နောက်နှစ်မှာ ရာရှား စီးပွားရေးက ဂျာမဏီကို ကျော်လားဖို့

Red Square, Moscow © Reuters / Tatyana Makeyeva
Red Square, Moscow © Reuters / Tatyana Makeyeva

အနောက်အုပ်စုက စီးပွားရေး ပိတ်ဆို့ထားကေလည်း၊ နောက်နှစ်မှာ ရာရှားနိုင်ငံက ဂျာမဏီနိုင်ငံကို ကျော်ပနာ၊ ပဥ္စမမြောက် ကဗာ့စီးပွားရေး အင်အားအကြီးဆုံးနိုင်ငံ ဖြစ်လာဖို့လို့ နိုင်ငံတကာမှာ ဖွင့်လှစ်ထားရေ၊ လင်ဒင်မြို့ အခြေစိုက် ဆတန်းဒါ့ဒ် ချာတာ့ဒ်(Standard Chartered)ဘဏ်က ထုတ်တေ၊ ရေရှည်အတွက် တွက်ထားရေ၊ နောက်ဆုံး အစီရင်ခံစာ တစောင်မှာ ဖော်ပြထားပါရေ။

ယင်းအစီရင်ခံစာက ၂၀၃၀ ခုနှစ်အထိ တွက်ချက်ထားပနာ၊ နောက်နှစ်မှာ တရုတ်နိုင်ငံက အမေရီကန်ပြည်ထောင်စုကို ကျော်ပနာ၊ ကဗာ့စီးပွားရေး အင်အားအကြီးဆုံးနိုင်ငံ ဖြစ်လာဖို့လို့၊ ပီပီပီ(purchasing-power-parity (PPP))လို့ အတိုကောက်ခေါ်ရေ၊ တယောက်ချင်း ဝယ်ယူသုံးစွဲနိုင်မှုအင်အားနန့် ဂျီဒီပီ(gross domestic product) စုစုပေါင်းပြည်တွင်းထုတ်ကုန်ကို အခြေခံပနာ တင်ပြထားပါရေ။ နောက်နှစ် ကဗာ့စီးပွားရေး အင်အားအကြီးဆုံး ၅ နိုင်ငံမှာ တရုတ်၊ အမေရီကန်ပြည်ထောင်စု၊ အိန္ဒိယ၊ ဂျပန် နန့် ရာရှား ရို့ ဖြစ်လာဖို့လို့ ဆိုပါရေ။

နောက် နံပါတ် ၆ ကနိန် နံပါတ် ၁၀ ကို၊ ဂျာမဏီ၊ အိန်ဒိုနီးရှား၊ ဘရာဇီးလ်၊ တာကီနန့် ယူကေ နိုင်ငံရို့က အတန်းလိုက် ယူလာကတ်ဖို့လို့ ဆိုပါရေ။

“၂၀၂၀ ခုနှစ်မှာ ကဗာ့လူဦးရေ အများစုစွာ လူလတ်တန်းစားဘဝကို ရောက်ကတ်ပါဖို့။ အနောက်နိုင်ငံတိမှာ လူလတ်တန်းစား တိုးပွားလာမှု ရပ်တန့်လားကေလည်း၊ အာရှတိုက်မှာ လူလတ်တန်းစား အများဆုံး တိုးပွားလာပါဖို့။” ဆတန်းဒါ့ဒ် ချာတာ့ဒ် သုတေသီ မတ်ဒ်ဟာ ဂျာ(Madhur Jha)က တင်ပြထားပါရေ။

လာဖို့ ဆယ်စုနှစ်တိမှာ အာရှတိုက် စီးပွားရေးစွာ အကောင်းဆုံး ဖြစ်လာပနာ၊ ၂၀၃၀ ခုနှစ် အရောက်မှာ၊ ကဗာ့ထိပ်တန်း စီးပွားရေးအင်အားကြီးနိုင်ငံ ၁၀ နိုင်ငံထဲမှာ ၇ နိုင်ငံထိ၊ အာရှနိုင်ငံတိက နိန်ရာ ယူလာဖို့လို့ ဆိုပါရေ။