မလေးရှားအစိုးရ အမေရီကန်ဘဏ်ကို ဒေါ်လာ ၇.၅ ဘီလီယံ လျှော်ကြေးတောင်း

0
4193
Kuala Lumpur © Pexels / Zukiman Mohamad
Kuala Lumpur © Pexels / Zukiman Mohamad

နိုင်ငံတော်ဘဏ္ဍာ အလွှဲသုံးစား လုပ်စွာတိကို ဖုံးဖိပနာ၊ အကူအညီ ပီးခရေအတွက်၊ ဝါးဆြိတ်(Wall Street) ရင်းနှီးမြှပ်နှံမှုဘဏ် ဂိုးလ်မန်း ဆာ့ချ် (Goldman Sachs)ကို မလေးရှားအစိုးရက အမေရီကန်ဒေါ်လာ ၇.၅ ဘီလီယံ အလျှော်တောင်းရေလို့ ဘဏ္ဍာရေးဝန်ကြီးကို ကိုးကားပနာ သတင်းတိမှာ ဖော်ပြစွာကို တွိရပါရေ။

ဗြီးခရေ တနင်္လာနိက၊ အမေရီကန်ပြည်ထောင်စုက ဘဏ်နန့် ဘဏ်အကြီးအကဲ ၂ ယောက်ကို၊ ဒေါ်လာ ဘီလီယံ ချီရေ လိမ်လည်မှုမှာ ပါဝင်ပတ်သတ်တေဆိုပနာ၊ ရာဇဝတ်ပြစ်မှုနန့် တရားစွဲရေလို့ ဆိုပါရေ။ ဂိုးလ်မန်း ဆာ့ချ် ဘဏ်ကို၊ 1MDB လို့ နာမေကြီးရေ မလေးရှားအစိုးရပိုင် ဖေသာတိကို၊ မလိမ့်တပတ် လုပ်ပနာ ခိုးထုတ်တေ၊ အရာရှိတိကို လာဘ်ထိုးရေ၊ မဟုတ်မမှန် ဖြေရှင်းချက်တိ ပီးရေ ဆိုပနာ၊ အစွပ်စွဲ ခံထားရပါရေ။ ဘဏ်ကတော့ခါ အယင် လာဘ်စားရေ မလေးရှားအစိုးရဟောင်း လုပ်ရပ်တိအတွက်၊ မတော်မတရား အပြစ်ပုံချခံရစွာရာဖြစ်တေလို့ ပြောပါရေ။

1MDB လိမ်လည်မှုကြီးမှာ၊ တရားဥပဒေ ချိုးဖောက်မှုတိအတွက်၊ အမေရီကန်ဒေါ်လာ ၁.၈ ဘီလီယံ လျှော်ရဖို့များနိန်ဗျာလ်လို့၊ ဂိုးလ်မန်း ဆာ့ချ် ဘဏ်က ပြောစွာကို၊ မလေးရှားဘဏ္ဍာရေးဝန်ကြီး လိမ်း ဂွင် အန်း(Lim Guan Eng)နန့်၊ ဖိုင်နန်ရှဲလ်တိုင်း(Financial Times) သတင်းစာ အိန်တာဗျူးကို ကိုးကားပနာ၊ ရိုင်တာဆ်(Reuters) သတင်းတပုဒ်မှာ ဖော်ပြထားစွာကိုလည်း တွိရပါရေ။

“ယင်းသူရို့က အမေရီကန်ဒေါ်လာ ၁.၈ ဘီလီယံ လို့ ပြောပါရေ။ ကျွန်တော်ရို့ဖက်ကတော့ အမေရီကန်ဒေါ်လာ ၇.၅ ဘီလီယံ ပါ။” လို့ လိမ်း က ပြောလားပါရေ။

မလေးရှားအစိုးရက ဂိုးမန်း ဆာ့ချ် ဘဏ်ဘားက၊ အမေရီကန်ဒေါ်လာ ၆ ဘီလီယံ တန်ဖိုးရှိရေ အစုရှယ်ယာ ဘင်းဒ်(bonds)တိအပြင်၊ နောက်ထပ် အမေရီကန်ဒေါ်လာ ၁ ဘီလီယံ လည်း ထပ်လိုချင်ရေလို့ ဆိုပါရေ။

မလေးရှားနိုင်ငံက ဝန်ကြီးချုပ်ဟောင်း နာဂျစ် ရာဇာတ်(Najib Razak) ဦးဆောင်ရေ၊ အစိုးရဟောင်းအဖွဲ့က နိုင်ငံပိုင်ဖေသာတိ လိမ်ခစွာကို၊ အဂုအခါ နိုင်ငံ ၆ နိုင်ငံမှာ စစ်ဆေးနိန်ပနာ၊ ယင်းအမှုမှာ လက်တွဲ ပါဝင်ခရေအတွက် ဂိုးလ်မန်း ဆာ့ချ် ဘဏ်လည်း တရက်တခြား နာမေ ကျဆင်းနိန်ပါရေ။ လွန်ခရေ မာ့ချ်လက ဂိုးလ်မန်း ဆာ့ချ် ဘဏ်စတော့ရှယ်ယာတခုကို အမေရီကန်ဒေါ်လာ ၂၇၀ ရှိခစွာကနိန်၊ အဂုအခါ အမေရီကန်ဒေါ်လာ ၁၆၈ ထိ ကျဆင်းလားစွာကိုလည်း တွိရပါရေ။