ဝါဝေ ဘဏ္ဍာရေးအရာရှိချုပ်(Huawei CFO) မန်း ဝမ်ဇူး(Meng Wanzhou)ကို ကန်နေဒါနိုင်ငံမှာ ဖမ်းထားပနာ၊ အမေရီကန်ပြည်ထောင်စုကို ပို့ဖို့ဆိုလို့၊ ညဇာက အမေရီကန်ပြည်ထောင်စုက အများပိုင် ကုမ္ပဏီကြီး ၃၀ ကို ပေါင်းထားရေ၊ ဒိုး ဂျုန်းစ်(Dow Jones) စတော့ရှယ်ယာတိ ၇၀၀ မှတ်ထိ ထိုးကျလားပါရေ။ ၂ ရက်အတွင်းမှာ ၁,၅၀၀ မှတ်ထိ ထိုးကျလားပါရေ။
ဗြီးခရေ တနင်္ဂနိန်နိက မန်းကို ကန်နေဒါနိုင်ငံ၊ ဗန်ကူဗာမြို့(Vancouver)မှာ အမေရီကန်ပြည်ထောင်စုက ဖမ်းခိုင်းလို့ဆိုပနာ၊ ကန်နေဒါအစိုးရက ဖမ်းလိုက်ပါရေ။ မန်းစွာ တရုတ်ဆက်သွယ်ရေးကုမ္ပဏီကြီး ဝါဝေက ဘဏ္ဍာရေးအရာရှိချုပ် ဖြစ်တေပိုင်၊ ကုမ္ပဏီကို တည်ထောင်ရေလူ သမီးလည်း ဖြစ်ဗျာလ်၊ ကုမ္ပဏီ ဘုတ်အဖွဲ့ ဒုဥက္ကဌလည်း ဖြစ်ပါရေ။ ဇာအတွက် ဖမ်းလေဆိုစွာကို အဂုထိ တိတိကျကျ မဖော်ပြသိမ့်ပါ။ စီးပွားရေး ပိတ်ဆို့ထားရေ၊ အီရန်နိုင်ငံနန့် စီးပွားရေး ဆက်သွယ်နိန်လို့ ဖြစ်တေလို့၊ ယူဆနိန်ကတ်ပါရေ။
ဝါဝေ ထိပ်ပိုင်း အရာရှိတယောက်ကို ဖမ်းလိုက်တေအတွက်၊ တရုတ် – အမေရီကန်ပြည်ထောင်စု ဆက်ဆံရေးက၊ ပိုဆိုးလာနိုင်ရေလို့ ယူဆနိန်ကတ်ပါရေ။
ဝါဝေကုမ္ပဏီစွာ ကဗာ့အကြီးဆုံး ဆက်သွယ်ရေးကုမ္ပဏီကြီးတိ အထဲမှာ ပါဝင်ရေပိုင်၊ ဆမာ့တ်ဖုန်းတိကို ဆမ်ဆောင်းကုမ္ပဏီ(Samsung) ဗြီးကေ၊ ကဗာ့ ဒုတိယ အများဆုံး ထုတ်တေ ကုမ္ပဏီကြီးပါ။ ဝါဝေ ဖုန်းတိက တဆင့်၊ တရုတ်အစိုးရကို သတင်းပို့ရေလို့ စွပ်စွဲထားပနာ၊ ဝါဝေ ဖုန်းတိကို အမေရီကန် ကာကွယ်ရေးဌာနမှာ မသုံးကတ်ဖို့ တားမြစ်ထားပါရေ။
ဗြိတိချ်နန့် နယူးဇီလန် ဆက်သွယ်ရေးကုမ္ပဏီကြီးတိက ဝါဝေ 5G ကို မသုံးဖို့ တားဆီးထားရေပိုင်၊ သြစတြီးလီးယား အစိုးရကလည်း၊ နောက်လိုက်ပနာ တားဆီးဖို့ ပြင်နိန်ပါရေ။ နောက်မျိုးဆက် ဆက်သွယ်ရေးစနစ်မှာ၊ နိုင်ငံ့လုံခြုံရေးအတွက်၊ တရုတ်ကုမ္ပဏီကို အယုံအကြည် မရှိလို့ ဆိုပနာ အကြောင်းပြကတ်ပါရေ။
ဝါဝေကတော့၊ နောက်ခံ သလျှိုလုပ်စွာ လုံးဝ မရှိလို့ အမြဲတမ်း ငြင်းဆိုထားပါရေ။ ဝါဝေကုမ္ပဏီစွာ ပြဌာန်းထားရေ ဥပဒေ၊ စည်းမျည်းစည်းကမ်းတိ အားလုံးကို စနစ်တကျ လိုက်နာရေလို့လည်း၊ မန်းကို ဖမ်းစွာနန့် ပတ်သတ်ပနာ၊ ကုမ္ပဏီကို သတင်းထုတ်ပြန်ထားပါရေ။
တရုတ်ပြည် ဘေဂျင်းအစိုးရကလည်း မန်းကို ချက်ချင်း လွှတ်ပီးဖို့ တောင်းဆိုထားပါရေ။ “အဖမ်းခံရရေ လူအတွက်၊ လူ့အခွင့်အရေးကို ကကောင်းကြီး ချိုးဖောက်ခံစွာ ဖြစ်တေ။” လို့လည်း၊ ကန်နေဒါနိုင်ငံ တရုတ်သံရုံးက သတင်းထုတ်ပြန်ထားပါရေ။ မန်းက “ကန်နေဒါနိုင်ငံနန့်၊ အမေရီကန်ပြည်ထောင်စုမှာ ပြဌာန်းထားရေ၊ တခု ဥပဒေကိုလည်း မချိုးဖောက်ဖူး။” လို့ ပြောလားပါရေ။