အမေရီကန်ပြည်ထောင်စုနန့် ကန်နေဒါနိုင်ငံရို့မှာ၊ အေခရစ္စမာ့ဆ်အတွင်း ဆခြောက်(ဂင်ဇာ) လက်ဆောင် ပီးကတ်စွာက၊ ကကောင်း ပေါ်ပျူလာဖြစ်နိန်ပါရေ။
အေအားလပ်ရက်တိမှာ ဆခြောက်ဝယ်ရေ လူတိ၊ အနည်းဆုံး ၅ ဆလောက် မြင့်တက်လာရေလို့၊ ဆခြောက် ထုတ်တေ လူတိက ဆိုပါရေ။
အမေရီကန်ပြည်ထောင်စု၊ ကယ်လီဖိုးနီးယားပြည်နယ်၊ ဘေဧရိယာ( )မှာ ဆခြောက်ဝယ်ဖို့ လူတိ တန်းစီပနာ စောင့်နိန်ကတ်စွာကိုလည်း တွိရပါရေ။
အဂု အမေရီကန်ပြည်ထောင်စုက ပြည်နယ် ၃၃ ခုမှာ၊ ဆခြောက်ကို တရားဝင် ရောင်းခွင့်ပီးထားပနာ၊ ဆခြောက် ဝယ်ဖို့ လူစွာ၊ အနည်းဆုံး အသက် ၂၁ နှစ်နန့် အထက် ရှိရဖို့လို့ သတ်မှတ်ထားပါရေ။
အေနှစ် အစောပိုင်းက၊ ကန်နေဒါနိုင်ငံမှာလည်း ဆခြောက်ကို တရားဝင် ရောင်းချခွင့်ပီးလိုက်ပနာ၊ ခရစ္စမာ့ဆ်အတွင်း လက်ဆောင်ပီးဖို့၊ ဆခြောက်ကို အလုအယက် တန်းစီပနာ ဝယ်နိန်ကတ်စွာကိုလည်း တွိရပါရေ။
ကဗာမှာ ပထမဆုံး ဆခြောက်ကို တရားဝင် ရောင်းချခွင့်ပီးရေ နိုင်ငံက ဥရုဂွေးနိုင်ငံပါ။ ၂၀၁၃ ခုနှစ်ကပင် တရားဝင် ရောင်းချခွင့်ပီးခပါရေ။ ဒုတိယနိုင်ငံက ကန်နေဒါနိုင်ငံပါ။
ဗြီးခရေ အင်္ဂါနိက ထိုင်းနိုင်ငံမှာလည်း၊ ဆခြောက်ကို တရားဝင် ရောင်းချခွင့်ပီးခရေအတွက်၊ အာရှတိုက်ထဲမှာ ပထမဆုံး ဆခြောက်ကို တရားဝင် ရောင်းချနိုင်ရေ နိုင်ငံ ဖြစ်လာပါရေ။