ကဗာထက်မှာ အသက်ရှင် ရပ်နိန်ရေ၊ လူတယောက်ဇီ ပျမ်းမျှ အကြွီးစွာ အမေရီကန်ဒေါ်လာ ၈၆,၀၀၀ ကို ရောက်လာဗျာလ်လို့ နိုင်ငံတကာ ငွေကြေး ရံပုံငွေအဖွဲ့ (International Monetary Fund (IMF))က ထုတ်ပြန်ရေ အစီရင်ခံစာမှာ တွိရပါရေ။ အမေရီကန်ပြည်ထောင်စု၊ တရုတ်နန့် ဂျပန်နိုင်ငံရို့က အကြွီးအထူဆုံး နိုင်ငံတိအဖြစ်၊ ထိပ်ဆုံးမှာ နိန်ရာယူထားကတ်ပနာ၊ တကဗာလုံး အကြွီး တဝက်ကျော်ကို ချီးယူထားကတ်ပါရေ။
အိုင်အမ်းအပ်ဖ် အဆိုအရ၊ ယင်းနိုင်ငံတိက ထုတ်လုပ်နိုင်စွာက၊ အကြွီးယူထားစွာက ပိုများနိန်ရေလို့ ဆိုပါရေ။ ထိပ်တန်း အကြွီးတင်ရေ နိုင်ငံတိ စရင်းထဲမှာ၊ တရုတ်နိုင်ငံ ပါလာစွာရေ၊ အသစ်စက်စက်သိမ့်လို့ ဆိုပါရေ။ ၂,၀၀၀ ခုနှစ် နှစ်စပိုင်းလောက်မှာ တရုတ်နိုင်ငံ အကြွီးစွာ၊ ကဗာ့အကြွီး တခုလုံးမှာ ၃% လောက်ရာ ရှိခစွာကနိန်၊ ၁၅% အထိ ခုန်တက်လာစွာက၊ ကဗာ့ ငွေကြေး ပဋိပက္ခနောက်ပိုင်းမှာ အကြွီးတိ တဇတဇ တက်လာစွာလို့ ဆိုပါရေ။
အိုင်အမ်းအပ်ဖ် အဆိုအရ၊ အဂု ကဗာ့အကြွီးစွာ အမေရီကန်ဒေါ်လာ ၁၈၄ ထရီလီယံ ကို စံချိန်တင် တက်လာဗျာလ်လို့ ဆိုပါရေ။ ၂၀၁၇ ခုနှစ် တကဗာလုံး စုပေါင်းထုတ်ကုန် ၂၂၅% နန့် ဆတူ ဖြစ်တေလို့ ဆိုပါရေ။ အေနှစ် အောင်တိုဘာလက ထုတ်ခရေ စရင်းထက် အမေရီကန်ဒေါ်လာ ၂ ထရီလီယံ ပိုနိန်ပါသိမ့်ရေ။
ဂျီဒီဒီ လို့ ခေါ်ရေ ကဗာ့အကြွီး အချက်အလက်(GDD (Global Debt Database))ထဲမှာ တကဗာလုံးက အစိုးရ၊ ပုဂ္ဂလိက ကဏ္ဍနှစ်လုံးက ချီးငှားကတ်စွာတိ အားလုံးပါဝင်ပနာ၊ ဒုတိယကဗာစစ် နောက်ပိုင်းမှာ အကြွီးအများဆုံး ပမာဏ ဖြစ်တေလို့ အိုင်အမ်းအပ်ဖ် က ဆိုပါရေ။ ဂျီဒီဒီ ဆိုစွာ၊ ၁၉၅၀ ခုနှစ် နောက်ပိုင်းက စ,ပနာ၊ နိုင်ငံပေါင်း ၁၉၀ ကျော်က အကြွီးတိကို စုပေါင်းထားရေ၊ အချက်အလက် တခုပါ။
