တရုတ် တပတ်တလမ်း ကုန်သွယ်မှု ၅ နှစ်တွင်းမှာ ဒေါ်လာ ၅ ထရီလီယံ ကျော် ရှိလာ

0
5943
© Global Look Press
© Global Look Press

၂၀၁၃ ခုနှစ်က စပနာ ကြေငြာခရေ၊ အမေရီကန်ဒေါ်လာ ထရီလီယံ(သန်း ၁ သန်း)ပေါင်း အများကြီး အကုန်အကျခံဖို့၊ တပတ်တလမ်း အစပျိုးအစီအစဉ်(Belt and Road Initiative (BRI))စွာ အဂုဆိုကေ ၅ နှစ်သက်တမ်းထဲကို ရောက်နိန်ပါဗျာလ်။ နိုင်ငံပေါင်း ၂၄ နိုင်ငံက တပတ်တလမ်း လမ်းမတလျှောက်မှာ၊ တရုတ်ကုမ္ပဏီတိက စီးပွားရေး ပူးပေါင်းမှု ဇုန် ၈၂ ခုကိုလည်း တည်ဆောက်ဗြီးပါဗျာလ်။

အေစီမံကိန်းက ဘီအာရ်အိုင် အဖွဲ့ဝင်နိုင်ငံတိမှာ၊ အလုပ်အကိုင်ပေါင်း ၂၄၀,၀၀၀ ကိုလည်း ခန့်ထားဗြီးဗျာလ်လို့ တရုတ်ထိပ်တန်းသံတမန် ယန် ဂျီချီ(Yang Jiechi)က ပြောပါရေ။

“လွန်ခရေ ၅ နှစ်အတွင်းမှာ၊ တရုတ်နိုင်ငံနန့် တပတ်တလမ်း အဖွဲ့ဝင်နိုင်ငံတိ အကြားမှာ၊ အမေရီကန်ဒေါ်လာ ၅ ထရီလီယံ ကျော်ဖိုးရှိရေ ကုန်ပစ္စည်း ကုန်သွယ်မှုတိ ရှိခကတ်ပနာ၊ တိုက်ရိုက် ရင်းနှီးမြှပ်နှံမှုကလည်း အမေရီကန်ဒေါ်လာ ၇၀၀ ဘီလီယံ ရှိခရေ။” လို့ တရုတ်ကွန်မြူနစ်ပါတီ၊ နိုင်ငံခြားရေးဌာန ဂေါင်းဆောင် ယန် ဂျီချီ က ပြောပါရေ။

တရုတ်နိုင်ငံနန့် ဥရောပတိုက်က မြို့ကြီး ၁၀၀ ကျော်ကို၊ ကုန်ရထားပေါင်း ၁၁,၀၀၀ ကျော်လည်း ဗြီးဆွဲဗြီးဗျာလ်လို့ ဆိုပါရေ။

တရုတ်-ပါကစ္စတန် စီးပွားရေး ဆက်သွယ်ရေးလမ်း ဗြီးလားလို့၊ တောင်အာရှထဲမှာ ပါရေ၊ ပါကစ္စတန်နိုင်ငံ ပြည်တွင်းထုတ်ကုန် ဂျီဒီပီ ၂% ထပ်တိုးလာရေလို့ ယန် က ဆက်ပြောလားပါရေ။ မွင်းဘာဆာ-နိုင်ရိုဘီ ပုံမှန် စံထား ရထားလမ်း(Mombasa-Nairobi Standard Gauge Railway)ရာ ဗြီးလားခကေ၊ ကန်ညာနိုင်ငံ ပြည်တွင်းထုတ်ကုန် ဂျီဒီပီ လည်း ၁.၅% ထပ်တိုးလာဖို့လို့ ယန် က ဆိုပါရေ။

တပတ်တလမ်း လမ်းစွာ၊ အယင်က ရှိခရေ ပိုးလမ်းမကြီးကို အသစ် ပြန်ဖန်တီးထားပနာ၊ ယင်းစီမံကိန်းမှာ ပါဝင်ဖို့အတွက်၊ နိုင်ငံပေါင်း ၁၄၀ ကျော်က သဘောတူ လက်မှတ်ရွီးထိုးထားကတ်ပါရေ။ အေစီမံကိန်းစွာ အရှိအာရှ၊ ဥရောပနန့်၊ အရှိအာဖရိက တိုက်တိကို ဆက်သွယ်ဖို့ စီးပွားရေးကို အခြေခံထားရေ လမ်းမကြီးတခု ဖြစ်ပါရေ။