မော်စကို(Moscow)အစိုးရနန့်၊ ဟနွိုင်း(Hanoi)အစိုးရရို့အကြား၊ စီးပွားရေးအရ ဆက်ဆံမှုကို၊ တိုးမြှင့်လုပ်ဆောင်လားဖို့လို့၊ ရာရှားဝန်ကြီးချုပ်(Russian Prime Minister) ဒီမီထရီ မီဒီဗီဒဲ့ဗ်(Dmitry Medvedev)က ပြောလားပါရေ။ နောက်နှစ်အကုန်မှာ၊ နှစ်နိုင်ငံအကြားက ကုန်သွယ်ရေးကို၊ ၃ ဆလောက် တိုးမြှင့်လားဖို့အတွက်လည်း၊ နှစ်နိုင်ငံလုံးက သဘောတူထားကတ်ဗျာလ်လို့၊ မီဒီဗီဒဲ့ဗ် က ပြောလားပါရေ။
လက်ရှိမှာ မီဒီဗီဒဲ့ဗ် စွာ၊ ဗီယတ်နမ်နိုင်ငံကို အလည်အပတ်ရောက်ရှိနိန်ပနာ၊ ဗီယတ်နမ်ဝန်ကြီးချုပ် ဂူယန် စွန် ဖုပ်(Nguyen Xuan Phuc)နန့် တွိဆုံဗြီးပါဗျာလ်။
“(ရာရှား ဦးဆောင်ရေ) ယူရေးရှန်း စီးပွားရေး ပူးပေါင်းမှုအဖွဲ့(Eurasian Economic Union)နန့် ဗီယတ်နမ်နိုင်ငံအကြား၊ လွတ်လပ်တေ ကုန်သွယ်မှုစာချုပ်တခု(a free trade agreement)ကို၊ နီးနီးကပ်ကပ် ပူးပေါင်းဖို့နန့်၊ အကျိုးရှိရှိ ဖြစ်မြောက်လာအောင် လုပ်ဆောင်ကတ်ဖို့အတွက်၊ လက်မှတ်ရွီးထိုးဗြီးလားပါဗျာလ်။” လို့ ညဇာက ဗီဒီဗီဒဲ့ဗ် နန့် တွိဆုံလို့အဗြီး၊ သတင်းထောက်တိနန့် တွိဆုံစွာမှာ၊ ဖုပ် က ပြောလားပါရေ။
နှစ်နိုင်ငံအကြား စိုက်ပျိုးရေးထွက်ကုန်၊ ပင်လယ်အစားအစာ ကုန်သွယ်မှုတိကို တိုးမြှင့်လားပနာ၊ စွမ်းအင်ရင်းနှီးမြှပ်နှံမှု စီမံကိန်းတိ၊ ပူးပေါင်းလုပ်ဆောင်လားဖို့အတွက်လည်း ပြင်ဆင်လားကတ်ဖို့လို့ ဆိုပါရေ။
၂၀၁၈ ခုနှစ် ဂျန်နဝါရီလကနိန် သြော်ဂစ်လအတွင်း၊ ရာရှား – ဗီယတ်နမ် ကုန်သွယ်မှု ပမာဏက အမေရီကန်ဒေါ်လာ ၃.၃၇ ဘီလီယံ ရှိပနာ၊ အယင်နှစ်က ကုန်သွယ်မှုထက် ၃၆.၂% တိုးလာရေလို့ ဆိုပါရေ။ ရာရှားနိုင်ငံက ဗီယတ်နမ်နိုင်ငံကို တင်ပို့ရေ ကုန်စည်တိမှာ၊ စက်၊ စက်ပစ္စည်း၊ ဂျုံ၊ စားသောက်ကုန်၊ တွင်းထွက်ကုန်ကြမ်း၊ သတ္တု၊ အစရှိစွာတိ ပါပနာ၊ ဗီယတ်နမ်က တင်ပို့ရေ ကုန်စည်တိမှာ၊ လျှပ်စစ်အိန်ဂျိန်းနီးယားပစ္စည်းတိ၊ လျှပ်စစ်အိမ်သုံးပစ္စည်းတိ၊ လက်ကိုင်ဖုန်းတိ၊ အဝတ်အထည်တိ၊ စားသောက်ကုန်တိ၊ စိုက်ပျိုးရေးကုန်ကြမ်းပစ္စည်းတိ ပါရေလို့ ဆိုပါရေ။
ဗီယတ်နမ်နိုင်ငံစွာ၊ ရာရှားထွက် ဂျုံကို၊ အီဂျစ်(Egypt)၊ တာကီ(Turkey)၊ ဘန်ဂလာဒေ့ရှ်(Bangladesh)ရို့ဗြီးကေ၊ စတုတ္ထမြောက် အဝယ်အများဆုံး နိုင်ငံပါ။
ရနံ၊ ဓါတ်ငွေ့ ကဏ္ဍနန့်၊ လမ်းပန်းဆက်သွယ်ရေး ကဏ္ဍတိကိုလည်း၊ ပူးပေါင်းလားဖို့ ရှိရေလို့၊ မီဒီဗီဒဲ့ဗ် က ပြောလားပါရေ။ လက်ရှိမှာ ရာရှားနိုင်ငံက၊ ဗီယတ်နမ်နိုင်ငံထဲမှာ ရနံ၊ ဓါတ်ငွေ့ အပါအဝင်၊ စီမံကိန်း ၁ ရာကျော်မှာ ရင်းနှီးမြှပ်နှံနိန်ပနာ၊ တန်ဖိုး အမေရီကန်ဒေါ်လာ ၁ ဘီလီယံ ကျော်ဖိုး ရှိရေလို့ ဆိုပါရေ။
လွန်ခရေ ၃ နှစ်ကပင်၊ ဗီယတ်နမ်နိုင်ငံစွာ၊ ရာရှား ဦးဆောင်ရေ ယူရေးရှန်း စီးပွားရေး ပူးပေါင်းမှုအဖွဲ့(Eurasian Economic Union (EEU))ကို ဒေသတွင်း မဟုတ်တေ နိုင်ငံအဖြစ်၊ ပထမဆုံး ပူးပေါင်းပါဝင်လာရေ နိုင်ငံပါ။ လွတ်လပ်တေ ကုန်သွယ်မှုစာချုပ်အရ၊ ဗီယတ်နမ်နိုင်ငံထဲမှာ ရာရှားကားကုမ္ပဏီတိ ကားထုတ်လုပ်နိန်ပါရေ။