၂၀၁၉ မှာ အမေရီကန်ပြည်ထောင်စု ဘားက ကဗာ့အကြီးဆုံး လက်လီစျီးကွက် သရဖူကို တရုတ် လုဖို့

0
1478
FILE PHOTO: A Chinese dancer © Global Look Press
FILE PHOTO: A Chinese dancer © Global Look Press

အေနှစ်ထဲမှာ တရုတ်နိုင်ငံက လက်လီစျီးကွက်စွာ ပိုကျယ်ပြန့်လာပနာ၊ အမေရီကန်ပြည်ထောင်စုထက် အမေရီကန်ဒေါ်လာ ၁၀၀ ဘီလီယံ ပိုဗျာလ်၊ ကဗာ့အကြီးဆုံး လက်လီစျီးကွက် သရဖူကို လုယူလားဖို့လို့၊ အမေရီကန်ပြည်ထောင်စု အခြေစိုက် စျီးကွက် သုတေသနအဖွဲ့ အီးမာကတ်တာ(eMarketer)က ခန့်မှန်းထားပါရေ။

ကဗာ့ လူဦးရေအများဆုံးနန့်၊ ဒုတိယစီးပွားရေးအင်အားအကြီးဆုံး တရုတ်နိုင်ငံစွာ ၂၀၁၉ ခုနှစ်မှာ ရောင်းအား အမေရီကန်ဒေါ်လာ ၅.၆၄ ထရီလီယံ အထိ ရောက်လာပနာ၊ အယင်နှစ်ကထက် ၇.၅% ရောင်းအား ပိုကောင်းလာဖို့လို့ ဆိုပါရေ။ အမေရီကန်ပြည်ထောင်စုမှာတော့ ရောင်းအား ၃.၃% ပိုကောင်းလာပနာ၊ အမေရီကန်ဒေါ်လာ ၅.၅၃ ထရီလီယံ အထိ ရောက်လာဖို့လို့ ဆိုပါရေ။

“အေနှစ်တိအတွင်း၊ တရုတ်ပြည်သားတိ ဝင်ငွေ ပိုကောင်းလာပနာ၊ အလယ်အလတ် လူတန်းစားတိ သန်းချီပနာ တိုးပွားလာနိန်ပါရေ။” လို့ အကြီးတန်း ခန့်မှန်းရေး ဒါရိုက်တာ မိုနီကာ ပီးယာ့တ်(Monica Peart)က ပြောပါရေ။ “ရလာဒ်က ဝယ်ယူနိုင်အား ပိုကောင်းလာပနာ၊ တယောက်ချင်းစီ ပျမ်းမျှ ငွေသုံးအား ပိုမြင့်လာရေ။” လို့ ဆိုပါရေ။

တရုတ်နိုင်ငံမှာ လက်လီစျီးကွက်ကို အများဆုံး မြှင့်တင်ပီးစွာက၊ အီးကင်းမာ့ဆ်(e-commerce)လို့ ခေါ်ရေ အွင်လိုင်းစျီးရောင်းစွာတိလို့ အီးမာကတ်တာက ကောက်ချက်ချထားပါရေ။ တရုတ်နိုင်ငံစွာ ကဗာမှာ အကြီးဆုံး အွင်လိုင်းလက်ကားစျီးကွက်ကို ပိုင်ဆိုင်ထားပနာ၊ ၃၅.၃% ရှိရေလို့ ဆိုပါရေ။ အေနှစ်မှာ ၃၀% ၊ အမေရီကန်ဒေါ်လာ ၁.၉၉ ထရီလီယံ ဖိုးအထိ ထပ်မြင့်လာဖို့ စီစဉ်ထားရေလို့ ဆိုပါရေ။

အမေရီကန်ပြည်ထောင်စုကတော့ခါ ၂၀၂၂ ခုနှစ်ရောက်ကေ၊ ကဗာ့အွင်လိုင်းစျီးကွက် ပိုင်ဆိုင်မှု ၁၅% ထပ်ကျလားဖို့သိမ့်လို့ ဆိုပါရေ။ တရုတ်နိုင်ငံ အွင်လိုင်းစျီးကွက် ပိုင်ဆိုင်မှုက၊ ကဗာ့အွင်လိုင်းစျီးကွက် တဝက်ကျော်ကို အေနှစ်မှာ ရယူလားဖို့ ရှိရေပိုင်၊ နောက် ၃ နှစ်အတွင်းမှာ၊ ၆၃% ကျော်ထိ တိုးယူလားဖို့လို့ ဆိုပါရေ။