ဆိန်ဂါပို(Singapore)နိင်ငံမှာ လုပ်လားရေ၊ ရာရှား-အာဆီယံ တွိဆုံပွဲ(Russia-ASEAN Summit)မှာ၊ ရာရှားနိုင်ငံမှာ ဆိန်ဂါပိုကုမ္ပဏီတိက၊ အမေရီကန်ဒေါ်လာ ၁ ဘီလီယံ(သန်း ၁ ထောင်)ကျော်ဖိုး ရင်းနှီးမြှပ်နှံဖို့အတွက်၊ နှစ်နိုင်ငံအကြား လက်မှတ်ရွီးထိုးလားကတ်ပါရေ။
“ရာရှား-ဆိန်ဂါပို ရင်းနှီးမြှပ်နှံမှု ကော်ပိုရေးရှန်းက ကြီးထွားလာနိန်ရေပိုင်၊ တခြား အာရှက စီးပွားရေးနိုင်ငံကြီးတိနန့် ဆက်ဆံရေးလည်း တိုးတက်လာရေ။” လို့ ရာရှား ဒါရိုက် ရင်းနှီးမြှပ်နှံမှု ရံပုံငွေ(Russian Direct Investment Fund (RDIF))အဖွဲ့ ဂေါင်းဆောင် ခီရဲလ် ဒီမီထရိဗ်(Kirill Dmitriev)က ပြောလားပါရေ။
နှစ်ဖက်သဘောတူစာချုပ်ထဲမှာ၊ ရာရှားနိုင်ငံ တာတာဆတန်(Tatarstan)မှာ ဓါတုစက်ရုံတိ တည်ဆောက်ဖို့စွာလည်း ပါပနာ၊ ရာရှားနိုင်ငံမှာ ဆိန်ဂါပိုနိုင်ငံက ရင်းနှီးမြှပ်နှံစွာ၊ အမေရီကန်ဒေါ်လာ ၁၇ ဘီလီယံ ကျော် ရှိဗျာလ်လို့၊ ဒီမီထရိဗ် က ပြောလားပါရေ။
#RDIF, #Singapore’s Indorama Corporation, one of the leading #chemical corporations in #Asia, and JSC Yadran-Oil have agreed to jointly implement investment projects in #Russia: https://t.co/qbrBIYzbry pic.twitter.com/ORghSWxXiC
— RDIF (@rdif_press) 14 November 2018
ရာရှား – အာဆီယံ တွိဆုံပွဲကို၊ ရာရှားသမ္မတ ဗလာဒီမာ ပူတိန်(Vladimir Putin)လည်း ပထမဆုံးအကြိမ် တက်ရောက်ခပနာ၊ ရာရှား – အာဆီယံ စီးပွားရေး ဆက်ဆံမှုက “တဇတဇ ကြီးထွားလာနိန်ပနာ”၊ အယင်နှစ်က ၃၅% ထိ တိုးတက်လာဗျာလ်၊ အမေရီကန်ဒေါ်လာ ၁၈.၃ ဘီလီယံဖိုးထိ ရှိခရေလို့ ပြောလားပါရေ။ အပြန်အလှန် ရင်းနှီးမြှပ်နှံမှု စုစုပေါင်းက အမေရီကန်ဒေါ်လာ ၂၅ ဘီလီယံ ကျော် ရှိပါရေ။
