ကဗာ့အကြီးဆုံး ၂၄ နာရီ စျီးရောင်းပွဲတော်နိ ဖြစ်တေ၊ တကိုယ်တည်းတိနိ(Singles Day)မှာ၊ တရုတ်ပြည်က အကြီးဆုံး အီးကူးသန်းရောင်းဝယ်ရေး(e-commerce) ကုမ္ပဏီကြီး၊ အာလီဘာဘာ(Alibaba)က အရောင်းစံချိန်တခုကို တင်လိုက်ပြန်ပါရေ။ အေဟင့်က အမေရီကန်ပြည်ထောင်စုနန့် ကုန်သွယ်ရေးစစ် ဖြစ်နိန်ရေအချိန်မှာတောင်၊ တရုတ်ပြည်တွင်းက ဖေသာသုံးနိုင်ဖြုန်းနိုင်လာပုံကို ထင်ဟပ်ပြနိန်ပါရေ။
တရုတ်နိုင်ငံမှာ နှစ်စဉ်နှစ်တိုင်း ၁ လေးလုံး ရှိရေနိ ၁၁/၁၁ (နိုဝင်ဘာလ ၁၁ ရက်နိ)ကို၊ တကိုယ်တည်းတိနိ လို့ သတ်မှတ်ပနာ၊ ယင်းနိမှာ အထူးစျီးရောင်းပွဲတော်ကို ၂၄ နာရီတိတိ ကျင်းပလေ့ရှိပါရေ။ အေဂု ၂၀၁၈ ခုနှစ် တကိုယ်တည်းတိနိမှာ၊ ၂၄ နာရီအတွင်း အမေရီကန်ဒေါ်လာ ၃၀.၈ ဘီလီယံ(သန်းပေါင်း ၃ သောင်း ၈ ရာ)ဖိုး ရောင်းခရရေလို့ ဆိုပါရေ။ အေပမာဏက အာမေဇုန် ပြိုင်းဒေး(Amazon’s Prime Day)၊ အမေရီကန်ပြည်ထောင်စုက ဘလတ်ခ် ဖြိုင်းဒေး(Black Friday)နန့် စိုင်ဘာ မင်းဒေး(Cyber Monday)ရို့မှာ ရောင်းရရေ စုစုပေါင်း ရောင်းအားထက် အများကြီး သာလွန်နိန်ပါသိမ့်ရေ။
အာလီဘာဘာမှာ လစဉ်လတိုင်း ပုံမှန်စျီးဝယ်နိန်ကတ်တေ လူဉီးရေ ၆၆၆ သန်း ရှိရေလို့ ဆိုပါရေ။ အေပမာဏက အမေရီကန်ပြည်ထောင်စုက လူဉီးရေ ပမာဏ ၂ ဆလောက် ရှိပါရေ။
“တရုတ်ပြည်မှာ (အလယ်အလတ် လူတန်းစားတိ) မြင့်တက်လာနိန်ရေ ပမာဏကို၊ ကုန်သွယ်ရေးစစ်ပွဲ ဖြစ်ဖြစ်၊ မဖြစ်ဖြစ်၊ တခုပိုင်လည်း ရပ်တန့်လို့ ရဖို့ မဟုတ်ပါ။” လို့ အာလီဘာဘာ အမှူဆောင် ဒုဥက္ကဌ ဂျိုး စိုင်း(Alibaba Executive Vice-Chairman Joe Tsai)က၊ တနင်္ဂနီနိမှာ ကုမ္ပဏီဝပ်ဆိုက်ဒ်က ပြောလိုက်ပါရေ။ ၂၀၃၀ ခုနှစ်ရောက်ကေ၊ တရုတ်ပြည်မှာ အလယ်အလတ် လူတန်းစား လက်ရှိ သန်း ၃၀၀ ကနိန်၊ သန်း ၈၅၀ ကို ရောက်လာဖို့လို့ စိုင်း က ခန်းမှန်းထားပါရေ။
တကိုယ်တည်းတိနိကို စ,လုပ်လာစွာ ၉ နှစ် ရှိလာပနာ၊ အစပိုင်းမှာ ပစ္စည်းအမျိုးအစား ၂၇ မျိုးကနိန်၊ အဂု ပစ္စည်းအမျိုးအစား ၁ သိန်း ၈ သောင်းထိ ရှိလာဗျာလ် ဖြစ်ပါရေ။
ယင်းနိမှာဗျာလ်၊ အာလီဘာဘာ ပြိင်ဖက်၊ ဂျေဒီ ဒေါ့တ် ကင်းမ်(JD.com)ကလည်း၊ အမေရီကန်ဒေါ်လာ ၂၃ ဘီလီယံ(သန်း ၂ သောင်း ၃ ထောင်)ဖိုး၊ ရောင်းရရေလို့ ဆိုပါရေ။ ဂျေဒီ ဒေါ့တ် ကင်းမ် ကို အမေရီကန်ပြည်ထောင်းစုက ဝါးလ်မာ့တ်(Walmart)၊ ဂိုဂဲလ်(Google) နန့် တရုတ်ပြည်က တန်းစန့်(Tencent) ကုမ္ပဏီကြီးတိက ကျောထောက်နောက်ခံ ပြုထားကတ်ပါရေ။
အာလီဘာဘာ အတွက် အေနှစ် ရောင်းရငွေ အမေရီကန်ဒေါ်လာ ၃၀.၈ ဘီလီယံစွာ၊ ၂၀၁၇ ခုနှစ် ရောင်းရငွေထက် ၂၇% မြင့်တက်လာပါရေ။ ယကေလည်း တနှစ်ပတ်လုံး ရောင်းရငွေက၊ ၂၀၁၇ ခုနှစ်ထက် ၃၉% ထိ ကျဆင်းလားရေလို့ ဆိုပါရေ။
လက်ရှိမှာ တရုတ်ပြည်က ကုန်သွယ်ရေး ၁၇.၅% ကိုရာ အီးကုန်သွယ်ရေး အွင်လိုင်း(online)မှာ ရောင်းနိုင်သိမ့်ရေအတွက်၊ နိုင်ငံတဝှမ်းလုံးက ကျန်ရေ ကုန်သွယ်ရေးလုပ်ငန်းတိကိုလည်း၊ ဒီဂျစ်တဲလ် အသွင်ကူးပြောင်းရေး(digitization)ကို၊ အာလီဘာဘာ က လုပ်ဆောင်လို့ ရှိပါရေ။