ကဗာ့အကြီးဆုံး အခွန်ကင်း ကုန်သွယ်ရေးဇုန် ဖြစ်ဖို့ အာဖရိကတိုက် ပြင်ဆင်

0
4916
© Pexels.com
© Pexels.com

အေလထဲမှာ၊ တောင်အာဖရိကနိုင်ငံနန့် တိုဂိုနိုင်ငံရို့က ပါလီမန်တိမှာ၊ အာဖရိကတိုက်လုံးဆိုင်ရာ အခွန်ကင်းမဲ့ ဧရိယာ(African Continental Free Trade Area (AfCFTA)) ဖြစ်လာဖို့အတွက်၊ အချောသတ် ပြင်ဆင်နိန်ကတ်ပါရေ။ အဂု ပါဝင်ရေ နိုင်ငံအရေအတွက်က ၄၉ နိုင်ငံကို ရောက်လာပါဗျာလ်။

အေသဘောတူညီမှုရာ အတည်ဖြစ်လားကေ၊ နိုင်ငံပေါင်း ၅၅ နိုင်ငံ၊ လူပေါင်း သန်း ၁,၂၀၀ နန့်၊ ထုတ်လုပ်မှုတန်ဖိုး စုစုပေါင်း အမေရီကန်ဒေါ်လာ ၃ ထရီလီယံ ရှိရေ၊ ကဗာ့အကြီးဆုံး အခွန်ကင်း ကုန်သွယ်ရေးဇုန်ကြီးတခု ဖြစ်လာပါဖို့။

ဧရိယာအားဖြင့်လည်း၊ ကဗာ့အကြီးဆုံး အခွန်ကင်း ကုန်သွယ်မှုဇုန် ဖြစ်လာဖို့လို့၊ တောင်အာဖရိက ကုန်သွယ်ရေးနန့် စက်မှုဝန်ကြီး ရော့ဘ် ဒေးဗီးဆ်(Rob Davies)က ပြောလားပါရေ။

လောလောဆယ် ရှိနိန်ရေ ပျမ်းမျှ တင်ပို့ခွန် ၆.၁% ကို ချော့ချနိုင်ဖို့နန့်၊ အာဖရိကတိုက်အတွင်းမှာ သွင်းကုန်ခွန်တိကိုရာ ကင်းလွတ်ခွင့်ပီးခရေ၊ ကုန်သွယ်ရေး ၅၂% ထပ်မြင့်လာဖို့အတွက် အဓိက ရည်ရွယ်ရေလို့ ဆိုပါရေ။

အခွန်ကင်း ကုန်သွယ်ရေးဇုန် ဖြစ်လာဖို့အတွက်၊ အနည်းဆုံး ၂၂ နိုင်ငံ သဘောတူဖို့ လိုပနာ၊ လက်ရှိမှာ ၁၅ နိုင်ငံ သဘောတူထားဗျာလ်၊ ၇ နိုင်ငံရာ ထပ်သဘောတူဖို့ လိုဗျာလ်လို့ ဆိုပါရေ။

လာဖို့ ၂၀၁၉ ခုနှစ် ဖေဘြူဝါရီလထဲမှာ ကျင်းပဖို့ရှိရေ၊ အာဖရိက ပြည်ထောင်စု(African Union’s (AU) ညီလာခံမှာ၊ အားလုံး အဆင်ပြေလားပါလိမ့်မေလို့၊ အာဖရိက ပြည်ထောင်စု ကုန်သွယ်ရေးနန့် စက်မှုဝန်ကြီး အဲလ်ဘာ့တ် မူရှန်ဂါ(Albert Muchanga)က ပြောလားပါရေ။

အာဖရိကတိုက်လုံးဆိုင်ရာ အခွန်ကင်း ကုန်သွယ်ရေး သဘောတရားကို ၂၀၁၂ ခုနှစ်မှာ လက်ခံခကတ်ပနာ၊ ၂၀၁၅ ခုနှစ်မှာ မူကြမ်းကို ရွီးခနိုင်ကတ်ပါရေ။ ဗြီးခရေ မာ့ချ်လက၊ ရဝန်ဒါနိုင်ငံမှာ အာဖရိကတိုက် ၄၄ နိုင်ငံက ဂေါင်းဆောင်တိ၊ သဘောတူ လက်မှတ်ထိုးခကတ်ပါရေ။ ကျန်ရေ အာဖရိကနိုင်ငံတိလည်း ပါဝင်ဖို့ ပြင်ဆင်နိန်ကတ်ပါရေ။ အေ အာဖရိကအခွန်ကင်းကုန်သွယ်ရေးဇုန်မှာ ဘုံဖေသာတခုကို သုံးဖို့အတွက်လည်း ပြင်ဆင်နိန်ကတ်ပါရေ။