကောက်ပွဲနောက်မှာ၊ နိုင်ငံရေး မူဝါဒ ပြောင်းလဲမှုတိ၊ အများကြီး လုပ်ကို လုပ်လားရပါဖို့။” လို့ အလွတ်သတင်းထောက် ရီဗတ် က ပြောလားပါရေ။
