ဗြီးခရေ အောင်တိုဘာလကုန်မှာ ၁၂ လပြည့်ရေ ၁ နှစ် သက်တမ်းမှာ၊ ကဗာကြီး ချမ်းသာ ကြွယ်ဝမှုစွာ နောက်ထပ် အမေရီကန်ဒေါ်လာ ၁၄ ထရီလီယံ ထပ်တိုးလာပနာ၊ စုစုပေါင်း အမေရီကန်ဒေါ်လာ ၃၁၇ ထရီလီယံကို ရောက်လာဗျာလ်လို့ ခြတ်ဒိတ် ဆွိဆ် သုတေသနဌာန(Credit Suisse’s Research Institute)က ထုတ်တေ ကဗာ့ ကြွယ်ဝမှု အစီရင်ခံစာ (Global Wealth Report) မှာ တွိရပါရေ။
လက်ရှိ ကြွယ်ဝမှု ကြီးထွားနှုန်း ၄.၆ % က၊ ၂၀၁၇ ခုနှစ် ကြီးထွားနှုန်းထက် နည်းနိန်သိမ့်ကေလည်း၊ ၂၀၀၈ ခုနှစ် နောက်ပိုင်း၊ ပျမ်းမျှ ကြီးထွားနှုန်းထက် ပိုများရေလို့ ဆိုပါရေ။ အမေရီကန်ဒေါ်လာ သန်း ၅၀ အထက် ချမ်းသာရေ လူ ပမာဏလည်း၊ ၄ % ထပ်များလာပနာ၊ ၁၄၉,၈၉၀ ယောက် ရှိလာဗျာလ်လို့ ဆိုပါရေ။
ယင်း လူချမ်းသာတိ အများဆုံး နိန်ကတ်တေ နိုင်ငံ ၁၀ နိုင်ငံကို၊ အောက်ကနိန် စရွီပြရဖို့ဆိုကေ ….
၁၀) သြစတြီးလီးယားနိုင်ငံ
အိန္ဒိယသမုဒ္ဒရာနန့် ပစိဖိတ်သမုဒ္ဒရာရို့ကို နောက်ခံထားရေ၊ သြစတြီးလီးယားနိုင်ငံစွာ၊ ကဗာမှာ ၁၃ နိုင်ငံမြောက် စီးပွားရေးအင်အားကြီးနိုင်ငံ ဖြစ်ပနာ၊ လူတယောက်ချင်း ပျမ်းမျှဝင်ငွေကို တိုင်းပြည်စုပေါင်းထုတ်ကုန် ဂျီဒီပီနန့်ရာ တွက်ကြည့်ဖို့ဆိုကေ၊ ကဗာမှာ ၆ နိုင်ငံမြောက် ဝင်ငွေ အကောင်းဆုံး နိုင်ငံတခုပါ။ ဘဝအရည်အသွေး၊ ကျန်းမာရေး စောင့်ရှောက်မှုနန့်၊ ပညာရေး အရည်အသွေးကလည်း ကဗာ့ အဆင့် ၁ နိုင်ငံတိ စရင်းထဲမှာ ဝင်ပါနိန်ပါရေ။
အမေရီကန်ဒေါ်လာ သန်း ၅၀ အထက် ချမ်းသာရေ လူအယောက်ပေါင်း ၂,၉၁၀ လည်း သြစတြီးလီးယားနိုင်ငံမှာ နိန်ထိုင်လို့ ရှိကတ်ပါရေ။
၉) ကန်နေဒါနိုင်ငံ
ငြိမ်းချမ်းမှု ရှိပနာ၊ လူမျိုးရေးနန့် ပြည်တွင်း ပဋိပက္ခ ကင်းရေ၊ ကန်နေဒါနိုင်ငံစွာ ကဗာ့ ကုန်သွယ်မှု အများဆုံး ၁၀ နိုင်ငံထဲမှာ ပါဝင်နိန်ပါရေ။ ဂျီ ၇(Group of Seven)နန့် အိုအီးစီဒီ(Organization for Economic Co-operation) အဖွဲ့ဝင် နိုင်ငံလည်း ဖြစ်နိန်ပါရေ။
ကန်နေဒါနိုင်ငံမှာ အမေရီကန်ဒေါ်လာ သန်း ၅၀ နန့် အထက် ချမ်းသာရေလူ ၃,၀၁၀ ယောက် နိန်ထိုင်လို့ ရှိပါရေ။
၈) ပြင်သစ်နိုင်ငံ
ပြင်သစ်နိုင်ငံစွာ ကဗာ့ စီးပွားရေး အင်အားကြီးနိုင်ငံတိ အထဲက နိုင်ငံ တခုပါ။ ရိုးရာယဉ်ကျေးမှု အမွီအနှစ်တိနန့် ပြည့်နှက်နိန်ရေပိုင်၊ ပြည်ပက လူတိ လှိုင်းလုံးတိပိုင်၊ အပြုံလိုက် အပြုံလိုက် ခိုဝင်လာစွာကို နှစ်ဆယ်ချီပနာ ကြုံနိန်ရရေ နိုင်ငံလည်း ဖြစ်ပါရေ။
ပြင်သစ်နိုင်ငံမှာ အမေရီကန်ဒေါ်လာ သန်း ၅၀ နန့် အထက် ချမ်းသာရေ လူ ၃,၀၄၀ ယောက် နိန်ထိုင်လို့ ရှိပါရေ။
၇) အီတလီနိုင်ငံ
ဥရောပသမဂ္ဂအထဲမှာ တတိယမြောက် စီးပွားရေးအင်အားကြီးနိုင်ငံပါ။ လက်ရှိမှာ စီးပွားရေး၊ နိုင်ငံရေး ပဋိပက္ခတိ အများကြီး ကြုံနိန်ရပါရေ။
ယကေလည်း အီတလီနိုင်ငံမှာ အမေရီကန်ဒေါ်လာ သန်း ၅၀ နန့် အထက် ချမ်းသာရေ လူ ၃,၂၂၀ ယောက် နိန်ထိုင်လို့ ရှိပါရေ။
၆) အိန္ဒိယနိုင်ငံ
အိန္ဒိယနိုင်ငံစွာ၊ နှစ် ၂၀ အတွင်းမှာ ၅.၅ % နှုန်းနန့် စီးပွားရေး အင်အားကြီးလာရေ နိုင်ငံတခုပါ။ စီးပွားရေးက တရိပ်ရိပ် တက်နိန်တုန်းပါ။ အင်္ဂလိပ်စကား ကောင်းကောင်းပြောနိုင်ရေ ပညာတတ်တိများလို့၊ နိုင်ငံတကာ စီးပွားရေးကော်ပိုရေးရှန်းကြီးတိ အများကြီးရှိရေ နိုင်ငံလည်း ဖြစ်ပါရေ။
အိန္ဒိယနိုင်ငံမှာ အမေရီကန်ဒေါ်လာ သန်း ၅၀ နန့် အထက်၊ ချမ်းသာရေ လူ ၃,၄၀၀ ယောက် ရှိနိန်ပါရေ။
၅) ဂျပန်နိုင်ငံ
လူနိန်မှု အဆင့်အတန်း မြင့်မားစွာမှာ နာမေကြီးရေ ဂျပန်နိုင်ငံမှာ၊ အမေရီကန်ဒေါ်လာ သန်း ၅၀ နန့် အထက် ချမ်းသာရေ လူ၊ ၃,၅၈၀ ယောက် ရှိနိန်ပါရေ။ ဂျပန်နိုင်ငံ စီးပွားရေးကို အဓိက တွန်းအားပီးရေ ဂဏ္ဍတိက ဘဏ်လုပ်ငန်း၊ ဖုန်းဆက်သွယ်ရေးလုပ်ငန်း၊ အိမ်ခြံမြေလုပ်ငန်း၊ ပို့ဆောင်ရေးလုပ်ငန်း၊ လက္ကားဖြန့်ဝေရေးလုပ်ငန်းနန့်၊ ဆောက်လုပ်ရေးလုပ်ငန်းရို့ ဖြစ်ကတ်ပါရေ။ ကားထုတ်လုပ်ငန်း၊ လျှပ်စစ်အသုံးအဆောင်ပစ္စည်းထုတ်လုပ်ငန်း၊ ဆတီးလုပ်ငန်း၊ သင်္ဘောဆောက်လုပ်ငန်း၊ ဓါတုလုပ်ငန်းနန့်၊ အစားအသောက်ထုတ်လုပ်ငန်းတိမှာလည်း၊ ဂျပန်နိုင်ငံက ထိပ်ဆုံးအဆင့်လောက်မှာ ရှိနိန်ပါရေ။
၄) ဗြီတိန်နိုင်ငံ
ဗြီတိန်နိုင်ငံ အဓိက စီးပွားရေးလုပ်ငန်းက ဝန်ဆောင်မှုလုပ်ငန်းပါ။ နိုင်ငံ ပြည်တွင်းထုတ်လုပ်မှု ၇၅% လောက်စွာ ဝန်ဆောင်မှုလုပ်ငန်းက ဝင်ငွေပါ။ ဘဏ်လုပ်ငန်းက အဓိက အကျဆုံးဖြစ်ပနာ၊ လန်ဒန်မြို့တော်ကြီးက ကဗာ့ငွေကြေးဗဟိုဌာနအဖြစ် ရပ်တည်နိန်ပါရေ။ ယင်းအတွက်နန့် ဗြီတိန်နိုင်ငံမှာ အမေရီကန်ဒေါ်လာ သန်း ၅၀ နန့် အထက် ချမ်းသာရေ လူ၊ ၄,၆၇၀ ယောက် နိန်ထိုင်လို့ရှိစွာက၊ အံ့သြစရာတော့ မဟုတ်လို့ ထင်ပါရေ။
၃) ဂျာမဏီနိုင်ငံ
ဂျာမဏီနိုင်ငံက စက်မှုလုပ်ငန်းနန့် နည်းပညာလုပ်ငန်းတိမှာ ကဗာ့ထိပ်တန်းနိုင်ငံအဖြစ် ရပ်တည်နိန်ပါရေ။ ကုန်ပစ္စည်း တင်ပို့စွာနန့်၊ တင်သွင်းစွာမှာလည်း ကဗာ့တတိယမြောက် အများဆုံး နိုင်ငံဖြစ်ပါရေ။ စီးပွားရေး ကောင်းရေ နိုင်ငံဖြစ်လို့၊ လူမှုအထောက်အပံ့တိ ကောင်းရေပိုင်၊ ကျန်းမာရေးနန့် သဘာဝပတ်ဝန်းကျင် စောင့်ရှောက်မှုကလည်း ထိပ်ဆုံးမှာ ရှိပါရေ။ အဆင့်မြင့်ပညာကိုလည်း အခမဲ့ သင်ကြားနိုင်ပါရေ။
အမေရီကန်ဒေါ် သန်း ၅၀ နန့် အထက် ချမ်းသာရေ လူ၊ ၆,၃၂၀ ယောက် ဂျာမဏီနိုင်ငံမှာ နိန်ထိုင်လို့ ရှိကတ်ပါရေ။
၂) တရုတ်နိုင်ငံ
ဗြီးခရေ နှစ် ၃၀ ထဲမှာ တရုတ်နိုင်ငံ စီးပွားရေး ဒေါက်လျှောက် ထိုးတက်လာပါရေ။ တရုတ်နိုင်ငံမှာ ကိုယ်ပိုင် ပညာရေးစနစ် ရှိပါရေ။ တရုတ်နိုင်ငံမှာ ပြည်ပက နည်းပညာတိကို တင်သွင်းဖို့နန့်၊ ယင်းနည်းပညာတိကို ထပ်တိုးတက်အောင် လုပ်ဖို့ ကကောင်း အားပီးပါရေ။ ကွင်ပျူတာ ဆော့ဖ်ဝဲနည်းပညာတိ၊ ကုန်ကြမ်းသစ်တိ၊ ဖုန်းဆက်သွယ်ရေးနည်းပညာတိ၊ ဇီဝနည်းပညာတိ၊ ကျန်းမာရေးဝန်ဆောင်မှုတိကို ကကောင်း အလေးပီးစွာကိုလည်း တွိရပါရေ။
တရုတ်နိုင်ငံမှာ အမေရီကန်ဒေါ်လာ သန်း ၅၀ နန့် အထက် ချမ်းသာရေ လူ၊ ၁၆,၅၁၀ ယောက် ရှိနိန်ပါဗျာလ်။
၁) အမေရီကန်ပြည်ထောင်စု
အမေရီကန်ပြည်ထောင်စုစွာ ကဗာ့အကြီးဆုံး စီးပွားရေးအင်အားကြီးနိုင်ငံ ဖြစ်တေပိုင်၊ ပျမ်းမျှ လုပ်ခလစာ၊ လူ့ ဖွံ့ဖြိုးမှု ညွှန်းကိန်း၊ ပြည်တွင်းထုတ်လုပ်မှုနန့် ယှဉ်ရေ လူတယောက်ချင်း ဝင်ငွေ၊ ကုန်ပစ္စည်း ထုတ်လုပ်မှု အစရှိရေ လူမှုရေး၊ စီးပွားရေးဂဏ္ဍတိမှာလည်း ဦးဆောင်နိုင်ငံ ဖြစ်ပါရေ။ အမေရီကန်ပြည်ထောင်စုမှာ ကဗာ့လူဉီးရေ ၄.၃% လောက်ရာ နိန်ထိုင်ကတ်ကေလည်း၊ ကဗာ့ချမ်းသာကြွယ်ဝမှု ၄၀% လောက်ကို ပိုင်ဆိုင်ထားကတ်ပါရေ။
အမေရီကန်ပြည်ထောင်စုမှာ အမေရီကန်ဒေါ်လာ သန်း ၅၀ နန့် အထက် ချမ်းသာရေ လူ၊ ၇၀,၅၄၀ ယောက် နိန်ထိုင်လို့ ရှိပါရေ။